Read Revised Akuapem Twi DC-KYERƐW KRONKRON Nnwom mu dwom 1 Bible Online

Nnwom mu dwom 1 - Revised Akuapem Twi DC-KYERƐW KRONKRON bible

Nnwom mu dwom 1

¹Nnwom mu dwom a ɛyɛ Solomon de.

²Ma ɔmfa n’ano mfewano mfew m’ano, na wo dɔ ye sen bobesa.

³Wo sradehuam yi hua pa, ngohuam a wɔahwie ne wo din, ɛno nti na mmabaa dɔ wo no.

⁴Twe me di w’akyi! Ma yɛnyɛ ntɛm. Ɔhene de me aba ne mpia mu. Yebedi ahurusi na yɛn ani agye wo ho, yɛbɛkamfo wo dɔ asen bobesa. Trenee so na wɔdɔ wo.

⁵Yerusalem mmabea, mibiri de, nanso me ho yɛ fɛ, sɛ Kedar ntamadan, sɛ Solomon mmɔɔhɔɔ.

⁶Monnhwɛ me sɛ mibiri, sɛ owia ahyehye me nti; me na mma bo fuw me, wɔde me yɛɛ bobe nturo wɛmfo, me bobeturo a ɛyɛ me de no de, manwɛn.

⁷Ka kyerɛ me, wo a me kra dɔ wo, ɛhe na woyɛn nguan no, ɛhe na woma wobutubutuw awiabere? Na ɛdɛn nti na menyɛ sɛ nea okyini wo mfɛfo nguankuw so?

⁸ Sɛ wo de, wunnim a, wo mmea mu hoɔfɛfo, fi adi fa nguan no anammɔn so, na kɔyɛn wo mmirekyi mma, nguanhwɛfo tenabea hɔnom.

⁹Me pɔnkɔbere a ɔwɔ Farao teaseɛnam ho no na mede wo meto, m’adamfowaa.

¹⁰W’afono yɛ fɛ, mpompranne no mu, wo kɔn nso yɛ fɛ, komuade no mu.

¹¹Sika nnwinne mpompranne na yɛbɛyɛ ama wo, ne dwetɛ nkoropɛe a esisi so.

¹²Ɔhene wɔ n’adidipon ho no, na me sradehuam reyi ne hua.

¹³Me dɔfo yɛ me kurobow kasiaw a ɛda me nufu ntam.

¹⁴Me dɔfo yɛ me sɛ ahuahaa nhwiren kasiaw, En-gedi bobe nturo mu.

¹⁵ Hwɛ, wo ho yɛ fɛ, me dɔfo, hwɛ, wo ho yɛ fɛ, w’aniwa yɛ aborɔnoma aniwa.

¹⁶ Hwɛ, wo de, wo ho yɛ fɛ, me dɔfo, yiw, wosɔ ani, yɛn nnae nso yɛ frɔmfrɔm.

¹⁷Yɛn adan nsɛmso yɛ kyeneduru, yɛn ntaaboo yɛ ɔpopaw.