Read Revised Akuapem Twi DC-KYERƐW KRONKRON Ɔsɛnkafo 8 Bible Online

Ɔsɛnkafo 8 - Revised Akuapem Twi DC-KYERƐW KRONKRON bible

Ɔsɛnkafo 8

¹Hena na ɔte sɛ onyansafo? Na ɛhena na onim asɛm ase kyerɛ? Onipa nyansa ma n’anim hyerɛn, na n’anim denyɛ sakra.

²Mise: Di ɔhene anom asɛm so, Onyankopɔn ntam no nti.

³Mpɛ ntɛm mfi n’anim nkɔ, nnyina asɛmmɔne so, na nea ɛsɔ n’ani nyinaa na ɔyɛ.

⁴Efisɛ ɔhene asɛm di tumi, na hena na obetumi aka akyerɛ no sɛ: Dɛn na woreyɛ yi?

⁵Nea odi mmara asɛm so no nnim asɛmmɔne bi, na onyansafo koma nim bere ne atemmu.

⁶ Na ɛbere ne atemmu wɔ hɔ ma nsɛnnii nyinaa, na onipa bɔne dɔɔ no so so.

⁷ Na obi nni hɔ a onim nea ɛbɛba, na sɛnea ɛbɛba no, hena na obetumi akyerɛ no?

⁸Onipa bi nni honhom so tumi, sɛ ɔde besiw honhom no kwan, na owu da so tumi nni hɔ, na ɔkwamma nni ɔsa mu, na bɔne mma ne yɛfo mfi mu mfi.

⁹Eyi nyinaa mahu, na me de, madwen adwuma a wɔyɛ owia ase nyinaa ho, ɛbere bi wɔ hɔ a onipa di onipa so tumi ma ɛdan no ɔhaw.

¹⁰Na saa nso na mihuu abɔnefo a wosiee wɔn, na wɔhyɛn wɔn home mu, nanso wɔn a wɔyɛɛ nea ɛfata no, wofi kronkronbea kɔe na ani paa wɔn so kurow mu. Eyi nso yɛ ahuhude.

¹¹ Sɛ nneyɛe bɔne ho afobu mma ntɛm nti, na nnipa mma bɔne ho atirimpɔw ayɛ wɔn koma ma.

¹² Sɛ ɔdebɔneyɛfo di asɛmmɔne mpɛn ha na ɔtena hɔ kyɛ a, ɛnyɛ dɛn ara a, minim sɛ ebesi wɔn a wosuro Onyankopɔn na wɔfrɛ no no yiye;

¹³na ɛrenwie ɔbɔnefo yiye, na ɔremma ne nna nkyɛ, ɔte sɛ sunsuma, sɛ ɔmfɛre Onyankopɔn ntia.

¹⁴ Ahuhude bi nso wɔ asase so: Sɛ atreneefo bi wɔ hɔ a ade a ɛfata abɔnefo nneyɛe bɛto wɔn, na abɔnefo nso wɔ hɔ a ade a ɛfata atreneefo nneyɛe bɛto wɔn. Mekae sɛ eyi nso yɛ ahuhude.

¹⁵ Ɛnna mekamfoo anigye, sɛ papa nni hɔ mma onipa owia ase, gye sɛ odidi na ɔnom na n’ani gye, na eyi ara na ɛfam ne ho ne brɛ mu, ne nkwa nna a Onyankopɔn de ma no owia ase no mu.

¹⁶Mede me koma mehwɛe sɛ mehu nyansa, na mahwɛ ɔbrɛ adwuma a wɔyɛ asase so no, sɛ awia ne anadwo po onipa nnya nna, n’aniwa mu no,

¹⁷ ɛnna mihuu Onyankopɔn nneyɛe nyinaa, sɛ onipa ntumi nhu nneɛma a wɔyɛ owia ase no, sɛnea onipa bɛbrɛ de ahwehwɛ, nanso ɔrenhu, na sɛ onyansafo nso ka sɛ obehu a, ɔrentumi nhu.