Read Revised Akuapem Twi DC-KYERƐW KRONKRON Yesaia 37 Bible Online

Yesaia 37 - Revised Akuapem Twi DC-KYERƐW KRONKRON bible

Yesaia 37

¹ Na ɔhene Hesekia tee no, osunsuanee ne ntade mu, na ofuraa atweatam, na osiim kɔɔ AWURADE fi.

²Na ɔsomaa Eliakim a odi ofi no so no ne ɔkyerɛwfo Sebna ne asɔfo no mu mpanyin a wofurafura ayitam kɔɔ Amos ba odiyifo Yesaia nkyɛn,

³na wɔkɔka kyerɛɛ no sɛ: Sɛ Hesekia se ni: Ahohia ne asotwe ne abususɛm da ne nnɛ, na mma adu awotwaa ano, na ahoɔden nni hɔ a wɔde bɛwo wɔn.

⁴Ebia AWURADE wo Nyankopɔn bɛte Rabsake a ne wura Asaria hene asoma no sɛ ɔmmɛsopa Onyankopɔn teasefo no nsɛm no, na nsɛm a AWURADE wo Nyankopɔn ate no nti, watwe n’aso; enti ma wo mpaebɔ so ma nkae a wɔwɔ hɔ no.

⁵Na ɔhene Hesekia nkoa no baa Yesaia nkyɛn,

⁶na Yesaia ka kyerɛɛ wɔn sɛ: Sɛ monka nkyerɛ mo wura ni: Sɛ AWURADE se ni: Nsuro nsɛm a wotee a Asaria hene nkoa de abɛyaw me no.

⁷Hwɛ, me na mede honhom bi mɛhyɛ ne mu, na wate asɛm bi, na wasan akɔ n’asase so, na mama watɔ nkrante ano, n’asase so.

⁸Na Rabsake sanee, na ɔkɔtoo Asaria hene sɛ ɔne Libna reko, na wate sɛ watu afi Lakis.

⁹Na ɔtee Etiopia hene Tirhaka nka sɛ: Watu ne wo rebɛko. Na ɔtee no, ɔsomaa abɔfo baa Hesekia nkyɛn sɛ:

¹⁰Sɛ monkɔka nkyerɛ Yuda hene Hesekia ni: Mma wo Nyankopɔn a wode wo ho to no so no nnnyigye wo sɛ: Wɔremfa Yerusalem nhyɛ Asaria hene nsa.

¹¹Hwɛ, wo ara woate nea Asaria ahene ayeyɛ nsaase nyinaa asɛe no pasaa no, na wo na wobeyi wo anaa?

¹² So amanaman a m’agyanom asɛe wɔn no anyame no gyee wɔn? Gosan ne Haran ne Resef ne Edenfo a wɔwɔ Telasar no?

¹³Ɛhe na Hamat hene ne Arpad hene ne Sefarwaim kurow ne Hena ne Iwa hene no wɔ?

¹⁴Na Hesekia gyee nhoma no abɔfo no nsam, na ɔkenkanee; na ɔforo kɔɔ AWURADE fi; na Hesekia trɛw mu, AWURADE anim.

¹⁵Na Hesekia bɔɔ AWURADE mpae sɛ:

¹⁶Asafo AWURADE, Israel Nyankopɔn a wote Kerubim so, wo nko ne Nyankopɔn, asase so ahenni nyinaa so; wo na woyɛɛ ɔsoro ne asase.

¹⁷Brɛ w’aso ase, AWURADE, na tie! Bue w’aniwa, AWURADE, na hwɛ! Na tie Senakerib nsɛm a wasoma de abɛsopa Onyankopɔn teasefo no nyinaa!

¹⁸Ɛwom, AWURADE, Asaria ahene asɛe aman no nyinaa ne wɔn nsaase,

¹⁹na wɔatotow wɔn anyame agu gya mu, efisɛ wɔnyɛ anyame, na ɛyɛ onipa nsa ano adwuma, dua ne ɔbo nko, na wɔasɛe wɔn.

²⁰ Na afei, AWURADE, yɛn Nyankopɔn, gye yɛn fi ne nsam, na asase so ahenni nyinaa nhu sɛ wone AWURADE, wo nkutoo korɛ.

²¹Ɛnna Amos ba Yesaia soma kɔɔ Hesekia nkyɛn sɛ: Sɛ AWURADE Israel Nyankopɔn se ni: Nea wobɔɔ me ɛho mpae, Asaria hene Senakerib ho no,

²²eyi ne asɛm a AWURADE aka ne ho: Ɔbaabun Sion babea no bu wo animtiaa yi wo ahii, w’akyi na Yerusalem babea rewosow ne ti.

²³Hena na woasopa no na woayaw no? Na hena so na woama wo nne so na woama w’ani atra wo ntɔn yi? Wode ahyɛ Israel kronkronni no.

²⁴ Wonam wo nkoa so asopa AWURADE aka sɛ: Mede me nteaseɛnam dodow maforo makɔ mmepɔw atifi, Lebanon mu noho tɔnn; na metwitwa ne nkyeneduru atenten ne ɔpopaw a ɛyɛ fɛ no agu, na makɔ makodu ne mmepɔw a ɛwɔ akyirikyiri no so, ne ne kwaebirentuw mu.

²⁵Me na matutu mmura manom mu nsu, na mede me nammɔn mu mayow Misraim nsubɔnten nyinaa.

²⁶So wontee sɛ mehyɛ metoo hɔ akyɛ, tete mmere mu na mehyehyɛɛ no saa? Afei na mama aba mu, sɛ ma nkurow a afasu atwa ho ahyia nnanan akurofo akuwakuw,

²⁷na emufo a wɔagurow no ho adwiriw wɔn na wɔn ani awu, na wɔadannan sɛ mfuwa so ahaban ne wura momono, adan atifi wura ne awi a ennya mmaa ne ho so na aguan.

²⁸Na minim w’asetena ne wo kɔree ne bae ne wo dam a wobɔ me so no.

²⁹ Esiane sɛ wobɔ me so dam na wo dwaebɔ aforo abedu m’asom nti, mede me kaa mɛhyɛ wo hwenem na mede me manniamfrɛ mato w’anom, na masan wo afa ɔkwan a wonam so bae no so akɔ.

³⁰Na eyi nyɛ wo sɛnkyerɛnne: Afe yi mu, munni ntwakae a efifii, na afe a ɛto so abien no mu moadi nea ebefifi akyiri aba no, na afe a ɛto so abiɛsa mu no, mungu na muntwa, na montɛw bobe nturo, na munni mu aba.

³¹ Na Yuda fi mu nkae a wɔafi mu afi no, wobegye ntini bio, na wɔasow aba;

³²na Yerusalem na nkae bi befi, na wɔn a wɔafi mu no afi Sion bepɔw so, asafo AWURADE ninkuntwe na ɛbɛyɛ eyi.

³³Enti sɛ AWURADE ka Asaria hene ho ni: Ɔremma kurow yi mu, na ɔrentow agyan mma ha, na ɔremfa ɔkyɛm mmehyia no, na ɔrenhɔre pempe nhyɛ no.

³⁴Ɔkwan a ɔnam so bae no so na ɔnam bɛsan akɔ, na kurow yi de, ɔrenhyɛn mu, AWURADE na ose.

³⁵Na mɛwaw kurow yi ani magye no, me ara ne m’akoa Dawid ntia.

³⁶ Ɛnna AWURADE bɔfo fi kokum Asaria nsra mu nnipa ɔpeha aduɔwɔtwe anum; na wɔsɔree anɔpa no, na hwɛ, wɔn nyinaa yɛ afunu.

³⁷Na Asaria hene Senakerib tu siim sanee, na ɔkɔtenaa Niniwe.

³⁸Na ɔresɔre wɔ ne nyame Nisrok fi no, ne mma Adramelek ne Sareser de nkrante kum no, na wofii mu guan kɔɔ Ararat asase so; na ne ba Esar-hadon sii n’ananmu dii hene.