Read Revised Akuapem Twi DC-KYERƐW KRONKRON Ɔsɛnkafo 3 Bible Online

Ɔsɛnkafo 3 - Revised Akuapem Twi DC-KYERƐW KRONKRON bible

Ɔsɛnkafo 3

¹ Ade biara wɔ ne bere a wɔahyɛ no, na ɛbere wɔ hɔ ma adwuma nyinaa ɔsoro ase:

²Awo wɔ ne bere, na owu wɔ ne bere; ɔtɛw wɔ ne bere, na nea wɔatɛw no tutu wɔ ne bere;

³okum wɔ ne bere, na ɔsa wɔ ne bere; obubu wɔ ne bere, na osi wɔ ne bere;

⁴osu wɔ ne bere, na ɔserew wɔ ne bere; nkɔmmɔdi wɔ ne bere, na asaw wɔ ne bere;

⁵abo towgu wɔ ne bere, na abo anoboa wɔ ne bere; atuuyɛ wɔ ne bere, na atuuyɛ ntetewmu wɔ ne bere;

⁶ɔhwehwɛ wɔ ne bere, na ɔyera wɔ ne bere; nhwɛso wɔ ne bere, ɔtowgu wɔ ne bere

⁷osuane wɔ ne bere, na ɔpam wɔ ne bere; Kommyɛ wɔ ne bere, na ɔkasa wɔ ne bere;

⁸ɔdɔ wɔ ne bere, na ɔtan wɔ ne bere; akodi wɔ ne bere, na ɔmannwoe wɔ ne bere.

⁹Mfaso bɛn na nea ɔyɛ adwuma no nya nea ɔbrɛ ho no mu?

¹⁰Mahu ɔbrɛ adwuma a Onyankopɔn de ama nnipa mma sɛ wonni mmrɛ mu no.

¹¹ Wayɛ ade nyinaa fɛfɛ ne bere mu, nso ɔde wiase ahyɛ wɔn komam, anyɛ saa de a, anka onipa renhu adwuma a Onyankopɔn yɛ fi mfiase kosi awiei no.

¹² Mahu sɛ adepa nni hɔ mma nnipa, gye sɛ wɔma wɔn ani gye na wɔyɛ yiye wɔn nkwa mu;

¹³nanso sɛ onipa biara didi nom hu adepa ne brɛ nyinaa mu a, Onyankopɔn akyɛde ne no.

¹⁴Mahu sɛ ade biara a Onyankopɔn yɛ no, ɛno na ɛbɛtena hɔ daa, wɔrenka ho bi, na wɔrenyi mu bi. Na Onyankopɔn yɛe sɛ wonsuro n’anim.

¹⁵Nea ɛba no yɛ teteete ade, na nea ɛrebɛba no nso, ɛbae teteete, na Onyankopɔn hwehwɛ nea ɛsen kɔ bio.

¹⁶Na nea mahu bio owia ase ne atemmubea a abɔnefosɛm wɔ hɔ ne treneebea a amumɔyɛ wɔ hɔ.

¹⁷ Mekae me komam sɛ: Ɔtreneeni ne ɔbɔnefo nyinaa, Onyankopɔn bebu wɔn atɛn, efisɛ adwuma nyinaa ne nneyɛe nyinaa wɔ ne bere.

¹⁸Mekae me komam wɔ nnipa ho sɛ: Onyankopɔn resɔ wɔn ahwɛ, na wɔahu sɛ wɔn fam no wɔyɛ mmoa ara nko.

¹⁹ Na nnipa mma hyɛbea ne mmoa hyɛbea sɛ, na hyɛbea koro da hɔ ma wɔn: Sɛ oyi wu te no, sɛ oyi wu te ne no, na honhom biako na wɔn nyinaa wɔ, na ɔkyɛn a onipa bɛkyɛn aboa nni hɔ; na ade nyinaa yɛ ahuhude.

²⁰ Ade nyinaa kɔ faako, ade nyinaa fi dɔte mu, na ade nyinaa san kɔ dɔte mu.

²¹ Hena na onim nnipa mma honhom sɛ ɔforo kɔ ɔsoro, ne mmoa honhom sɛ osian kɔ asase ase?

²²Na mihui sɛ adepa bi nni hɔ gye sɛ onipa ani gye ne nnwuma mu, na ɛno ne ne de; na hena na ɔde no bɛba na wabɛhwɛ nea ɛbɛba n'akyi no?