Read Revised Akuapem Twi DC-KYERƐW KRONKRON Lewitikɔs 14 Bible Online

Lewitikɔs 14 - Revised Akuapem Twi DC-KYERƐW KRONKRON bible

Lewitikɔs 14

² Eyi ne mmara a ɛda hɔ ma ɔkwatani, ɛda a wobu no sɛ ne ho atew no. Wɔmfa no mmrɛ ɔsɔfo no,

³na ɔsɔfo no mfi adi nkɔ nsra no akyi; na sɛ ɔsɔfo no hwɛ, na sɛ kwata ntotowee no asa ɔkwatani no ho a,

⁴ɔsɔfo no nhyɛ mma wɔmfa nnomaa a wɔn ho tew abien animono ne kyeneduru dua ne adidi ne adwerɛ mma nea wɔbɛtew ne ho no mmra.

⁵Na ɔsɔfo no nhyɛ mma wonkum nnomaa no mu biako, asanka bi mu, mmasu so.

⁶Na anomaa nikanfo no de, ɔmfa no ne kyeneduru dua no ne adidi ne adwerɛ no, na ɔmfa ne nyinaa ne anomaa nikanfo no mmɔ anomaa a wɔakum no mmasu so no mogya mu,

⁷ na ɔmfa mpete nea abɛtew ne ho afi ne kwata ho no so mpɛn asɔn, na ɔntew ne ho, na onnyaa anomaa nikanfo no mma ɔnkɔ wuram.

⁸ Na nea wɔatew ne ho no nhoro ne ntade na onyi ne nwi nyinaa koraa, na ɔmfa nsu nguare na ne ho atew; na ɛno akyi no, ɔmmra nsra no mu, nanso ɔntena ne ntamadan akyi nnansɔn.

⁹Na da a ɛto so ason no, onyi ne ho nwi nyinaa, ne ti ne ne bogyesɛ ne ne ntɔnka nwi nyinaa na onyi; na ɔnhoro ne ntade, na ɔmfa nsu nguare ne honam na ne ho atew.

¹⁰Na ɛda a ɛto so awotwe no, ɔmfa nguanten mma abien a wodi mu, ne oguammaabere biako a wadi afe a odi mu, ne aduan afɔre asikresam olonka abupɛn du mu abiɛsa a wɔde ngo afɔtɔw, ne ngo toaa ma biako mmra.

¹¹Na ɔsɔfo a ɔtew ne ho no mfa ɔbarima a wɔretew ne ho no ne nneɛma no mmegyina AWURADE anim, ahyiae ntamadan no ano.

¹²Na ɔsɔfo no mfa nguanten no mu biako mmra, sɛ asodi ho afɔre, ne ngo toaa ma no, na onhim no ohim afɔre, AWURADE anim;

¹³ na onkum oguanten ba no nea wokum bɔne ho afɔre ne ɔhyew afɔre hɔ, nea ɛhɔ yɛ kronkron, efisɛ asodi ho afɔre no nso yɛ asɔfo no dea, te sɛ bɔne ho afɔre, ɛyɛ akronkronne mu adekronkron.

¹⁴ Na ɔsɔfo no mfa asodi ho afɔre mogya no bi nkeka nea wɔretew ne ho no aso nifa ne ne nsa nifa kokurobeti ne ne nan nifa kokurobeti ano.

¹⁵Na ɔsɔfo no mfa ngo toaa no mu bi nhwie ngu n'ankasa ne nsa benkum mu;

¹⁶ na ɔsɔfo no mfa ne nsatea nifa mmɔ ngo a ɛwɔ ne nsa benkum mu no mu, na ɔmfa ne nsatea nka ngo no bi mpete mpɛn asɔn, AWURADE anim;

¹⁷na ngo a ɛbɛka ne nsam no, ɔsɔfo no mfa bi nkeka nea wɔretew ne ho no aso nifa ne ne nsa nifa kokurobeti ne ne nan nifa kokurobeti ano, asodi ho afɔre mogya no so;

¹⁸na ngo a ɛbɛka ɔsɔfo no nsam no, onhwie ngu nea wɔretew ne ho no atifi, na ɔsɔfo no mpata mma no, AWURADE anim.

¹⁹Na ɔsɔfo no mmɔ bɔne ho afɔre no, na ɔmpata mma nea wɔretew ne ho afi ne ho fi mu no; na ɛno akyi no, onkum ɔhyew afɔre aboa no;

²⁰na ɔsɔfo no nhyew ɔhyew afɔre ne aduan afɔre no afɔremuka no so, na ɔsɔfo no mpata mma no na ne ho atew.

²¹Na sɛ odi hia na ne nsa anso eyinom so a, ɛnne ɔmfa oguanten ba biako mmɛyɛ asodi ho afɔre nyɛ ohim afɔre mfa mpata mma no, ne aduan afɔre asikresam olonka abupɛn du mu biako a wɔde ngo afɔtɔw, ne ngo toaa ma,

²² ne nturukuku abien anaa mmorɔnoma mma abien a ne nsa bɛso so; biako nyɛ bɔne ho afɔre na biako nyɛ ɔhyew afɔre;

²³na n'ahodwira da a ɛto so awotwe no, ɔmfa mmrɛ ɔsɔfo no ahyiae ntamadan no ano, AWURADE anim.

²⁴Na ɔsɔfo no mfa asodi ho afɔre guanten ba no ne ngo toaa ma no, na onhim no ohim afɔre, AWURADE anim.

²⁵Na onkum asodi ho afɔre guanten ba no, na ɔsɔfo no mfa asodi ho afɔre mogya no bi nkeka nea wɔretew ne ho no aso nifa ne ne nsa nifa kokurobeti ne ne nan nifa kokurobeti ano;

²⁶na ɔsɔfo no mfa ngo no ngu n'ankasa ne nsa benkum mu,

²⁷na ɔsɔfo no mfa ne nsatea nifa nka ngo a ɛwɔ ne nsa benkum mu no bi mpete mpɛn asɔn, AWURADE anim;

²⁸na ɔsɔfo no mfa ngo a ɛwɔ ne nsam no bi nkeka nea wɔretew ne ho no aso nifa ne ne nsa nifa kokurobeti ne ne nan nifa kokurobeti ano, nea asodi ho afɔre no mogya no wɔ no;

²⁹na ngo a ɛbɛka ɔsɔfo no nsam no onhwie ngu nea wɔretew ne ho no atifi mfa mpata mma no, AWURADE anim.

³⁰Na ɔmfa nturukuku anaa mmorɔnoma mma a ne nsa bɛso so no mu biako,

³¹ade a ne nsa bɛso so no mu biako nyɛ bɔne ho afɔre, na biako nyɛ ɔhyew afɔre mpae aduan afɔre no so, na ɔsɔfo no mpata mma nea wɔretew ne ho no, AWURADE anim.

³²Eyi ne mmara a ɛda hɔ ma nea kwata atotow no a ne nsa nso n'ahodwira ade so no.

³³Na AWURADE kasa kyerɛɛ Mose ne Aaron sɛ:

³⁴Sɛ mudu Kanaan asase a mede merema mo sɛ munni so no so, na sɛ mede kwata ntotowee metoto mo dibea asase no so fi bi ho a,

³⁵ ɛnne ofi no wura no mmra mmɛka nkyerɛ ɔsɔfo no sɛ ɛyɛ me sɛ biribi a ɛte sɛ ntotowee wɔ me fi ho.

³⁶Na ɔsɔfo no nhyɛ mma wonyi ofi no mu nneɛma mfi adi ansa na ɔsɔfo no nhyɛn mu nkɔhwɛ ntotowee no, na ofi no mu nneɛma nyinaa ho angu fi; na ɛno akyi no ɔsɔfo no nhyɛn mu nkɔhwɛ ofi no.

³⁷ Na ɔsɔfo no hwɛ ntotowee no, na sɛ ntotowee no wɔ ofi no fasu ho, nkekae apopobibiri anaa akɔkɔɔ, na ani atotɔ mu asen ɔfasu no a,

³⁸ɔsɔfo no mfi ofi no mu mmra ɔpon ano, na ɔnto ofi no mu nnansɔn.

³⁹Na sɛ ɛda a ɛto so ason no, ɔsɔfo no san ba, na ɔbɛhwɛ, na sɛ ntotowee no ayerɛw ofi no fasu ho a,

⁴⁰ɔsɔfo no mma wontutu abo a ntotowee no wɔ mu no ntow ngu kurow no akyi nea ɛhɔ ntew;

⁴¹na wɔnwerɛwerɛw ofi no mu nhyia, na wɔmfa dɔte a wɔwerɛwee no nkogu kurow no akyi nea ɛhɔ ntew.

⁴²Na wɔmfa abo foforo nhyehyɛ abo no ananmu, na wɔmfa dɔte foforo mma ofi no ho.

⁴³Na sɛ abo no tutu ne ofi no ho wewerɛw ne ɛho ma akyi no ntotowee no san bepue ofi no mu,

⁴⁴na ɔsɔfo no ba na ɔbɛhwɛ, na sɛ ntotowee no ayerɛw ofi no mu a, ɛyɛ ofi no mu kwata a ɛsɛe ade; ɛho ntew.

⁴⁵Enti onnwiriw ofi no ngu fam, n'abo ne ne mpuran ne ofi no ho dɔte nyinaa, na ɔnsesaw mfi adi nkɔ kurow no akyi nkogu nea ɛhɔ ntew.

⁴⁶ Na nea ɔbɛkɔ ofi no mu nna a wɔato mu nyinaa mu no, ne ho ntew kosi anwummere,

⁴⁷na nea ɔda ofie hɔ no nhoro ne ntade, na nea odidi ofie hɔ no nhoro ne ntade.

⁴⁸Na sɛ ofi no ho ma akyi ɔsɔfo no ba bɛhwɛ, na sɛ ntotowee no nyerɛwee ofi no mu a, ɛnne ɔsɔfo no mmu ofi no sɛ ɛho tew, efisɛ ntotowee no asa.

⁴⁹Na ɔmfa nnomaa abien ne kyeneduru dua ne adidi ne adwerɛ nnwira ofi no.

⁵⁰ Na onkum nnomaa no mu biako asanka mu, mmasu so,

⁵¹na ɔmfa kyeneduru dua ne adwerɛ ne adidi ne anomaa animono no mmɔ anomaa a wɔakum no no mogya ne mmasu no mu, na ɔmfa mpete ofi no ho mpɛn asɔn,

⁵²na ɔmfa anomaa no mogya ne mmasu ne anomaa animono no ne kyeneduru dua ne adwerɛ ne adidi no nnwira ofi no,

⁵³ na onnyaa anomaa animono no kurow no akyi mma ɔnkɔ wuram, na ɔmpata mma ofi no, na ɛho atew.

⁵⁴Eyi ne mmara a ɛda hɔ ma kwata ntotowee nyinaa ne ntutui,

⁵⁵ne ntama ne ofi ho kwata,

⁵⁶ne ɔsoa ne ntwintwamee ne atape,

⁵⁷sɛ nkyerɛkyerɛ bere a ade ho ntew ne bere a ɛho tew mu; eyi ne kwata ho mmara.