Read Revised Akuapem Twi DC-KYERƐW KRONKRON Yesaia 41 Bible Online

Yesaia 41 - Revised Akuapem Twi DC-KYERƐW KRONKRON bible

Yesaia 41

¹O Mpoano aman, monyɛ komm ntie me, na aman nhyɛ wɔn ho den foforo. Ma wɔmmra mmɛkasa, momma yɛmmom nhyia asennii ntie atemmu.

² Hena na onyan nea ofi apuei no a trenee hyia no, baabiara a ɔnam no? Ɔde amanaman gu n’anim, na ɔde ahene hyɛ n’ase. N’afoa ma wɔyɛ sɛ otutuw, ne ta yɛ wɔn sɛ ntɛtɛwa a ɛbɔ gu.

³Otiw wɔn na otwam sɔnn sɔnn, ɔkwan a ne nan nsii so da so.

⁴ Hena na ɔyɛe, na ɔma ɛbae, na ɔfrɛ awo ntoatoaso fi mfiase? Me AWURADE na midi kan, na akyikafo mu nso mene ɔno ara.

⁵Mpoano aman hui, na wosuroe, asase awiei ho popoe. Wɔbɛnee na wɔbae.

⁶Oyi boa ne yɔnko, na oyi ka kyerɛ ne nua sɛ: Hyɛ wo ho den!

⁷Odwumfo hyɛ sikadwumfo den, nea ɔde asae toromtorom ho yɛ nea ɔbɔ atommo so saa ara, ɔka wɔ ɔsɔ no ho sɛ: Ayɛ yiye, na ɔde nnadewa bobɔ mu, na antu.

⁸ Na wo, m’akoa Israel, Yakob a mapaw no, me dɔfo Abraham asefo!

⁹Wo a maso wo mu afi asase ano na mafrɛ wo afi n’ahye so aba, na maka makyerɛ wo sɛ: M’akoa ne wo, mapaw wo, na merentow wo menkyene!

¹⁰ Nsuro, na me ne wo wɔ hɔ, mma wo bo nntu, na mene wo Nyankopɔn. Mɛhyɛ wo den, nso mɛboa wo, nso mede me trenee nifa mikura wo mu.

¹¹Hwɛ, wɔn a wɔn bo ahuru wo nyinaa ani bewu na wɔasopa, na nnipa a wɔne wo anya no bɛyɛ sɛ wɔnyɛ hwee, na wɔayera.

¹²Wobɛhwehwɛ wɔn a wɔne wo ham no nanso worenhu wɔn; na wɔn a wɔne wo adi ako no bɛyɛ sɛ wɔnyɛ hwee, na wɔasa.

¹³Na me, AWURADE wo Nyankopɔn, mikura wo nifa mu; me na mise wo sɛ: Nsuro, me ara mɛboa wo!

¹⁴ Nsuro, aboawa Yakob, ne mo Israel mma! Me ara mɛboa wo, AWURADE na ɔkae, na wo gyefo ne Israel kronkronni no.

¹⁵Hwɛ, mede wo mɛyɛ ɔporow afiri nnamnam foforo anofanu, na woaporow mmepɔw ayam no dukuduku, na woayɛ nkoko sɛ ntɛtɛwa.

¹⁶Wubehuw so na mframa asoa akɔ na ahum abɔ apete; na wo de, wubedi AWURADE mu ahurusi de Israel kronkronni no ahyehye wo ho.

¹⁷Mmɔborɔfo ne ahiafo a wɔhwehwɛ nsu na ebi nni hɔ a osukɔm nti wɔn tɛkrɛma so awo no, me, AWURADE, megye wɔn so, me, Israel Nyankopɔn, merennyaw wɔn.

¹⁸ Metue mpampa peredee so nsuwansuwa ne abon mu nsuaniwa; mede sare so mɛyɛ ɔtare, na mede asase kesee mayɛ asuti;

¹⁹mɛma sare so aba nkyeneduru, ɔkanto, ohuamma ne ngo nnua; mɛma ɔpopaw, asɛsɛ ne kwabɔhɔrɔ abom asisi sare so,

²⁰sɛ nnipa nhu nte ase mfa nsie koma mu na wonnwen ho prɛko sɛ: AWURADE nsa na ɛyɛɛ eyinom, na Israel kronkronni no na ɔbɔe.

²¹Mommɛka mo nsɛm, AWURADE na ose, mommɛkyerɛ mo nsɛm ase, Yakob hene na ose.

²² Wɔmfa mmra mmɛkyerɛ yɛn nea ɛbɛba. Monkyerɛ yɛn kan nneɛma no, sɛ ɛte, na yennwen ho nhu n’awiei, anaa nea ɛbɛba no, momma yɛnte.

²³Monka yɛn nea ɛbɛba daakye no na yenhu sɛ anyame ne mo; yiw, monyɛ papa anaa bɔne, na yɛn ho nnwiriw yɛn na yensuro.

²⁴Hwɛ, monyɛ hwee, na mo nneyɛe yɛ adehuhuw; akyide ne nea ɔfa mo.

²⁵Mahwanyan obi afi atifi fam ma waba, awiapuebea na obefi abɔ me din; na ɔbɛba amradofo so sɛ anwemmo so, na ɔte sɛ ɔnwemfo a ɔwɔw dɔte.

²⁶Hena na ofi mfiase kae, na anka yenhu, anaasɛ waka ato hɔ, na yɛnka sɛ: Ɔyɛ ɔnokwafo!? Ampa, nea ɔkae nni hɔ nea ɔma wɔtee nni hɔ, nea ɔtee mo nsɛm nni hɔ.

²⁷ Me na midii kan meka mekyerɛɛ Sion sɛ: Hwɛ, woni: Na Yerusalem na memaa no ɔsɛmpakafo.

²⁸Na mehwɛe, na obi nni hɔ, na wɔn mu nso, ɔfotufo bi nni hɔ a mibisa a, anka obebua me.

²⁹ Hwɛ, wɔn nyinaa yɛ ɔkwa, wɔn nneyɛe nyɛ hwee; wɔn gu ahoni yɛ mframa ne ahuhude.