Read Revised Akuapem Twi DC-KYERƐW KRONKRON Lewitikɔs 18 Bible Online

Lewitikɔs 18 - Revised Akuapem Twi DC-KYERƐW KRONKRON bible

Lewitikɔs 18

¹Na AWURADE kasa kyerɛɛ Mose sɛ:

²Kasa kyerɛ Israelfo na ka kyerɛ wɔn sɛ: Mene AWURADE mo Nyankopɔn.

³ Misraim asase a motenaa hɔ no so nneyɛe de, monnyɛ. Na Kanaan asase a mede mo merekɔ hɔ no so nneyɛe nso, monnyɛ, na munnni wɔn ahyɛde so.

⁴M'atemmude na monyɛ, na monkora m'ahyɛde sɛ, mubedi so.

⁵ Mene AWURADE mo Nyankopɔn. Na monkora m'ahyɛde ne m'atemmude a onipa a ɔyɛ no benya mu nkwa no. Mene AWURADE.

⁶Obiara nnkɔ ne bogya biara a ɔyɛ ne honam no ho nnkoyi n'adagyaw so. Mene AWURADE.

⁷Nyi w'agya anaa wo na adagyaw so; wo na ne no, nyi n'adagyaw so.

⁸ Nyi w'agya yere adagyaw so; w'agya adagyaw ne no.

⁹ Wo nuabea a ɔyɛ w'agya ba anaa wo na ba no, wɔwoo no ofie oo, wɔwoo no baabi oo, nyi wɔn adagyaw so.

¹⁰Wo babanin babea anaa wo babea babea, nyi wɔn adagyaw so, efisɛ ɛyɛ w'adagyaw.

¹¹W'agya yere babea a w'agya awo no no, ɔyɛ wo nuabea, nyi n'adagyaw so.

¹²Nyi w'agya nuabea adagyaw so; ɔyɛ w'agya honam.

¹³Nyi wo na nuabea adagyaw so, efisɛ ɔyɛ wo na honam.

¹⁴Nyi w'agya nuabarima adagyaw so nkɔ ne yere ho; wo na kumaa ne no.

¹⁵ Nyi w'ase adagyaw so; wo babarima yere ne no, nyi n'adagyaw so.

¹⁶ Nyi wo nua yere adagyaw so; ɛyɛ wo nua adagyaw.

¹⁷ Nyi ɔbea bi ne ne ba adagyaw so; mfa ne babanin babea anaa ne babea babea nyi wɔn adagyaw so; ne honam ne wɔn; ɛyɛ abusude.

¹⁸Na mma ɔbea ne ne nua nware, na wɔatwe kora, mmere a ɔda so te ase no, wubeyi n'adagyaw so aka ho.

¹⁹ Na nkɔ ɔbea a n'asabu mu ne ho ntewee no ho nkoyi n'adagyaw so.

²⁰ Na wo ne wo yɔnko yere nnna, na mfa wo ho nsu mma no mfa ngu wo ne no ho fi.

²¹ Na mfa w'asefo mu bi mma ɔnnkɔfa ogya mu mmma Molek, na nhura wo Nyankopɔn din ho; mene AWURADE.

²² Na wo ne ɔbarima nnna, sɛ ɔbea; ɛyɛ akyide.

²³ Wo ne aboa biara nnna mmfa nngu wo ho fi; na ɔbea bi nnnyina aboa bi anim nnnan ne ho mmma no; ɛyɛ basabasayɛ.

²⁴Mommfa nneɛma yi biara nngu mo ho fi, efisɛ eyinom nyinaa na amanaman a merebetu wɔn afi mo anim yi de agu wɔn ho fi,

²⁵na asase no so agu fi, enti na meretua ɛso amumɔyɛ no so ka, na asase no afe ɛsotefo no agu.

²⁶Na mo de, munni m'ahyɛde ne m'atemmude so, na monnnyɛ saa akyide yi mu biara, okuromani oo, ɔhɔho a wabɛsoɛ mo mu oo,

²⁷efisɛ saa akyide yi nyinaa na asase no sofo a wodi mo kan no ayɛ, na asase no so agu fi;

²⁸na asase no amfe mo sɛ moagu ho fi, sɛnea ɛfee amanaman a wodii mo anim no.

²⁹Na obiara a ɔbɛyɛ saa akyide yi mu biara no, wobetwa akra a wɔyɛ no afi wɔn aman mu akyene.

³⁰Enti monhwɛ m'ahwɛde, na moanyɛ ahyɛde a wokyi a wodii mo anim yɛe no amfa angu mo ho fi: Mene AWURADE mo Nyankopɔn.