Read Revised Akuapem Twi DC-KYERƐW KRONKRON Yesaia 63 Bible Online

Yesaia 63 - Revised Akuapem Twi DC-KYERƐW KRONKRON bible

Yesaia 63

¹ Hena ne oyi a ofi Edom reba, nea ne ntade bere kɔɔ a ofi Bosra reba yi? Oyi a wahoman, n’adurade mu, na ɔkyea, ne tumi kɛse mu yi? Ɛyɛ me a mekasa de ahosan akyerɛ otumfo a mikura nkwagye no.

² Ɛdɛn na w’adurade bere sɛɛ, na wo ntade te sɛ nsa-kyi-amoa mu tiatiafo de yi?

³ Nsa-kyi-amoa no, me nko na matiatia mu, na aman sofo mu biara nka me ho; na mitiatiaa wɔn so m’abufuw mu, na mewɔw wɔn m’abufuhyew mu, na wɔn mu nsu abɔ apete me ntade mu, na akeka m’adurade nyinaa mu.

⁴ Na aweredi da bi wɔ me koma mu, na me gye afe no aba.

⁵ Na mehwɛe, nso na ɔboafo bi nni hɔ; na ɛyɛɛ me nwonwa sɛ obi nni hɔ a oso mu abia; ɛnna m’ankasa basa gyee me, na m’abufuhyew nso soo me mu abia.

⁶ Na mitiatiaa aman so, m’abufuw mu, na mema wɔbobowee, m’abufuhyew mu, na mihwiee wɔn mogya miguu asase so.

⁷Mɛbɔ AWURADE adɔeyɛ din, AWURADE ayeyide no, sɛ ɛfata nea AWURADE ne yɛn adi no nyinaa, na maka Israel fi yiye pii a ɔde ayɛ wɔn no, sɛ n’ayamhyehye ne n’adɔeyɛde dodow no te no.

⁸ Na ose: Me man ara ne wɔn, mma a wɔrenni atoro, na ɔyɛɛ wɔn agyenkwa.

⁹ Wɔn ahohia nyinaa mu no, ne ho hiaa no, na n’anim bɔfo no gyee wɔn; ne dɔ ne ne nkyɛeso mu na ogyee wɔn, na ɔmomaa wɔn so, na ɔsoaa wɔn tete nna no nyinaa mu.

¹⁰Na wɔn de, wɔtew atua na wɔhyɛɛ ne honhom kronkron no yaw, enti ɔdan wɔn ɔtamfo, na ɔno ara ne wɔn dii dɔm.

¹¹ Ɛnna ne man kaee Mose tete nna no sɛ: Ɛhe na nea oyii wɔn ne ne nguankuw ahwɛfo no fii po mu no wɔ? Ɛhe na nea ɔde ne kronkronyɛ honhom sii wɔn mu no wɔ?

¹²Nea ɔmaa n’anuonyam basa no dii Mose nifa, nea ɔpaee nsu mu, wɔn anim de gyee daa din fae no?

¹³Nea ɔma wɔfaa ebun mu sɛ ɔpɔnkɔ fa anwea so na wɔanwatiri no?

¹⁴AWURADE honhom ma wɔhomee sɛ mmoa a wosian kɔ obon mu. Saa na wokyerɛɛ wo man kwan de gyee anuonyam din fae.

¹⁵Brɛ w’ani ase fi soro, na fi wo kronkronyɛ ne w’anuonyam tenabea hɔ hwɛ. Ɛhe na wo ninkuntwe ne wo mmaninne no wɔ? W’ayamhyehye ne wo mmɔborohunu afi me ho.

¹⁶ Na wo ara wone yɛn agya; na Abraham nnim yɛn, na Israel nhu yɛn: Wo, AWURADE ara ne yɛn agya, yɛn gyefo ne wo din fi tete bemee.

¹⁷O AWURADE, ɛdɛn nti na woma yefi wo kwan so kɔwɔ ntwɛtwɛdɛ, na wupirim yɛn koma na yɛansuro wo? San bra, wo nkoa nti, w’agyapade mmusuakuw no nti.

¹⁸ Wo man kronkron kuraa wo kronkronbea no kakraa bi; yɛn ahohiafo atiatia so.

¹⁹Yɛadannan sɛ wɔn a wunnii wɔn so da; sɛ wɔn a wɔmmɔɔ wo din wɔ wɔn so da.