Read Revised Akuapem Twi DC-KYERƐW KRONKRON Lewitikɔs 23 Bible Online

Lewitikɔs 23 - Revised Akuapem Twi DC-KYERƐW KRONKRON bible

Lewitikɔs 23

¹Na AWURADE kasa kyerɛɛ Mose sɛ:

²Kasa kyerɛ Israelfo na ka kyerɛ wɔn sɛ: AWURADE afahyɛ ahorow a mompae sɛ ɛnyɛ nhyia kronkron, m'afahyɛ nna no ni:

³ Nnansia na wɔnyɛ adwuma, na da a ɛto so ason no yɛ ɔhome mu homeda, wonhyia nhyia kronkron; monnyɛ adwuma biara, ɛyɛ AWURADE homeda mo tenabea nyinaa mu.

⁴ Eyinom ne AWURADE afahyɛ, nhyia kronkron a mompae ne mmere mu no:

⁵ ɔsram a edi kan no da a ɛto so dunan no anwummere yɛ AWURADE twam;

⁶na ɔsram no ara da a ɛto so dunum yɛ AWURADE apiti afahyɛ, nnansɔn na munni apiti.

⁷Da a edi kan no munhyia nhyia kronkron; monnyɛ adwumaden biara.

⁸Na momfa ogya afɔre mmrɛ AWURADE nnansɔn. Da a ɛto so ason no, munhyia nhyia kronkron; monnyɛ adwuma den biara.

⁹Na AWURADE kasa kyerɛɛ Mose sɛ:

¹⁰Kasa kyerɛ Israelfo na ka kyerɛ wɔn sɛ: Sɛ mudu asase a mede merema mo no so na mutwa ɛso nnɔbae a, momfa mo nnɔbae fi a edi kan no mmrɛ ɔsɔfo;

¹¹ na onhim efi no AWURADE anim, na ɛnsɔ ani mma mo; ɔhomeda no adekyee na ɔsɔfo no nhim.

¹²Na ɛda a muhim efi no, momfa oguanten ba a odi mu a wadi afe mmɔ ɔhyew afɔre mma AWURADE,

¹³ne ɛho aduan afɔre: asikresam abupɛn du mu abien a wɔde ngo afɔtɔw, na ɛnyɛ AWURADE gya afɔre a eyi hua huamhuam; ne ɛho ahwiesa, bobesa susutoa abupɛn anan mu biako.

¹⁴Na munnni abodoo anaa awi a wɔato anaasɛ wɔasiw kosi da no ara a mode mo Nyankopɔn ayɛyɛde reba no. Ɛnyɛ daa ahyɛde mma mo awo ntoatoaso, mo tenabea nyinaa mu.

¹⁵ Na monkan nna mfa mfi homeda no adekyee da a mode ohim fi no ba no, ɛnyɛ adapɛn ason pɛpɛɛpɛ.

¹⁶Monkan adaduonum nkosi homeda a ɛto so ason no adekyee so ansa na momfa aduan afɔre foforo mmrɛ AWURADE.

¹⁷Momfa ohim abodoo abien mfi mo tenabea mmɛma; asikresam abupɛn du mu abien mmɔkaw na wɔmfa nto, na ɛnyɛ aduankan mma AWURADE.

¹⁸Na momfa nguanten mma ason a wodi mu a wɔadi afe afe ne nantwiforo biako ne adwennini abien nka abodoo no ho; wɔnyɛ AWURADE ɔhyew afɔre, ne ɛho aduan afɔre ne ahwiesa, ogya afɔre a eyi hua huamhuam ma AWURADE.

¹⁹Na momfa ɔpapo biako mmɔ bɔne ho afɔre, ne nguanten mma abien a wɔadi afe afe mmɔ asomdwoe afɔre.

²⁰Na ɔsɔfo no nhim wɔn ne aduankan abodoo no ne nguanten mma abien no na ɛnyɛ AWURADE anim him afɔre: ɛnyɛ kronkron mma AWURADE na wɔmfa mma ɔsɔfo no.

²¹Na munhyia da no ara; ɛnyɛ nhyia kronkron, monnyɛ adwumaden biara. Ɛnyɛ daa ahyɛde mo tenabea nyinaa mu, mo awo ntoatoaso nyinaa mu.

²² Na sɛ mutwa mo asase so nnɔbae a, nwie w'afuw nkwanse de twa, na nni wo nnɔbae no mu mpɛpɛw. Gyaw ma ohiani ne ɔhɔho. Mene AWURADE mo Nyankopɔn.

²³Na AWURADE kasa kyerɛɛ Mose sɛ:

²⁴ Kasa kyerɛ Israelfo sɛ ɔsram a ɛto so ason no da a edi kan nyɛ mo homeda, torobɛntohyɛn nkae, nhyia kronkron;

²⁵monnyɛ adwumaden biara, na momfa ogya afɔre mmrɛ AWURADE.

²⁶Na AWURADE kasa kyerɛɛ Mose sɛ:

²⁷ ɔsram a ɛto so ason yi ara da a ɛto so du ne mpata da; munhyia nhyia kronkron, na mommrɛ mo ho ase, na momfa ogya afɔre mmrɛ AWURADE.

²⁸Na ɛda no monnyɛ adwuma biara, efisɛ ɛyɛ mpata da a wɔpata ma mo, AWURADE mo Nyankopɔn anim.

²⁹Na ɔkra biara a ɔmmrɛ ne ho ase da no, wobetwa no afi ne man mu akyene.

³⁰Na obiara a ɔyɛ adwuma bi saa da no, mɛsɛe oniiko no afi ne man mu.

³¹Monnyɛ adwuma biara; ɛyɛ daa ahyɛde ma mo awo ntoatoaso, mo tenabea nyinaa mu.

³²Ɛyɛ ɔhome mu homeda ma mo, na mommrɛ mo kra ase ɔsram no da a ɛto so akron no anwummere; munni mo homeda no mfi anwummere nkosi anwummere.

³³Na AWURADE kasa kyerɛɛ Mose sɛ:

³⁴ Kasa kyerɛ Israelfo sɛ, ɔsram a ɛto so ason yi da a ɛto so dunum no yɛ asese afahyɛ nnansɔn ma AWURADE.

³⁵Da a edi kan no yɛ nhyia kronkron; monnyɛ adwumaden biara.

³⁶ Nnansɔn na momfa ogya afɔre mmrɛ AWURADE; da a ɛto so awotwe no nyɛ mo nhyia kronkron, na momfa ogya afɔre mmrɛ AWURADE; ɛyɛ afahyɛ awiei, monnyɛ adwumaden biara.

³⁷Eyinom ne AWURADE afahyɛ horow a mompae sɛ wonhyia nhyia kronkron no, na wɔmfa ogya afɔre mmrɛ AWURADE, ɔhyew afɔre ne aduan afɔre ne okum afɔre ne ahwiesa, ebiara wɔ ne da mu.

³⁸Ɛsono AWURADE home nna no, na ɛsono mo ayɛyɛde, na ɛsono mo aboade nyinaa, na ɛsono mo ayamye ade nyinaa a mode ma AWURADE no.

³⁹Nso ɔsram a ɛto so ason no da a ɛto so dunum a moreboa asase so nnɔbae ano no, munni AWURADE nnapɔnna nnansɔn: da a edi kan no yɛ homeda, na ɛda a ɛto so awotwe no yɛ homeda.

⁴⁰ Na ɛda a edi kan no momfa nnua afɛfɛ so ade, berɛw ne nnua kusuu abaa ne nsukɔn so nnua, na mo ani nnye AWURADE mo Nyankopɔn anim nnansɔn.

⁴¹Na momfa nni nnapɔnna mma AWURADE, nnansɔn daa afe; ɛyɛ daa ahyɛde ma mo awo ntoatoaso; ɔsram a ɛto so ason no mu na munni nnapɔnna yi.

⁴²Asese mu na montena nnansɔn, Israel man mma nyinaa ntena asese mu,

⁴³na mo awo ntoatoaso ahu sɛ miyii Israelfo fii Misraim asase so no, asese mu na mema wɔtenae: Mene AWURADE mo Nyankopɔn.

⁴⁴Na Mose paee AWURADE afahyɛ horow no kyerɛɛ Israelfo no.