Read Revised Akuapem Twi DC-KYERƐW KRONKRON Yesaia 36 Bible Online

Yesaia 36 - Revised Akuapem Twi DC-KYERƐW KRONKRON bible

Yesaia 36

¹ Na ɛbae sɛ ɔhene Hesekia afe a ɛto so dunan mu no, Asaria hene Senakerib tu baa Yuda nkurow a ɛyɛ den nyinaa so bɛfae.

²Na Asaria hene somaa Rabsake[5] no fii Lakis baa Yerusalem ɔhene Hesekia nkyɛn, na ɔde dɔm a emu yɛ duru bae; na obegyinaa atifi tare a ɛwɔ ɔtamahorofo asasewa tempɔn no so no suka ho.

³ Na Hilkia ba Eliakim a odi ofi no so ne ɔkyerɛwfo Sebna ne Asaf ba ɔsɛnkaefo Yoa, fii adi kɔɔ ne nkyɛn.

⁴ Na Rabsake ka kyerɛɛ wɔn sɛ: Monkɔka nkyerɛ Hesekia sɛ: Sɛ ɔhenkɛse, Asaria hene no se ni: Dɛn koraa na wode wo ho to so yi?

⁵Wususuw sɛ anosɛm nko yɛ akodi ho nyansa ne mmaninyɛ? Na afei, ɛhena so na wode wo ho to na wotew me so atua yi?

⁶Hwɛ, wode wo ho ato Misraim so, demmire a abu a sɛ obi tweri a, ɛwɔ ne nsam hwirew mu no: Saa na Misraim hene Farao te ma wɔn a wɔde wɔn ho to no so nyinaa.

⁷Na sɛ wuse me sɛ: AWURADE yɛn Nyankopɔn so na yɛde yɛn ho to a, so ɛnyɛ ɔno na Hesekia ayi ne sorɔnsorɔmmea ne n’afɔremuka, na waka akyerɛ Yuda ne Yerusalem sɛ: Afɔremuka yi anim na monsɔre, no?

⁸Na afei, wo ne me wura, Asaria hene, nto nkyia ɛ, na mɛma wo apɔnkɔ mpennu, kyerɛ sɛ wubetumi ama nnipa atenatena wɔn so anaa.

⁹Na nteaseɛnam ne apɔnkɔsotefo nti wode wo ho akɔto Misraim so yi, wobɛyɛ dɛn na woapam me wura nkoa nketewaa mu safohene biako?

¹⁰Na afei, so mekwatii AWURADE na mebaa asase yi so sɛ mebɛsɛe no anaa? AWURADE na ɔka kyerɛɛ me sɛ: Tu kɔ asase yi so kɔsɛe no.

¹¹Ɛnna Eliakim ne Sebna ne Yoa ka kyerɛɛ Rabsake no sɛ: Yɛsrɛ wo, wo ne wo nkoa nkasa Arameik kasa mu, na yɛn de, yɛte, na nkasa Yuda kasa nkyerɛ yɛn mma nkurɔfo a wɔboa ɔfasu so no nnte.

¹²Na Rabsake no se: Me wura asoma me wo ne wo wura ne mmarima a wɔtete ɔfasu yi so nkyɛn a wadome wɔn te sɛ mo, sɛ wonni wɔn ankasa sɛbew na wɔnnom wɔn dwensɔ sɛ mo ara?

¹³ Ɛnna Rabsake gyinae, na ɔde nne kɛse teɛɛm Yuda kasa mu sɛ: Muntie ɔhenkɛse, Asaria hene no, asɛm!

¹⁴Sɛ ɔhene se ni: Mommma Hesekia nnnyigye mo, na ɔrentumi nnye mo,

¹⁵nanso mommma Hesekia mmma mommfa mo ho nnto AWURADE so sɛ: Ogye ara na AWURADE begye yɛn, wɔremfa kurow yi nhyɛ Asaria hene nsa.

¹⁶ Munntie Hesekia! Na sɛ Asaria hene se ni: Mo ne me nni asomdwoesɛm, na mumfi mmra me nkyɛn; ɛno na mo mu biara bedi n’ankasa ne bobe ne n’ankasa ne borɔdɔma, na wanom n’abura mu nsu

¹⁷akosi sɛ mɛba mabɛfa mo makɔ asase a ɛte sɛ mo asase yi so, awi ne nsa asase, aduan ne bobe nturo asase.

¹⁸ Na mommma Hesekia nnto mo tɛkrɛmakyene sɛ: AWURADE begye yɛn: So amanaman anyame mu biara agye n’asase afi Asaria hene nsam?

¹⁹Ɛhe na Hamat ne Arpad anyame no wɔ? Ɛhe na Sefarwaim anyame no wɔ, so wɔagye Samaria afi me nsam?

²⁰Nsaase yi anyame nyinaa mu henanom na wɔagye wɔn asase afi me nsam, na AWURADE rebegye Yerusalem afi me nsam?

²¹Na wɔyɛɛ komm, na wɔammua no asɛm bi, efisɛ ɔhene asɛm a ɔhyɛe ne sɛ: Mummmua no!

²²Ɛnna Hilkia ba Eliakim a odi ofi no so no ne ɔkyerɛwfo Sebna ne Asaf ba ɔsɛnkaefo Yoa de wɔn ntade a wɔasunsuane mu baa Hesekia nkyɛn bɛkaa Rabsake nsɛm no kyerɛɛ no.