Read Revised Akuapem Twi DC-KYERƐW KRONKRON Lewitikɔs 3 Bible Online

Lewitikɔs 3 - Revised Akuapem Twi DC-KYERƐW KRONKRON bible

Lewitikɔs 3

¹Na sɛ obi ayɛyɛde yɛ asomdwoe afɔre, na anantwi no bi na ɔde reba a, onini oo, ɔbere oo, nea odi mu na ɔmfa no mmra AWURADE anim.

²Na ɔmfa ne nsa nto n'ayɛyɛde no atifi, na onkum no, ahyiae ntamadan no ano, na Aaron mma no, asɔfo no, mfa mogya no mpete afɔremuka no so nhyia.

³Na onyi asomdwoe afɔre no bi mmra mmɛyɛ AWURADE gya afɔre: srade a ɛkata ayamde no so no ne ayamde no ho srade nyinaa,

⁴ne asaabo abien no ne srade a ɛwɔ ho, sisia mu no, ne mmerɛbo so ntontan no; omfi asaabo ho nyi.

⁵Na Aaron mma no nhyew, afɔremuka no so, mpae ɔhyew afɔre a egu ogya no so no, na ɛnyɛ ogya afɔre a eyi hua huamhuam ma AWURADE.

⁶Na sɛ n'ayɛyɛde a ɔde rebɛbɔ asomdwoe afɔre ama AWURADE no yɛ nguan no bi a, onini oo, ɔbere oo, nea odi mu na ɔmfa mmra.

⁷Sɛ n'ayɛyɛde no yɛ oguammaa na ɔde reba a, ɔmfa mmra AWURADE anim;

⁸na ɔmfa ne nsa nto n'ayɛyɛde no atifi, na onkum no ahyiae ntamadan no ano, na Aaron mma no mfa ne mogya mpete afɔremuka no so nhyia.

⁹Na onyi asomdwoe afɔre no bi mmra mmɛbɔ ogya afɔre mma AWURADE: ne srade ne ne sradedua mu a ontwa no pidua so pa ara ne srade a ɛkata ayamde no so ne ayamde no ho srade nyinaa,

¹⁰ne asaabo abien no ne srade a ɛwɔ ho, sisia mu no, ne mmerɛbo so ntontan no; omfi asaabo ho nyi.

¹¹Na ɔsɔfo no nhyew wɔ afɔremuka no so: ɛyɛ aduan afɔre a wɔbɔ no gya so ma AWURADE.

¹²Na sɛ n'ayɛyɛde no yɛ abirekyi a, ɔmfa mmra AWURADE anim;

¹³na ɔmfa ne nsa nto n'atifi, na onkum no, ahyiae ntamadan no ano, na Aaron mma no mfa ne mogya mpete afɔremuka no so nhyia.

¹⁴Na onyi bi mmra mmɛyɛ n'ayɛyɛde, AWURADE gya afɔre: srade a ɛkata ayamde so no ne ayamde ho srade nyinaa;

¹⁵ne asaabo abien no, ne srade a ɛwɔ ho, sisia mu no, ne mmerɛbo so ntontan no; omfi asaabo ho nyi.

¹⁶Na ɔsɔfo no nhyew wɔ afɔremuka no so, ɛyɛ ogya afɔreduan a eyi hua huamhuam; srade no nyinaa yɛ AWURADE dea.

¹⁷ Ɛnyɛ daa ahyɛde, mo awo ntoatoaso nyinaa mu ne mo tenabea nyinaa sɛ munnni srade anaa mogya biara.