Read Revised Akuapem Twi DC-KYERƐW KRONKRON Lewitikɔs 13 Bible Online

Lewitikɔs 13 - Revised Akuapem Twi DC-KYERƐW KRONKRON bible

Lewitikɔs 13

¹ Na AWURADE kasa kyerɛɛ Mose ne Aaron sɛ:

²Sɛ biribi ba onipa honam were mu, sɛ ɔsoa oo, ntwintwamee oo, atape oo, na edidi ne honam were mu yɛ kwata ntotowee a, wɔmfa no mmrɛ ɔsɔfo Aaron anaa ne mma, asɔfo no mu biako.

³ Na sɛ ɔsɔfo no hwɛ ɔhonam were mu ntotowee no, na ntotowee no so nwi adan fitaa, na ntotowee no atotɔ mu asen ne honam were no a, ɛyɛ kwata ntotowee; na ɔsɔfo no hwɛ no a, ommu no nea ne ho ntew.

⁴Na sɛ ɛyɛ ne honam were mu atape fitaa, na sɛ wɔhwɛ na ɛntotɔɔ mu nsen ne were no, na ɛso nwi nnan fitaa a, ɛnne ɔsɔfo no nto ɔyarefo no mu nnansɔn.

⁵Na ɛda a ɛto so ason no, ɔsɔfo no nhwɛ, na sɛ ohu sɛ ntotowee no te nea ɛte na ɛnyerɛwee ne were mu a, ɔsɔfo no nto no mu nnansɔn bio.

⁶Na sɛ ɔsɔfo no hwɛ no da a ɛto so ason no bio, na sɛ ntotowee no ani adum na ɛntrɛwee ne were mu a, ɔsɔfo no mmu no sɛnea ne ho tew, ɛyɛ ntwintwamee; na ɔnhoro n'atade na ne ho ntew.

⁷Nanso ɔde ne ho akɔkyerɛ ɔsɔfo wɔ n'ahotew ho no akyi no, ntwintwamee no yerɛw ne were mu a, wɔmma ɔsɔfo no nhwɛ no bio;

⁸na sɛ ɔsɔfo no hwɛ, na hwɛ, ntwintwamee no ayerɛw were no mu a, ɔsɔfo no mmu no nea ne ho ntew; ɛyɛ kwata.

⁹Sɛ kwata ntotowee wɔ onipa bi ho a, wɔmfa no mmrɛ ɔsɔfo no.

¹⁰Na sɛ ɔsɔfo no hwɛ, na hwɛ, ɔsoa fitaa bi wɔ were no mu a adan nwi no fitaa, na anammono repuw nsoae no mu a,

¹¹ɛyɛ kwata dedaw a ɛwɔ ne honam were mu, na ɔsɔfo no mmu no sɛ ne ho ntew; ɔnnto no mu; na ne ho ntew.

¹²Na sɛ kwata no apue afi were mu akata ɔyarefo no honam nyinaa fi n'atifi kosi ne nan ase, baabiara a ɔsɔfo no aniwa bɛhwɛ,

¹³na ɔsɔfo no hwɛ, na hwɛ, kwata no akata ne honam nyinaa so a, ommu ɔyarefo no sɛ ne ho tew; ne ho nyinaa adan fitaa a, ne ho tew.

¹⁴Nanso bere biara a wobehu ne ho anammono no no, ne ho ntew.

¹⁵Na sɛ ɔsɔfo no hwɛ anammono no a, ommu no nea ne ho ntew; anammono no ho ntew, ɛyɛ kwata.

¹⁶Na sɛ anammono no san dan fitaa, na ɔba ɔsɔfo no nkyɛn,

¹⁷na ɔsɔfo no hwɛ, na sɛ ntotowee no adan fitaa a, ɛnne, ɔsɔfo no mmu no nea ne ho tew; ne ho atew.

¹⁸Sɛ pobia si obi honam were mu na ewu,

¹⁹na ɔsoa fitaa bi anaa atape fitaa a ɛbere ba pobia no ananmu a, wɔmma ɔsɔfo no nhwɛ.

²⁰Na sɛ ɔsɔfo no hwɛ, na sɛ ɛhɔ atotɔ mu asen were no na emu nwi adan fitaa a, ɔsɔfo no mmu no nea ne ho ntew; ɛyɛ kwata ntotowee, apue wɔ pobia no mu.

²¹Na sɛ ɔsɔfo no hwɛ, na sɛ nwi fitaa bi nni mu, na ɛntotɔɔ mu nsen were no na ani dum a, ɔsɔfo no nto no mu nnansɔn;

²²na sɛ ɛyerɛw were no mu a, ɔsɔfo no mmu no nea ne ho ntew: ɛyɛ ntotowee.

²³ Na sɛ atape no te nea ɛte na ɛnyerɛwee a, ɛyɛ pobia no bon, na ɔsɔfo no mmu no nea ne ho tew.

²⁴Anaasɛ ogya kuru bi ba ɔhonam were no mu, na kuru no so bon puduw yɛ atape a ɛhoa fitaa na emu gyigye anaasɛ ɛhoa fitaa,

²⁵na sɛ ɔsɔfo no hwɛ, na sɛ atape no mu nwi adan fitaa na wɔhwɛ a atotɔ mu asen were no a, ɛyɛ kwata, na apue ogya kuru no mu, na ɔsɔfo no mmu no nea ne ho ntew, ɛyɛ kwata ntotowee.

²⁶Na sɛ ɔsɔfo no hwɛ, na sɛ nwi fitaa nni atape no mu, na ɛntotɔɔ mu nsen were no, na ani dum a, ɔsɔfo no nto no mu nnansɔn.

²⁷Na da a ɛto so ason no, ɔsɔfo no hu sɛ ayerɛw were no mu a, ɔsɔfo no mmu no nea ne ho ntew: ɛyɛ kwata ntotowee.

²⁸ Na sɛ atape no te nea ɛte na ɛnyerɛwee were no mu na ani dum a, ɛyɛ ɔsoa a ogya kuru no asoa, na ɔsɔfo no mmu no nea ne ho tew; na ɛyɛ ogya kuru no bon.

²⁹Na ɔbarima anaa ɔbea bi, sɛ biribi tɔ n'atifi anaa ne bogyesɛ mu,

³⁰na ɔsɔfo no hwɛ ntotowee no, na sɛ atɔ mu asen were no, na nwi kɔkɔɔ nhweanhweaa wɔ mu a, ɔsɔfo no mmu no sɛnea ne ho ntew; ɛyɛ ntutui, ɛyɛ eti anaa bogyesɛ mu kwata.

³¹Na ɔsɔfo no hwɛ ntutui ntotowee no, na sɛ ɛhɔ ntɔɔ mu nsen were no, na nwi tuntum nso nni mu a, ɔsɔfo no nto nea ntutui atotow no no mu nnansɔn.

³²Na sɛ ɔsɔfo no hwɛ ɔyarefo no da a ɛto so ason no, na sɛ ntutui no nyerɛwee na nwi kɔkɔɔ mmaa mu, na ntutui no ntɔɔ mu nsen were no a,

³³onyi ne ho nwi na onnyi ntutui no so, na ɔsɔfo no nto nea ntutui ayɛ no no mu nnansɔn bio.

³⁴Na sɛ ɔsɔfo no hu ntutui no da a ɛto so ason no, na sɛ ntutui no nyerɛwee were no mu na ɛhɔ ntɔɔ mu nsen were no a, ɛnne, ɔsɔfo no mmu no nea ne ho tew; na ɔnhoro ne ntade na ne ho atew.

³⁵Na sɛ ɛno akyi ntutui no yerɛw,

³⁶na ɔsɔfo no hwɛ no, na sɛ ntutui no ayerɛw were no mu a, ɔsɔfo no nnhwehwɛ nwi kɔkɔɔ no; ne ho ntew.

³⁷Na sɛ ohu ntutui no sɛ ɛte nea ɛte na nwi tuntum afuw mu a, na ntutui no awu; ne ho tew, na ɔsɔfo no mmu no nea ne ho tew.

³⁸Na ɔbarima anaa ɔbea, sɛ atape fitaa ba wɔn honam were mu,

³⁹na ɔsɔfo no hwɛ, na sɛ atape a ani dum fitaa wɔ wɔn honam were mu a, ɛyɛ yam a ayerɛw were mu; ne ho tew.

⁴⁰Na sɛ ɔbarima bi ti pa a, ɔyɛ tipae; ne ho tew.

⁴¹Na sɛ ne mpampam anim fam na apa a, ɔyɛ tipae; ne ho tew.

⁴²Na sɛ biribi fitaa a ɛbere tow ne tipae no mu anaasɛ ne mpampam pae no mu a, ɛyɛ kwata a ɛrepue ne tipae anaa ne mpampam pae no mu.

⁴³Na sɛ ɔsɔfo no hwɛ, na sɛ ntotowee fitaa a ɛbere asoa ne tipae no anaa ne mpampam pae no mu a ɛte sɛ ɔhonam were mu kwata a,

⁴⁴ɔyɛ ɔkwatani; ne ho ntew; obu na ɔsɔfo no mmu no nea ne ho ntew; ne ti so na ne ntotowee no wɔ.

⁴⁵Na ɔkwatani a ɔyare no wɔ ne ho no nsunsuane ne ntade mu, na ɔmpɛsɛw ne ti, na ɔnkata n'ano, na ɔnteɛm sɛ: Me ho ntew, me ho ntew!

⁴⁶ Nna dodow a ɔyare no wɔ ne ho no, ɔtew na ne ho ntew; ne nko na ɔntena, na nsra no akyi na ɔntena.

⁴⁷Na sɛ kwata ntotowee wɔ atade bi mu, sɛ ɛwɔ okuntutam anaa asaawatam,

⁴⁸anaa nsa anaa mfa a wɔde nwene asaawatam anaa kuntutam anaa nhoma anaa ade biara a wɔde nhoma ayɛ mu,

⁴⁹na sɛ ntotowee no biri anaasɛ ɛbere ntama anaa nhoma no anaa nsa anaa mfa no anaa ade biara a wɔde nhoma ayɛ mu a, ɛyɛ kwata ntotowee, wɔmma ɔsɔfo no nhwɛ.

⁵⁰Na sɛ ɔsɔfo no hwɛ ntotowee no a, ɔnto ade a ntotowee no wom no mu nnansɔn.

⁵¹Na ɛda a ɛto so ason no, ohu sɛ ntotowee no ayerɛw atade no anaa nsa anaa mfa anaa nhoma no anaa biribiara a wɔde nhoma ayɛ no mu a, na ntotowee no yɛ kwata a ɛsɛe ade; ɛho ntew.

⁵²Na ɔnhyew ntama no, sɛ nsa no anaa mfa no oo, anaa kuntu anaa asaawa anaa nhoma ade biara mu na ntotowee no wɔ oo, efisɛ ɛyɛ kwata a ɛsɛe ade.

⁵³Na sɛ ɔsɔfo no hwɛ, na sɛ ntotowee no ntrɛwee atade no mu wɔ nsa anaa mfa anaa nhoma ade biara mu a,

⁵⁴ɔsɔfo no nhyɛ na wɔnhoro ade a ntotowee no wɔ mu no, na ɔnto mu nnansɔn bio.

⁵⁵Na ntotowee no horo akyi no ɔsɔfo no hwɛ, na sɛ ntotowee no ani nsakrae na ɛnyerɛwee nso a, ɛho ntew, wɔmfa ogya nhyew; ani akukuw oo, akyi akukuw oo, ɛyɛ nwewee.

⁵⁶Na sɛ ne horo akyi no ɔsɔfo no hwɛ, na sɛ ntotowee no ani dum a, ɔntew mfi ntama no anaa nsa anaa mfa no mu.

⁵⁷Na sɛ wohu bio, ntama no mu, wɔ nsa anaa mfa anaa nhoma ade biara mu a, ɛyɛ kwata a ɛrepue, wɔmfa ogya nhyew nea ntotowee no wɔ mu no.

⁵⁸Na ntama no, mfa anaa nsa anaa nhoma ade biara a wobɛhoro na ntotowee no befi mu no, wɔnhoro bio na ɛho atew.

⁵⁹Eyi ne mmara a ɛda hɔ ma kwata ntotowee, kuntutam anaa asaawatam anaa nsa anaa mfa anaa nhoma ade biara mu, na wɔde abu no ade a ɛho tew anaa ade a ɛho ntew.