Read Revised Akuapem Twi DC-KYERƐW KRONKRON Yesaia 23 Bible Online

Yesaia 23 - Revised Akuapem Twi DC-KYERƐW KRONKRON bible

Yesaia 23

¹ Tiro ho atemmusɛm. Mo Tarsis ahyɛn, muntwa adwo, na wɔasɛe Tiro abandennen no, ofi nni hɔ bio, obi nkɔ hɔ bio! Efi Kitim asase so na woyi kyerɛ wɔn.

²Mo mpoanofo, monyɛ komm! Sidon aguadifo a wotwa po no yɛɛ wo ma;

³na wɔfaa nsu bebree so wo sika fi Sihor nnɔbae mu, ne Nil ano awi bae, na woyɛɛ amanaman mu aguadifo.

⁴Sidon, ma w’ani nwu; na ɛpo, po mu abankɛse, ka sɛ: Mankyem na manwo mma da, na manyɛn mmerante na manturu mmabaa.

⁵Misraim te nka ara pɛ, ebedi Tiro asɛm no ho yaw kɛse.

⁶Muntwa nkɔ Tarsis, mo mpoanofo, muntwa adwo.

⁷So eyi ne mo ahurusidi kurow a efi tete bemee ne nan de no dɔɔ mu kɔɔ akyirikyiri kɔtenaa hɔ no?

⁸ Hena na ɔbɔɔ ne tirim pɔw yi hyɛɛ Tiro abotirimafo no, a n’aguadifo yɛ mmakoma ara nko, na n’adetɔnfo yɛ asase so anuonyamfo ara nko no?

⁹Asafo AWURADE abɔ ne tirim, sɛ obegurow ahoɔfɛ ne ahantan nyinaa, na wahura asase so anuonyamfo nyinaa ho.

¹⁰ Twam kɔ w’asase so sɛ Nil; O Tarsis ahyɛn nkyekyeremu bi nni hɔ bio.

¹¹Wateɛ ne nsa akyerɛ po so, wawosow ahenni horow, AWURADE ahyɛ Kanaan so mmara sɛ wɔnsɛe n’abankɛse.

¹² Na ɔkae sɛ: Nkɔ so nni ahurusi bio, Sidon ba ababaa a wɔabɔ wo adapaa. Sɔre na twam kɔ Kipro, mpo ɛhɔ nso worennya ɔhome.

¹³Hwɛ, Kaldeafo asase no, ɔman yi a anka wɔnyɛ ɔman, Asiriafo ayi ama sare so mmoa, wosii wɔn abantenten wɔ so, wodwiridwiriw n’aban, na wɔma egui.

¹⁴Mo Tarsis ahyɛn, muntwa adwo, na wɔasɛe mo aban.

¹⁵Na da no ɛbɛba sɛ werɛ befi Tiro mfe aduɔson a ɛte sɛ ɔhene biako bere; mfirihyia aduɔson no akyi no, ɛbɛyɛ Tiro sɛ aguaman dwom no:

¹⁶Fa ɔsanku kyin kurow mu, aguaman a werɛ afi wo, bɔ sanku dɛdɛ, na to dwom pii, nea ɛbɛyɛ na wɔakae wo.

¹⁷Na mfe aduɔson no akyi no, AWURADE bɛba abɛhwɛ Tiro bio, na wasan anya n’apaade, na ɔne asase so ahenni a ɛwɔ asase ani nyinaa akɔbɔ aguaman bio;

¹⁸na n’aguade ne n’apaade bɛyɛ kronkron ama AWURADE; wɔremfa mmɔ dwetiri, na wɔrentia; na n’aguade bɛyɛ wɔn a wɔte AWURADE anim no de, na wɔadi amee, na wɔafura ntama pa.