Read Revised Akuapem Twi DC-KYERƐW KRONKRON Yesaia 19 Bible Online

Yesaia 19 - Revised Akuapem Twi DC-KYERƐW KRONKRON bible

Yesaia 19

¹ Misraim ho atemmusɛm. Hwɛ, AWURADE te mununkum harehare so reba Misraim, na Misraim abosonhuhuw ho bɛpopo n’anim, na Misraim koma anan wɔ ne mu.

²Na mɛhwanyan Misraim mahyɛ Misraim, na wɔne wɔn ho wɔn ho akoko, onua ne onua, adamfo ne adamfo, kurow ne kurow, ahenni ne ahenni.

³Na Misraim honhom bɛsa wɔ ne mu, na n’agyinatu nso, mahwete na wɔakɔ akobisa abosonhuhuw ne kaberɛkyerefo ne asamanfrɛfo ne asumanfo.

⁴Na mede Misraimfo mɛhyɛ owura tirimmɔdenfo nsa, na ɔhene a ɔyɛ den adi wɔn so: AWURADE, asafo AWURADE, na ose.

⁵Na asubɔnten Nil mu nsu bɛyow, na asu no bɛmem na asa ayɛ kesee,

⁶na nsubɔnten no bɛbɔn, na Misraim nsuka no atwe asa nnemmire ne sakran benyinnyam.

⁷Nil kɔn so ne Nil ano wura a efuw ne ade a wɔadua Nil ho nyinaa bɛhyew apete asɛe pasaa;

⁸na apofofo no begu ahome, na wɔn a wɔto Nil mu nnarewa adi nkɔmmɔ, na nsu no ani asawugufo ahodwow;

⁹na siwabiri mfuturu srɛnfo ne nweranwemfo ani bewu.

¹⁰Asase no adum bebubu na apaadifo nyinaa werɛ ahow.

¹¹Soan mmapɔmma yɛ nkwasea ara nko, na Farao afotufo mu anyansafo afotu adan nkwaseasɛm. Ɛdɛn na muse Farao sɛ: Anyansafo ba ne me, tete ahene no ba?

¹²Ɛhe na afei w’anyansafo no wɔ? Na wonyi nkyerɛ wo, na wonhu agyina a asafo AWURADE atu, Misraim so.

¹³Soan mmapɔmma adan nkwasea, na Memfis mmapɔmma nso ayera, na wɔn a wɔyɛ mmusuakuw no mu tweabo adaadaa Misraim.

¹⁴ AWURADE ahwie anisobiri honhom agu no mu, na wɔama Misraim agyigya, ne nneyɛe nyinaa mu, sɛnea ɔsabofo yantam ne fe mu no.

¹⁵ Na biribiara nni hɔ a eti anaa dua, mpopa anaa mmɛw, betumi ayɛ ama Misraim.

¹⁶Ɛda no, Misraim bɛyɛ sɛ mmea, na wobesuro na wɔn ho apopo, asafo AWURADE nsa wosow a ɔbɛwosow wɔ wɔn so no nti.

¹⁷Na Yuda asase ho bɛyɛ Misraim hu, obiara bɔ ne din a, wɔn ho bɛpopo, asafo AWURADE agyina a watu, Misraim ho no nti.

¹⁸ Ɛda no, Misraim asase so ahenkurow anum bɛkasa Kanaan kasa, na wɔaka AWURADE ntam; na wɔbɛfrɛ biako sɛ: Ɔsɛe kurow.

¹⁹Ɛda no na wɔde afɔremuka besi Misraim asase mfinimfini ama AWURADE, na ɔbodum besi ne hye ho ama AWURADE,

²⁰na ayɛ sɛnkyerɛnne ne adanse ama asafo AWURADE, Misraim asase so, na sɛ wosu frɛ AWURADE, ahawfo anim a, wasoma ogyefo ne ɔsɛnnifo aba wɔn nkyɛn abegye wɔn.

²¹Na AWURADE beyi ne ho adi ama Misraim ahu no, na Misraimfo behu AWURADE ɛda no, na wɔde afɔre ne ayɛyɛde asom no, na wɔahyɛ AWURADE bɔ na wɔama.

²²Na AWURADE bɛbobɔ Misraim, ɔbɛbobɔ wɔn, na wasa wɔn yare; na wɔbɛsan aba AWURADE nkyɛn, na watie wɔn asa wɔn yare.

²³Ɛda no, ɔtempɔn bɛda afi Misraim akɔ Asiria, na Asiriafo aba Misraim, na Misraimfo akɔ Asiria, na Misraimfo ne Asiriafo abom asom.

²⁴Ɛda no, Israel bɛto Misraim ne Asaria so abiɛsa ayɛ nhyira, asase mfinimfini,

²⁵ esiane sɛ asafo AWURADE ahyira wɔn sɛ: Nhyira nka me man Misraim ne me nsa ano adwuma Asaria ne m’agyapade Israel.