Read Revised Akuapem Twi DC-KYERƐW KRONKRON Nnwom mu dwom 8 Bible Online

Nnwom mu dwom 8 - Revised Akuapem Twi DC-KYERƐW KRONKRON bible

Nnwom mu dwom 8

¹Oo sɛ anka woyɛ me nua a onum me na nufu ɛ! Sɛ mihu wo borɔn so a, anka mefew w’ano, nso obi remmu me animtiaa.

² Anka megya wo makɔ me na fi, na woakyerɛkyerɛ me ade, na mama woanom nsa a wɔde aduhuam bi agu mu, m’atea nsa no bi.

³ Ne benkum hyɛ me ti ase, na ne nifa yɛ me atuu.

⁴ Meka mo ntam, Yerusalem mmabea: Munnnyan ɔdɔ na monnhwanyan no, gye sɛ ɔno ara pɛ ansa.

⁵Ɛhena ne ɔbea yi a ɔforo fi sare so reba a otweri ne dɔfo yi? Minyan wo akutu no ase, ɛhɔ na wo na woo wo, ɛhɔ na wo wofo kyemee.

⁶Fa me si wo koma so sɛ nsɔanode, fa me si wo basa so sɛ nsɔanode. Na ɔdɔ yɛ den sɛ owu, ninkuntwe mu yɛ duru sɛ asaman, ne nsramma yɛ ogya nsramma, AWURADE gyaframa.

⁷Nsu pii ntumi nnum ɔdɔ, na nsubɔnten ntumi nsram so; sɛ obi de ne fi adedodow nyinaa ma de tɔ ɔdɔ mpo a, wɔremmu no hwee.

⁸Yɛwɔ onuabea kumaa bi a ɔmmɔɔ nufu ɛ, dɛn na yɛbɛyɛ ama yɛn nuabea no da a wobebisa n’ase no?

⁹Sɛ ɔyɛ ɔfasu a, yɛbɛto no so dwetɛ aban, na sɛ ɔyɛ ɔpon a, yɛde kyeneduru ntaaboo bɛbram ne ho.

¹⁰Me de, meyɛ ɔfasu, na me nufu te sɛ aban atenten, ɛno na meyɛɛ n’ani so sɛ nea ɔde asomdwoe ba.

¹¹Solomon wɔ bobeturo bi Baal-hamon, ɔde bobeturo no maa ahwɛfo, sɛ n’aba nti wɔn nyinaa mmoma no dwetɛ apem apem.

¹²Me bobeturo a ɛyɛ me de no wɔ m’anim; apem no nyɛ wo de, Solomon, na ahanu nyɛ n’aba ahwɛfo de.

¹³ Wo a wote nturo no mu no, wo mfɛfo retie wo nne; ma mintie ɛ!

¹⁴ Fa mmirika guan, me dɔfo, na yɛ wo ho sɛ ɔtwe anaa ɔforoteforo, nnuhuam mmepɔw so.