Read Revised Akuapem Twi DC-KYERƐW KRONKRON Lewitikɔs 1 Bible Online

Lewitikɔs 1 - Revised Akuapem Twi DC-KYERƐW KRONKRON bible

Lewitikɔs 1

¹Na AWURADE frɛɛ Mose, na ofi ahyiae ntamadan no mu kasa kyerɛɛ no sɛ:

²Kasa kyerɛ Israelfo, na ka kyerɛ wɔn sɛ: Sɛ mo mu bi de ayɛyɛde rebrɛ AWURADE a, afieboa a ofi anantwi ne nguan mu na momfa nyɛ mo ayɛyɛde mmra.

³ Sɛ n'ayɛyɛde no yɛ ɔhyew afɔre a efi anantwi mu a, ɔmfa onini a odi mu mmra; ahyiae ntamadan no ano na ɔmfa no mmra, na wasɔ AWURADE ani.

⁴ Na ɔmfa ne nsa nto ɔhyew afɔre no atifi, na ɛnsɔ ani mma no na ɛmpata mma no.

⁵Na onkum nantwi ba no, AWURADE anim, na Aaron mma, asɔfo no, mfa mogya no mmra, na wɔmfa mpete afɔremuka a ɛwɔ ahyiae ntamadan no ano no so nhyia.

⁶Na ongua ɔhyew afɔre no nhoma, na ontwitwa no asinasin.

⁷Na ɔsɔfo Aaron mma no nsiesie mmabaa wɔ afɔremuka no so na wɔnsɔ ano.

⁸Na Aaron mma, asɔfo no, mfa asinasin no, botiri no ne srade no ngu afɔremuka gya no so.

⁹ Na ɔnhohoro n'ayamde ne ne nnyawa ho wɔ nsu mu; na ɔsɔfo no nhyew ne nyinaa afɔremuka no so, na ɛnyɛ ɔhyew afɔre, ogya afɔre a eyi hua huamhuam ma AWURADE.

¹⁰Na sɛ n'ayɛyɛde no fi nguan mu, nguanten anaa mmirekyi mu, na ɔde rekɔbɔ ɔhyew afɔre a, onini a odi mu na ɔmfa mmra.

¹¹Na onkum no afɔremuka no nkyɛn mu atifi fam, AWURADE anim, na Aaron mma, asɔfo no, mfa ne mogya mpete afɔremuka no so nhyia.

¹²Na ontwitwa n'asinasin no mu, ɛne ne ti ne ne srade nyinaa, na ɔsɔfo no nsiesie ngu afɔremuka no so gya no so.

¹³Na ayamde ne nnyawa no, ɔmfa nsu nhohoro ho; na ɔsɔfo no mfa ne nyinaa mmra mmɛhyew afɔremuka no so; ɛyɛ ɔhyew afɔre, ogya afɔre a eyi hua huamhuam ma AWURADE.

¹⁴Na sɛ n'ayɛyɛde no fi ntakraboa mu na ɔde rebɛbɔ ɔhyew afɔre ama AWURADE a, ɔmfa nturukuku anaa mmorɔnoma mma nyɛ n'ayɛyɛde mmra.

¹⁵Na ɔsɔfo no mfa mmra afɔremuka no ho, na ɔntew ne ti, na ɔnhyew afɔremuka no so, na wonkyi ne mogya ngu afɔremuka no ho.

¹⁶Na onyi ne mene ase ne nea ɛwɔ mu ntow nkyene afɔremuka no nkyɛn apuei fam, nea nso gu hɔ.

¹⁷Na onsuan ne mu, ne ntaban ho, nanso ɔnntew mu, na ɔsɔfo no nhyew wɔ afɔremuka no so, wɔ ogya no so, ɛyɛ ɔhyew afɔre, ogya afɔre a eyi hua huamhuam ma AWURADE.