Read Revised Akuapem Twi DC-KYERƐW KRONKRON Ɔsɛnkafo 1 Bible Online

Ɔsɛnkafo 1 - Revised Akuapem Twi DC-KYERƐW KRONKRON bible

Ɔsɛnkafo 1

¹Dawid ba, Ɔsɛnkafo a odii hene Yerusalem no nsɛm ni.

²Ahuhude mu ahuhude! Ɔsɛnkafo na ose; ahuhude mu ahuhude! Ade nyinaa yɛ huhuw.

³ Mfaso bɛn na onipa nya ne brɛ a ɔbrɛ owia yi ase nyinaa mu?

⁴ Awo ntoatoaso kɔ, na awo ntoatoaso ba, na asase de, etim hɔ daa.

⁵Owia pue, na owia kɔtɔ, na ɛyɛ ntɛm kɔ n’afa a efi hɔ na ɛsan pue.

⁶Mframa kɔ nifa fam, na ɛdan ba benkum fam; ɛde adannan kɔ, na n’adannan no so na mframa no nam san ba.

⁷Nsubɔnten nyinaa sen kɔ po mu, nanso ɛpo renyɛ ma: Faako a nsubɔnten no nenam kɔ no, ɛhɔ ara na ɛsan kɔ bio.

⁸ Nsɛm nyinaa yɛ ɔbrɛ nko ara; obiara ntumi nka; ɔhwɛ mmee aniwa, na ɔte nso nyɛ aso ma.

⁹Dɛn ne nea aba? Ɛne nea ɛbɛba; na ɛdɛn ne nea wɔayɛ? Ɛne nea wɔbɛyɛ; na ade foforo biara nni hɔ owia ase.

¹⁰Asɛm bi wɔ hɔ a wɔka sɛ: Hwɛ, eyi de, ɛyɛ foforo, anaa? Tete nteredee bere a edi yɛn anim no so na ɛbae.

¹¹Nkae bi nni hɔ mma kanfo no, na nkyirimma a wɔbɛba no nso rennya nkae bi, wɔn a wobedi akyiri aba no nkyɛn.

¹² Me ɔsɛnkafo, midii Israel so hene Yerusalem,

¹³na mede me koma memae sɛ mede nyansa merebisa na mahwehwɛ nneɛma a wɔyɛ no ɔsoro ase nyinaa mu, ɔhaw bɔne a Onyankopɔn de ato nnipa mma so sɛ wɔmmrɛ mu ne no.

¹⁴Mihuu nnwuma a wɔyɛ owia ase nyinaa, na hwɛ, ne nyinaa yɛ ahuhude ne ɔdadwen hunu.

¹⁵ Nea akyea no, wontumi nteɛ, na nea aka mu no, wontumi nkan.

¹⁶Mekaa wɔ me komam sɛ: Me de, hwɛ, mama me nyansa aso ayɛ bebree sen wɔn a wodii me kan Yerusalem nyinaa, na me koma ahu nyansa ne nimdeɛ a ɛdɔɔso.

¹⁷ Na mede m’adwene mehwɛe sɛ mehu nyansa, na mahu adammɔ ne nkwaseasɛm, na nso mahu sɛ eyi nso yɛ ɔdadwen hunu.

¹⁸Na nyansa dodow mu wɔ ɔhaw dodow, na nea otia nimdeɛ no tia awerɛhow.