Read Revised Akuapem Twi DC-KYERƐW KRONKRON Yesaia 54 Bible Online

Yesaia 54 - Revised Akuapem Twi DC-KYERƐW KRONKRON bible

Yesaia 54

¹ To dwom, wo bonin a woanwo; to anigye dwom na fa ahosan teɛm, wo a wonkyem mma ɛ! Na onnibie mma bɛdɔɔso asen nea ɔwɔ okunu mma, AWURADE na ose.

²Ma wo ntamadan mu ntrɛw, na wɔntwe wo tenabea mmɔhɔɔ no mu, nkyɛe biara so. Ma wo ntampehama nware, na ma wo mmofunnua ntintim.

³Na wobɛtrɛw akɔ nifa ne benkum, na w’asefo afa amanaman no, na woama wɔatenatena nkurofo no so.

⁴ Nsuro, na w’ani renwu, nsi wo ti ase, na w’anim renkisa, na wo werɛ befi wo mmabaabere mu aniwu, na wo kunayɛ ahohora no, worenkae bio.

⁵ Na wo yɛfo ne wo kunu, asafo AWURADE ne ne din, na wo dimafo, ne Israel kronkronni no, wɔfrɛ no asase nyinaa Nyankopɔn.

⁶ Na AWURADE afrɛ wo sɛ ɔbea a wɔagyaw no na ɔredi honhom mu yaw, sɛ mmerantebere mu yere a wɔapa no, wo Nyankopɔn na ose.

⁷ Migyaw wo kakraa bi ketewa sɛ, nanso ayamhyehye kɛse na mede mɛboa w’ano.

⁸ Abufuw mmoroso mu na mede m’ani mihintaw wo kakraa bi, nanso mede daa adɔe mehu wo mmɔbɔ, wo dimafo AWURADE na ose.

⁹ Na eyi yɛ me sɛ Noa nna no: Sɛnea mekaa ntam sɛ Noa nsu no mmfa asase so bio no, saa ara nso na maka ntam sɛ me bo remfuw wo na merenteɛteɛ wo bio.

¹⁰ Na mmepɔw betwiw akɔ na nkoko atutu, na m’adɔe de, ɛrentwe mfi wo so, na m’asomdwoe apam no rentutu, AWURADE a ne yam hyehye no ma wo no na ose.

¹¹O Mmɔboroni a ahum bɔɔ wo a wɔnkyekyee wo werɛ ɛ, hwɛ, me ara mede w’abo mɛtoto ntɔnkadubiri mu, na mede hoa abo mato wo nhyɛase,

¹² na mede bogya abo mayeyɛ w’abantifi, na mede nsramma abo mayɛ w’aponkɛse, ne wo nkurotia mu nyinaa abo afɛfɛ.

¹³ Na wo mma nyinaa bɛyɛ AWURADE asuafo, na wo mma asomdwoe bɛdɔɔso.

¹⁴Trenee mu na w’ase betim; wo ne nhyɛso ntam bɛpan, na worensuro, na wo ne ahude nso ntam bɛpan, na ɛremmɛn wo.

¹⁵ Hwɛ, wɔpɛ wo atutuw, nso emfi me; nea osua wo so no, wo nti ɔbɛhwe ase.

¹⁶Hwɛ, me na mebɔɔ ɔtomfo a ohuw gyabiriw mu, na ɔbɔ akode sɛ ne dwuma te, na me ara na mebɔɔ ɔsɛefo sɛ ɔnsɛe.

¹⁷Akode biara a wɔbɔ tia wo no renyɛ yiye, na tɛkrɛma biara a ɛbɛsɔre ne wo ayi ntɛn no, wobebu no fɔ; ɛno ne AWURADE nkoa agyapade ne wɔn trenee a efi me no, AWURADE asɛm ni.