Read Revised Akuapem Twi DC-KYERƐW KRONKRON Lewitikɔs 27 Bible Online

Lewitikɔs 27 - Revised Akuapem Twi DC-KYERƐW KRONKRON bible

Lewitikɔs 27

¹Na AWURADE kasa kyerɛɛ Mose sɛ:

² Kasa kyerɛ Israelfo na ka kyerɛ wɔn sɛ: Sɛ obi hyɛ bɔ titiriw bi ma AWURADE, nea ɛne nnipa bo yɛ pɛ a,

³ɛbo a bɔ ni: Ɔbarima a wadi mfirihyia aduonu de kosi mfe aduosia, ɛbo a bɔ nyɛ nnwetɛbona aduonum, sɛ kronkronbea dwetɛbona te no.

⁴Na sɛ ɔyɛ ɔbea a, wo bo nnyina nnwetɛbona aduasa;

⁵na sɛ wadi mfe anum de kosi mfe aduonu na sɛ ɔyɛ ɔbarima a, wo bo nyɛ nnwetɛbona aduonu, na sɛ ɔyɛ ɔbea a, nnwetɛbona du;

⁶na sɛ wadi ɔsram biako de kosi mfe anum a, wo bo a wode bɛbɔ ɔbarima nyɛ nnwetɛbona anum, na ɔbea de, wo bo nyɛ nnwetɛbona abiɛsa;

⁷na sɛ wadi mfe aduosia anaasɛ nea ɛboro saa na sɛ ɔyɛ ɔbarima a, wo bo nyɛ nnwetɛbona dunum, na sɛ ɔyɛ ɔbea a, nnwetɛbona du.

⁸Na sɛ ohia ahia no a enti ontumi mma wo bo a wobɔe no a, wɔmfa no mmegyina ɔsɔfo no anim, na ɔsɔfo no mmɔ no bo; sɛnea nea wahyɛ bɔ no nsa bɛso so.

⁹Na sɛ ɛyɛ afieboa a wɔde bi brɛ AWURADE sɛ ayɛyɛde no bi a, ade a wɔde bi brɛ AWURADE nyinaa yɛ kronkron.

¹⁰Wɔnnsakra, na wɔmmfa papa nnsesa bɔne anaasɛ bɔne nnsesa papa; na sɛ ɛba sɛ wɔde aboa sesa aboa a, ɛnne ɛno ne nea wɔde sesae no nyinaa nyɛ kronkron.

¹¹Na sɛ ɛyɛ aboa biara a ne ho ntew a wɔmmfa no mmrɛ AWURADE sɛ ayɛyɛde a, wɔmfa aboa no mmegyina ɔsɔfo anim,

¹²na sɛ eye oo, enye oo, ɔsɔfo no mmɔ ne bo; sɛnea wo, ɔsɔfo no, bɛbɔ no, saa ara na ennyina.

¹³Na sɛ ɔpɛ sɛ ogye a, ɛnne ɔmfa wo bo no abupɛn anum mu biako nka ho.

¹⁴Na sɛ obi yɛ ne fi kronkron sɛ ɛnyɛ kronkron mma AWURADE a, sɛ eye oo, enye oo, ɔsɔfo no mmɔ ne bo; sɛnea ɔsɔfo no bɛbɔ no, saa ara na ennyina.

¹⁵Na sɛnea ɔyɛɛ no kronkron no begye ne fi no a, ɔmfa wo bo no dwetɛ abupɛn anum mu biako nto so, na ɛnyɛ ne de.

¹⁶Na sɛ obi yɛ n'asase a odi so kronkron ma AWURADE a, wo bo bɔ no nyɛ sɛ n'aba te; bɔ atoko a wodua homer[3] biako so bo nnwetɛbona aduonum.

¹⁷Sɛ ofi ahosɛpɛw afahyɛ afe so yɛ n'asase no kronkron a, ennyina wo bo no so;

¹⁸na sɛ ahosɛpɛw afahyɛ afe no akyi na ɔyɛ n'asase no kronkron a, ɛnne ɔsɔfo no mmu n'akontaa mma no sɛ mfe a aka na ahosɛpɛw afahyɛ afe no adu no te no, na wɔntew wo bo no so.

¹⁹Na sɛ nea ɔyɛɛ asase no kronkron no pɛ sɛ ogye a, ɔmfa wo bo no dwetɛ abupɛn anum mu biako nto so, na ɛntena ne nsam;

²⁰na sɛ wannye asase no na wɔtɔn ma obi a, wonnnye bio,

²¹na sɛ asase no nni wura ahosɛpɛw afahyɛ afe no mu a, ɛnyɛ kronkron mma AWURADE, sɛ asase a wɔahyira so de ama; ɛnyɛ ɔsɔfo no agyapade.

²²Na sɛ ɛyɛ asase a ɔtɔe na ɔpɛ sɛ ɔyɛ no kronkron ma AWURADE na ɛnyɛ awunnyade a,

²³ɔsɔfo no mmu akontaa mma no nkyerɛ no bo no mu nea ɛbɛka akosi ahosɛpɛw afahyɛ afe no so, na ɔmma wo bo a wobɔe no da no ara; ɛyɛ kronkron ma AWURADE.

²⁴ Ahosɛpɛw afahyɛ afe no so, asase no nsan nkɔyɛ nea ɔtɔe ne nkyɛn a ɛyɛ n'asase a odi so no dea.

²⁵Na wo bo a wobɛbɔ nyinaa nyɛ sɛnea kronkronbea dwetɛbona no te; gera aduonu yɛ dwetɛbona biako.

²⁶ Na afieboa mu mmakan a wɔwo ma AWURADE no nko de, obi nnyɛ wɔn kronkron; nantwi oo, oguan oo, ɛyɛ AWURADE dea.

²⁷Na sɛ ɛyɛ fieboa a wɔn ho ntew no bi a, ɛnne onnye no wo bo a wobɛbɔ no so, na ɔmfa abupɛn anum mu biako nto so; na sɛ wɔannye no a, ɛnne wɔntɔn no sɛnea wobɛbɔ ne bo.

²⁸ Nso ahyirade biara a obi behyira so ama AWURADE, ade a ɔwɔ nyinaa mu no, onipa oo, aboa oo, n'asase a odi so oo, ɛno de wɔnntɔn, na wonnnye nso; ahyirade biara yɛ akronkronne mu adekronkron ma Awurade.

²⁹ Obiara a wabu no kumfo no, wonnnye no; okum na wonkum no.

³⁰ Na asase no so aduan ntotoso du du a efi asase so aduan ne nnua so aba mu no nyinaa yɛ AWURADE dea; ɛyɛ kronkron ma AWURADE.

³¹Na sɛ obi pɛ sɛ ogye ne ntotoso du du no bi a, ɔmfa abupɛn anum mu biako nto so.

³²Na anantwi ne nguan mu ntotoso du du nyinaa, nea ɛfa oguanhwɛfo poma ase nyinaa mu nea ɛto so du du no, ɛnyɛ kronkron mma AWURADE.

³³Wɔmmpaw papa ne bɔne mu, na wɔnnsesa ebi nso; na sɛ obi bɛsesa ebi a, ɛnne ɛno ne nea wɔde resesa no nyinaa nyɛ kronkron mma AWURADE; wonnnye.

³⁴ Eyinom ne mmara nsɛm a AWURADE de hyɛɛ Mose, Sinai bepɔw so, ma ɔde kɔmaa Israelfo no.