Read Revised Akuapem Twi DC-KYERƐW KRONKRON Lewitikɔs 21 Bible Online

Lewitikɔs 21 - Revised Akuapem Twi DC-KYERƐW KRONKRON bible

Lewitikɔs 21

¹ Na AWURADE ka kyerɛɛ Mose sɛ: Kasa kyerɛ Aaron mma asɔfo no na ka kyerɛ wɔn sɛ: Mo mu biara nngu ne ho fi funu bi ho ne man mu,

²gye ne bogya a ɔbɛn no, ne na ne n'agya ne ne babanin ne ne babea ne ne nuabarima,

³ne ne nuabea a ɔyɛ ɔbaabun a ɔbɛn no a onnya nnyaa okunu ɛ, ɔno ho na ɔmma ne ho nkum.

⁴Ɔyɛ ne nkurɔfo mu nipa titiriw nti, onngu ne ho fi, nanso onnhura ne ho.

⁵ Wonnyi wɔn mpampam na wɔnnwɛre wɔn bogyesɛ ano, na wɔnnsesa wɔn honam mu nkamaa.

⁶Wɔnyɛ kronkron mma wɔn Nyankopɔn, na wonnhura wɔn Nyankopɔn din ho, efisɛ wɔn na wɔde AWURADE gya afɔre, wɔn Nyankopɔn aduan, no ba; enti wɔnyɛ kronkron.

⁷Wɔnnware ɔbea aguaman bi anaa nea ne ho ahura, nanso wɔnnware ɔbea a ne kunu ako no, efisɛ ɔyɛ kronkron ma ne Nyankopɔn.

⁸Na bu no kronkron, efisɛ wo Nyankopɔn aduan na ɔde ba; ɔnyɛ onipa kronkron mma wo, efisɛ kronkron ne me AWURADE a ɔyɛ mo kronkron no.

⁹Na sɛ ɔsɔfo babea fi ase bɔ aguaman a, wahura n'agya ho, wɔmfa ogya nhyew no.

¹⁰ Na ne nuanom mu sɔfo panyin a wɔahwie ɔsra ngo agu n'atifi na wɔde ahyɛ ne nsam sɛ ɔnhyɛ ntade no, ɔmmpɛsɛw ne ti na onnsunsuane ne ntade mu,

¹¹na ɔnnkɔ funu biara ho, n'agya ne ne na ho po ɔmmma ne ho nnkum.

¹²Na ommfi kronkronbea hɔ, na onnhura ne Nyankopɔn kronkronbea ho, efisɛ ne Nyankopɔn sra ngo dwira no wɔ n'atifi: Mene AWURADE.

¹³Na ɔno de, ɔbaabun na ɔnware;

¹⁴okunafo ne nea wɔako no ne nea ne ho ahura ne aguaman de, ɔnnware eyinom mu biara, na mmom ne man mu baabun na ɔnware.

¹⁵Na onnhura n'asefo ho ne man mu; na mene AWURADE a meyɛ no kronkron.

¹⁶Na AWURADE kasa kyerɛɛ Mose sɛ:

¹⁷Kasa kyerɛ Aaron sɛ: W'asefo awo ntoatoaso mu ɔbarima a dɛm wɔ ne ho biara mmma mmmɛfa aduan mmmrɛ ne Nyankopɔn.

¹⁸Na obiara a odi dɛm no mmmɛn, onifuraefo oo, apakye oo, hwensin oo, nea ne honam biribi boro so oo,

¹⁹nea ne nan anaa ne nsa abu oo,

²⁰afu oo, nea wakyenkyen oo, nea ɛtɛ si n'ani so oo, nea ɔyare ntwemu oo, ogyatɔfo oo, nea ne hwea aba abɔ oo,

²¹ɔsɔfo Aaron asefo mu biara a odi dɛm no nntwiw mmmɛn mmfa AWURADE gya afɔre no mmma; dɛm wɔ ne ho, ɔmmfa ne Nyankopɔn aduan no nntwiw mmma.

²²Ne Nyankopɔn aduan, akronkronne mu ade kronkron ɛne akronkronne no de, onni bi.

²³Ntwamu mmɔhɔɔ no ho nko na ɔmmma, na afɔremuka no ho na onntwiw mmmɛn, efisɛ dɛm wɔ ne ho; na wanhura m'akronkronne no ho, efisɛ mene AWURADE a meyɛ wɔn kronkron.

²⁴Na Mose ka kyerɛɛ Aaron ne ne mma no ne Israelfo no nyinaa.