Read Revised Akuapem Twi DC-KYERƐW KRONKRON Yesaia 21 Bible Online

Yesaia 21 - Revised Akuapem Twi DC-KYERƐW KRONKRON bible

Yesaia 21

¹ Atemmusɛm a ɛfa Mpoano sare so aman ho ni: Sɛ ahum tutu fi Negeb fam ba no, saa ara na efi anwea so, efi asase a ɛso yɛ hu so ba.

²Anisoadehu a ɛyɛ den na wɔayi akyerɛ me: Ɔfowfo refow na ɔsɛefo resɛesɛe. O Elam, foro bra! Media, bɛka no hyɛ mu! Mɛma n’apinisi nyinaa to atwa.

³Enti m’asen mu ka me dwɛɛdwɛɛ, ɔkyem aka me sɛ ɔbea ɔwofo kyem; yaw a ɛyɛ me nti, mente asɛm, me ho a ɛyeraw me nti, minhu ade,

⁴me koma bɔ me paa paa, ehu ama mayɛ sipiripii, ama anadwofa hann a mehwehwɛe no adan me ahopopo ara nko.

⁵Wɔtow pon, wɔsesɛw nkuntu akɛtɛ, wodidi na wɔnom. Asafohene, monsɔre! Monsra akyɛm ho ngo,

⁶Na nea Awurade ka kyerɛɛ me ni: Kɔ, fa ɔwɛmfo kogyina hɔ, nea obehu no, ɔnka.

⁷Sɛ ohu nteaseɛnam, apɔnkɔsotefo baanu baanu, nteaseɛnam ne mfurum, nteaseɛnam ne yoma a; ma ɔwɛn n’aso yiye na ɔwɛn pa ara.

⁸ Na ɔteɛɛm sɛ gyata sɛ: O Awurade, migyina awɛnee ha ara daa ne daa, na migyina m’ahwɛe ara anadwo nyinaa,

⁹ Hwɛ nteaseɛnam ne nnipa, apɔnkɔsotefo baanu baanu na wɔreba yi. Na ogyee so sɛ: Ahwe ase oo! Babel ahwe ase! Na n’anyame ahoni nyinaa, wɔabubu agu fam.

¹⁰M’ade a wɔaporow ne m’awiporowee ase ba! Nea mate asafo AWURADE, Israel Nyankopɔn, anom no na maka makyerɛ wo yi.

¹¹ Duma ho atemmusɛm ni: Obi bɔn me fi Seir sɛ: Ɔwɛmfo, anadwo mu dasu bɛn ni? Ɔwɛmfo, anadwo mu dasu bɛn ni?

¹²Ɔwɛmfo no se: Ade rekye, na adesae nso reba; sɛ mubebisa a, mummisa, monsan mmra.

¹³Arabia ho atemmusɛm ni: Dedan akwantufo asafo, anwea pradada so Arabia na mobɛsoɛ.

¹⁴Momfa nsu mmehyia wɔn a osukɔm de wɔn, Tema asase sofo, momfa abodoo mmehyia aguanfo;

¹⁵efisɛ wɔaguan afi mfoa ano, afoa a wɔatwe ne ɔta a wɔapono ne ɔko dennen ano.

¹⁶ Na nea Awurade ka kyerɛɛ me ni: Ɛha afe, sɛ ɔpaani mfe te no, [4] na Kedar anuonyam nyinaa asa koraa,

¹⁷na Kedar mma mu nnɔmmarima ta dodow nkae no besua, efisɛ AWURADE, Israel Nyankopɔn, na aka.