Read Revised Akuapem Twi DC-KYERƐW KRONKRON Ɔsɛnkafo 11 Bible Online

Ɔsɛnkafo 11 - Revised Akuapem Twi DC-KYERƐW KRONKRON bible

Ɔsɛnkafo 11

¹ Tow w’abodoo gu nsu ani, na daakye bi wubehu.

²Kyɛ mu ma nnipa baasɔn anaa baawɔtwe mpo, na wunnim bɔne ko a ɛbɛba asase so.

³Sɛ osu yɛ amununkum ma a, ɛtɔ gu asase so; na sɛ dua kɔhwe anafo fam anaa atifi fam a, faako a dua no hwee no, ɛhɔ na ɛbɛda.

⁴Nea ɔhwɛ mframa no rengu aba, na nea ɔhwɛ amununkum no rentwa.

⁵ Sɛnea wunnim mframa kwan ne sɛ nnompe nyin onyinsɛnfo yam no, saa ara na wunnim Onyankopɔn a ɔyɛ ade nyinaa no nneyɛe.

⁶Gu w’aba anɔpa, na anwummere nso nyi wo nsa mfi ho, na wunnim nea ɛbɛyɛ yiye, eyi anaa eyi, anaasɛ n’abien nyinaa bɛbom ayɛ yiye.

⁷Hann nso yɛ dɛ, na ɛyɛ aniwa fɛ sɛ ehu owia.

⁸Na sɛ onipa di mfe pii a, ɔmma n’ani nnye ne nyinaa mu, nanso ɔnkae sum nna no, sɛ ɛbɛdɔɔso; nea ɛbɛba nyinaa yɛ ahuhude.

⁹ Aberante, ma w’ani nnye wo mmofraase, na nya koma pa wo mmerantebere mu, na fa wo koma akwan so ne nea w’aniwa hu mu, nso hu sɛ eyinom nyinaa nti na Onyankopɔn de wo bɛkɔ atemmu.

¹⁰Na yi awerɛhow fi wo koma mu, na ma adebɔne mpare wo honam, na mmofraase ne mmerantebere yɛ ahuhude.