Read Revised Akuapem Twi DC-KYERƐW KRONKRON Yesaia 32 Bible Online

Yesaia 32 - Revised Akuapem Twi DC-KYERƐW KRONKRON bible

Yesaia 32

¹ Hwɛ, trenee so na ɔhene bi bedi hene, na asafohene nso, atemmu so na wobedi asafohene.

²Na wɔn mu biara bɛyɛ sɛ mframa ano hintabea ne osu ano guankɔbea, sɛ nkyerekyerewa so nsuwansuwa, sɛ asase a akyen so botan kɛse onwini.

³Na wɔremfura adehufo aniwa, na wɔn a wɔte asɛm aso bɛwɛn;

⁴ na adwenharefo a ɛpere asɛm ho benya nhumu na dodowpofo tɛkrɛma akasa turodoo a emu tew.

⁵Wɔremfrɛ ogyennyentwi sɛ bapɔmma bio, na wɔrenka sɛ ɔdaadaafo yɛ ɔdɛɛfo.

⁶Na ogyennyentwi ka agyennyentwisɛm na ne koma dwen amumɔyɛsɛm, sɛ obedi ahuhusɛm na waka AWURADE ho asɛm a ɛnteɛ, sɛ ɔbɛma nea odi kɔm kra ada mpan, na wama anonne abɔ nea odi sukɔm.

⁷ Na ɔdaadaafo akwan yɛ bɔne, ɔbɔ ne tirim pɔw bɔne, sɛ ɔde atosɛm bɛsɛe mmɔboroni ne ohiani a ɔka nokware.

⁸Na ɔdɛɛfo dwen ayamye, na ayamye ara na ɔde gyina.

⁹ Mo mmea a mote hɔ dwoodwoo no, monsɔre ntie me! Mmabea a mo ho dwo mo, monyɛ aso mma m’asɛm.

¹⁰Afe ne akyi nna bi mu no, mo a mo ho dwo mo no ho bɛpopo, na bobe abatew to betwa, nnuaba anoboa remma bio.

¹¹Mo mmabaa a mote hɔ dwoodwoo no, mo ho mpopo, mo a mo ho dwo mo, mo ho mpopo! Mompa mo ho, monyeyɛ kwaterekwa, momfa atweaatam mmobɔ mo asen.

¹²Mommobɔ mo koko, mfuw afɛfɛ no nti, bobe nnua a ɛsow pii no ntia.

¹³Nsɔe ne nguare fuw me man asase no so, anigye kurow no mu anigye adan nyinaa so po.

¹⁴Na aban fɛfɛ no bɛda ntuw, wobegyaw kurow a nnipa dɔɔsɔ wɔ mu, ne koko ne ɔwɛn aban bɛdan atu de akosi daa, sare so mfurum anika ne mmoakuw adidibea.

¹⁵ Ɛde rekosi sɛ wobefi soro ahwie honhom no agu yɛn so, na sare so adan asasebere a ɛma nnɔbae, na wɔabu asasebere a ɛma nnɔbae sɛ kwae;

¹⁶na atemmu bɛtena sare so, na trenee nso atena asasebere a ɛma nnɔbae no mu;

¹⁷na trenee no nneyɛe bɛyɛ asomdwoe, na trenee no aba ayɛ komm ne ahotoso akosi daa;

¹⁸na me man bɛtena asomdwoe fi, ne ahotɔ tenabea, ne kommyɛ homebea.

¹⁹Na amparuwbo begu da a kwae no bɛhwe fam no, na wɔbɛbrɛ kurow no ase korakora.

²⁰Nhyira ne mo a mugu aba, asu nyinaa ho, na moma nantwi ne afurum nantew kwa.