Read Revised Akuapem Twi DC-KYERƐW KRONKRON Lewitikɔs 20 Bible Online

Lewitikɔs 20 - Revised Akuapem Twi DC-KYERƐW KRONKRON bible

Lewitikɔs 20

¹ Na AWURADE kasa kyerɛɛ Mose sɛ:

²Ka kyerɛ Israelfo no sɛ: Obiara a ofi Israelfo anaa ahɔho a wɔabɛtena Israel mu a ɔde ne mma mu bi ma Molek no, okum na wonkum no; asase no sofo nsiw no abo mma onwu.

³Na me nso mɛma m'ani asa onipa no, na matwa no afi me man mu akyene, efisɛ ɔde ne mma bi ama Molek de agu me kronkronbea no ho fi na wahura me din kronkron no ho.

⁴Na sɛ ɔde ne mma mu bi ma Molek na asase no sofo no bu wɔn ani gu saa onipa no so na wɔankum no a,

⁵me de, mɛma m'ani asa onipa no ne n'abusua, na metwa ɔno ne wɔn a wodi n'akyi aguamammɔ kwan so na wodi Molek akyi bɔ aguaman no nyinaa afi wɔn man mu agu.

⁶ Na obiara a ɔdan ne ho kɔ adebisafo anaa asumanfo nkyɛn kodi wɔn akyi aguamammɔ kwan so no, mɛma m'ani asa saa onipa no, na metwa no afi me man mu akyene.

⁷ Enti montew mo ho na monyɛ kronkron: na mene AWURADE mo Nyankopɔn.

⁸ Na munni m'ahyɛde so na monyɛ, Mene AWURADE a ɔyɛ mo kronkron no.

⁹ Sɛ obiara dome n'agya anaa ne na a, okum na wonkum no; wadome n'agya ne ne na: ne mogya gu n'atifi.

¹⁰ Ɔbarima a ɔfa ɔbarima bi yere na ɔne ne yɔnko yere sɛe aware no, okum na wonkum ɔbarima ne ɔbea awaresɛefo no.

¹¹Na ɔbarima a ɔne n'agya yere da no, wayi n'agya adagyaw so; okum na wonkum wɔn baanu nyinaa; wɔn mogya gu wɔn atifi.

¹²Na ɔbarima a ɔne n'ase a ɔyɛ ne ba yere da no, okum na wonkum wɔn baanu nyinaa; wɔayɛ akyide; wɔn mogya gu wɔn atifi.

¹³Na ɔbarima a ɔne ɔbarima bi da ɔbea nna no, wɔn baanu ayɛ akyide, okum na wonkum wɔn; wɔn mogya gu wɔn atifi.

¹⁴Sɛ ɔbarima bi fa ɔbea ne ne na nyinaa a, ɛyɛ abusude: wɔmfa ogya nhyew ɔno ne wɔn nyinaa, na abusude antena mo mu.

¹⁵Na ɔbarima a ɔne aboa bi da no, okum na wonkum no, na aboa no nso munkum no.

¹⁶Na ɔbea a ɔkɔ aboa biara ho kɔda hɔ ma no no, kum ɔbea no ne aboa no; okum na wonkum wɔn; wɔn mogya gu wɔn atifi.

¹⁷Na ɔbarima a ɔfa ne nuabea a ɔyɛ n'agya ɔba anaa ne na ɔba na ohu n'adagyaw na ɔbea no nso hu n'adagyaw no, ɛyɛ animguasede, na wontwitwa wɔn ngu, wɔn man mma anim; wayi ne nuabea adagyaw so; ɔnsoa ne mmusu.

¹⁸Na ɔbarima a ɔne ɔbrafo da na oyi n'adagyaw so na obue n'abura ano, na ɔno nso yi ne mogya abura so no, wontwitwa wɔn baanu nyinaa mfi wɔn man mu ngu.

¹⁹Na nyi wo na nuabea anaa w'agya nuabea adagyaw so, efisɛ wayi ne bogya adagyaw so; wɔnsoa wɔn mmusu.

²⁰Na ɔbarima a ɔne n'agya nua yere da no, wayi n'agya nua adagyaw so, wɔnsoa wɔn bɔne, wɔrenwo mma na wɔawu.

²¹Na obi fa ne nua yere ware a, ɛyɛ ade a ɛho ntew; wayi ne nua adagyaw so, wɔrennya ɔba.

²²Enti munni m'ahyɛde nyinaa ne m'atemmude nyinaa so na monyɛ, na asase a mede mo rekɔ hɔ akɔtena so no amfe mo angu.

²³Na mommfa aman a merebetu wɔn mo anim no ahyɛde so; na wɔayɛ eyinom nyinaa na wɔn ho ayɛ me nwini;

²⁴na mise mo sɛ: Mo na munni wɔn asase so, na mede mema mo sɛ momfa, asase a ɛsen nufusu ne ɛwo no. Mene AWURADE mo Nyankopɔn a mayi mo afi amanaman mu no.

²⁵ Na mompae asase so mmoa a wɔn ho tew ne wɔn a wɔn ho ntew mu, ne nnomaa a wɔn ho ntew ne wɔn a wɔn ho tew mu, na moamfa asase so mmoa ne nnomaa ne ade biara a ɛwea fam a mapae mu mama mo sɛ ɛho ntew no angu mo kra ho fi.

²⁶Na monyɛ kronkron mma me, efisɛ me AWURADE meyɛ kronkron; na mapaw mo afi aman mu sɛ mommɛyɛ me dea.

²⁷ Na ɔbarima anaa ɔbea a adebisa anaa akɔm honhom wɔ ne mu no, okum na wonkum wɔn; wonsiw wɔn abo; wɔn mogya gu wɔn atifi.