Read Revised Akuapem Twi DC-KYERƐW KRONKRON Yesaia 39 Bible Online

Yesaia 39 - Revised Akuapem Twi DC-KYERƐW KRONKRON bible

Yesaia 39

¹ Ɛbere no mu no Babel hene Merodak-baladan a ɔyɛ Baladan ba somae ma wɔde nhoma ne ayɛyɛde brɛɛ Hesekia, efisɛ ɔtee sɛ ɔyaree na ne ho ayɛ no den.

²Na Hesekia nyaa wɔn ho anigye, na ɔkyerɛɛ wɔn n’akoradedan, dwetɛ ne sika ne nnuhuam ne ngo pa ne n’akodedan nyinaa ne nea wohu n’akoradedan mu nyinaa; biribi nni ne fi ne nea odi so nyinaa mu a Hesekia amfa ankyerɛ wɔn.

³Ɛnna odiyifo Yesaia baa ɔhene Hesekia nkyɛn bɛka kyerɛɛ no sɛ: Nnipa yi se dɛn, na ɛhe na wofi baa wo nkyɛn yi? Na Hesekia se: Wofi akyirikyiri asase bi so na wɔbaa me nkyɛn, wofi Babel.

⁴Na ɔkae sɛ: Dɛn na wɔahu wɔ wo fi? Na Hesekia se: Nea ɛwɔ me fi nyinaa, wɔahu, biribi nni m’adekora adan mu a mamfa mankyerɛ wɔn.

⁵Ɛnna Yesaia ka kyerɛɛ Hesekia sɛ: Tie asafo AWURADE asɛm:

⁶Hwɛ, nna bi reba a wɔbɛsoa nea ɛwɔ wo fi nyinaa ne nea w’agyanom akora de abedu nnɛ yi akɔ Babel; biribiara renka, AWURADE na ose.

⁷Na wo ankasa wo mma a wobɛwo wɔn no mu binom, wɔbɛfa wɔn na wɔakɔyɛ Babel hene aban mu mpiadifo.

⁸Ɛnna Hesekia ka kyerɛɛ Yesaia sɛ: AWURADE asɛm a woaka no, eye. Efisɛ ose: Ɛnne na asomdwoe ne ɔmannwoe bɛba me bere so.