Read Revised Akuapem Twi DC-KYERƐW KRONKRON Yesaia 55 Bible Online

Yesaia 55 - Revised Akuapem Twi DC-KYERƐW KRONKRON bible

Yesaia 55

¹ Mommra o, mo a osukɔm de mo nyinaa, mommra nsu ho, na mo a munni sika no mommra mmɛtɔ, na munni. Mommra mmɛtɔ nsa ne nufusu; ɛnyɛ sika na wɔde tɔ, na enni bo nso.

²Ɛdɛn na mokari sika gye nea ɛnyɛ aduan, ne mo brɛ so ade gye nea ɛmmee mo? Muntie me ɛ, munni nnepa, na sradeduan nyɛ mo kra dɛ.

³ Monyɛ aso ɛ, na mommra me nkyɛn, muntie, na mo kra nnya nkwa. Na me ne mo bɛpam daa apam: Dawid adɔeyɛde a esi hɔ pintinn no.

⁴Hwɛ, mede no mayɛ aman dansefo, aman safohene ne mmarahyɛfo.

⁵Hwɛ, wobɛfrɛ ɔman a wunnim wɔn aba, na ɔman a wonnim wo no de mmirika bɛba wo nkyɛn, AWURADE wo Nyankopɔn, Israel kronkronni no nti, efisɛ wahyɛ wo anuonyam.

⁶ Monhwehwɛ AWURADE, bere a ɔma wohu no no, momfrɛ no bere a ɔbɛn no.

⁷ Ma ɔbɔne nnyaw ne kwan na onipa huhuw mpa n’adwene, ma wɔnsan mmra AWURADE nkyɛn na ne yam bɛhyehye no ama wɔn, ne yɛn Nyankopɔn no nkyɛn, na ne kyɛ a ɔde bɛkyɛ dɔɔso.

⁸Na ɛnyɛ m’adwene ne mo adwene na ɛnyɛ mo akwan ne m’akwan, AWURADE asɛm ni;

⁹ na sɛ ɔsoro korɔn sen asase no, saa ara na m’akwan korɔn sen mo akwan, na m’adwene nso sen mo adwene.

¹⁰Na sɛnea osu ne sukyerɛma fi soro gu fam na ɛnsan nkɔ hɔ bio, gye sɛ ɛfɔw asase ansa ma ɛba aduan na ɛsow aba, na ɛde aba ma ogufo ne aduan ma odifo no,

¹¹ saa ara na m’asɛm a efi m’anom bɛyɛ; ɛrensan mma me nkyɛn kwa, gye sɛ ɛyɛ nea mepɛ na ewie nea enti a mesomae no.

¹² Na anigye na mode befi akɔ, na wɔde asomdwoe agya mo kwan; mo nti mmepɔw ne nkoko bɛto anigye dwom prɛko pɛ, na wuram nnua nyinaa abobɔ wɔn nsam.

¹³Ɔpopaw befifi asi nsɔe ananmu, na ohuannua befifi akraate ananmu; na ɛbɛyɛ din ama AWURADE ne daa sɛnkyerɛnne a wɔrentwa nkyene.