Read Revised Akuapem Twi DC-KYERƐW KRONKRON Yesaia 22 Bible Online

Yesaia 22 - Revised Akuapem Twi DC-KYERƐW KRONKRON bible

Yesaia 22

¹ Adehu bon no ho atemmusɛm: Ɛdɛn na ɛyɛ wo na wo nnipa nyinaa aforo kɔ adan atifi yi?

²Wo a huuyɛ ayɛ wo ma, hooyɛ kurow, ahosɛpɛw kurow, w’atɔfo antotɔ afoa ano, na wɔanwuwu ɔko mu.

³Wo mmapɔmma nyinaa abom aguanguan kɔ; ɛnyɛ ta na wɔde kyeree wɔn. Wo nnipa a wohuu wɔn no nyinaa, woguan kɔɔ akyirikyiri, nso wɔkyeree wɔn nyinaa.

⁴Enti na mise: Munyi mo ani mfi me so na minsu osu yawyaw. Monnhaw mo ho sɛ mobɛkyekye me werɛ, me man babea no sɛe ho.

⁵Na AWURADE, asafo AWURADE wɔ da bi, ɛyɛ hooyɛ ne ntiatiaso ne ahoyeraw da, adehu bon no mu, wodwiriw fasu no, wɔteɛm ma egyigye mmepɔw so.

⁶Na Elam so agyan kotoku mu de nteaseɛnam ne nnipa ne apɔnkɔfo reba, na Kir nso ayi kyɛm adi;

⁷na nteaseɛnam bɛyeyɛ wo abon a ɛyɛ fɛ no amaama na apɔnkɔfo nso agyinagyina kurow pon ano.

⁸ Na obeyi Yuda so nkataho no. Na ɛda no, wode w’ani bɛto kwae fi no mu akode so,

⁹ na Dawid kurow no mu mpaepae no, mubehu sɛ ayɛ bebree, na moaboa ase tare no mu nsu ano;

¹⁰ na mobɛkan Yerusalem adan, na moaburuw adan no, sɛ mode rewowaw fasu no;

¹¹na mubetwa ɛkɔ wɔ afasu abien no ntam ama ɔtare dedaw no mu nsu no, nanso morenhwɛ nea ɔyɛɛ ade no, na nea teteete no ɔhyehyɛe no, moremmu no.

¹²Na ɛda no, AWURADE, asafo AWURADE, frɛɛ nnipa baa osu ne adwotwa ne tikwawbɔ ne atweaatamfura mu,

¹³ Na hwɛ, ahosɛpɛw ne anigye, anantwi menetwa ne nguan kum, namdi ne nsanom ni: Momma yennidi na yɛnnom, na ɔkyena na yɛawu.

¹⁴Na asafo AWURADE ayi me asitiw sɛ: Wɔremfa amumɔyɛ yi mfiri mo kosi bere a mubewuwu: AWURADE, asafo AWURADE, na ose.

¹⁵ Sɛ AWURADE, asafo AWURADE, se ni: Kɔ ofie panyin Sebna yi a odi ofi no so no nkyɛn sɛ:

¹⁶Ɛdɛn na wowɔ yɛ wɔ ha? Na ɛhena na wowɔ no ha na woretwa ɔboda wɔ ha afa? Ɔretwa ɔboda wɔ nea ɛkorɔn, ɔreyɛ ne tenabea wɔ ɔbotan mu!

¹⁷Hwɛ, AWURADE bɛtow wo akyene anibere so, Yiw ɔbran katakyi obeso wo mu dennen,

¹⁸na wahwim wo atow wo sɛ okowa akyene asase a ɛtrɛw so, ɛhɔ na wobɛkɔ akowu, na ɛhɔ na w’anuonyam nteaseɛnam bɛkɔ, wo a woyɛ wo wura fi ahohora.

¹⁹Na mesum wo afi wo sibea, na wɔadwiriw wo afi wo gyinabea.

²⁰ Na ɛbɛba da no sɛ mɛfrɛ m’akoa Hilkia ba Eliakim maba,

²¹na mede wo batakari mahyɛ no, na mede w’abɔso mabɔ no so, na mede wo panyinni mahyɛ ne nsa, na wayɛ agya ama Yerusalemfo ne Yuda fi.

²² Na mede Dawid fi safe mato ne mmati, na wahiɛ, na obi anto mu, na wato mu, na obi anhiɛ.

²³Na mɛyɛ no sɛ bofunnua mabɔ nea ɛhɔ yɛ den, na wayɛ anuonyam agua ama n’agya fi;

²⁴na wɔde n’agya fi anuonyam nyinaa bɛma no, n’asefo ne mmanana nyinaa, nneɛma nketenkete nyinaa, efi nyowa so kosi nhina nyinaa so.

²⁵Ɛda no, asafo AWURADE na ose, bofunnua a wɔde abɔ nea ɛhɔ yɛ den no bɛhɔn, na wɔabu ahwe fam, na adesoa a ɛsɛn so no asɛe, efisɛ AWURADE na waka.