Read Revised Akuapem Twi DC-KYERƐW KRONKRON Lewitikɔs 4 Bible Online

Lewitikɔs 4 - Revised Akuapem Twi DC-KYERƐW KRONKRON bible

Lewitikɔs 4

¹Na AWURADE kasa kyerɛɛ Mose sɛ:

²Kasa kyerɛ Israelfo sɛ: Sɛ obi anhyɛ da na ɔyɛ nneɛma a AWURADE ahyɛ sɛ wɔnnyɛ no mu biara no, na ɔkɔyɛ emu biara a,

³sɛ nso ɛyɛ ɔsɔfo a wɔasra no (ɔsɔfopanyin) yɛ bɔne ma ɔman no di so a, ɛnne ne bɔne a ɔyɛe nti ma ɔmfa nantwi ba onini a odi mu mmrɛ AWURADE mmɛbɔ bɔne ho afɔre.

⁴Na ɔmfa nantwinini no mmra ahyiae ntamadan no ano, na ɔmfa ne nsa nto n'atifi, na onkum no, AWURADE anim.

⁵Na ɔsɔfo a wɔasra no no mfa nantwi no mogya no bi nkɔ ahyiae ntamadan no mu,

⁶ na ɔsɔfo no mfa ne nsatea mmɔ mogya no mu, na ɔmpete mogya no bi mpɛn asɔn, AWURADE anim, kronkronbea ntwamu mmɔhɔɔ no anim.

⁷ Na ɔsɔfo no mfa mogya no bi nkeka aduhuamhyew muka a ɛwɔ AWURADE anim, ahyiae ntamadan mu no mmɛn ho, na onhwie nantwi no mogya nyinaa ngu ɔhyew afɔremuka a ɛwɔ ahyiae ntamadan ano no ase.

⁸Na onyi bɔne ho afɔre nantwi no srade nyinaa mfi ne ho: srade a ɛkata ayamde no so ne ayamde no ho srade nyinaa,

⁹ne asaabo abien no ne srade a ɛwɔ so, sisia mu no, ne mmerɛbo so ntontan no; omfi asaabo ho nyi,

¹⁰sɛnea woyi fi asomdwoe afɔre nantwi ho no; na ɔsɔfo no nhyew wɔ ɔhyew afɔremuka no so.

¹¹ Na ɔmfa nantwinini no nhoma ne ne nam nyinaa ne ne ti ne ne nnyawa ne n'ayamde ne ne n'agyanan no,

¹² nantwinini mu no nyinaa, mfi nkɔ nsra no akyi, nea ɛhɔ tew, nea wohwie nso gu, na ɔmfa ogya nhyew wɔ mmabaa so; nea wohwie nso gu na wɔnhyew.

¹³ Na sɛ Israel asafo nyinaa fom, na asɛm no ahintaw ɔman no, na wɔyɛ nneɛma a AWURADE ahyɛ sɛ wɔnnyɛ no mu bi, na wodi so,

¹⁴ na wohu bɔne a wɔayɛ de afom no a, ɛnne asafo no mfa nantwi ba onini mmra mmɛbɔ bɔne ho afɔre, na wɔmfa no mmra ahyiae ntamadan no ano.

¹⁵Na asafo no mu mpanyimfo mfa wɔn nsa ngu nantwinini no atifi, na wonkum nantwi no, AWURADE anim.

¹⁶Na ɔsɔfo a wɔasra no no mfa nantwinini no mogya no bi nhyɛn ahyiae ntamadan no mu,

¹⁷na ɔsɔfo no mfa ne nsatea mmɔ mogya no mu mfa mpete mpɛn asɔn, AWURADE anim, ntwamu mmɔhɔɔ no anim,

¹⁸na ɔmfa mogya no bi nkeka afɔremuka a esi AWURADE anim, ahyiae ntamadan no mu no mmɛn ho, na onhwie mogya no nyinaa ngu ɔhyew afɔremuka a esi ahyiae ntamadan ano no ase.

¹⁹Na onyi ne srade nyinaa mfi so, na ɔnhyew wɔ ɔhyew afɔremuka no so.

²⁰Na sɛnea ɔyɛɛ bɔne ho afɔre nantwinini no, saa ara na ɔnyɛ eyi nso; na ɔsɔfo no mpata mma wɔn, na wɔde bɛkyɛ wɔn.

²¹ Na ɔmfa nantwinini no mfi nkɔ nsra no akyi, na ɔnhyew no sɛnea wɔhyew kan nantwinini no, asafo no bɔne ho afɔre ne no.

²²Sɛ otitiriw bi anhyɛ da na ɔyɛ nneɛma a AWURADE ne Nyankopɔn ahyɛ sɛ wɔnnyɛ no nyinaa mu ade biako, na odi so, na sɛ wɔma ohu ne bɔne a wayɛ no a,

²³ɛnne ɔmfa n'ayɛyɛde a ɛyɛ ɔpapo a odi mu mmra;

²⁴na ɔmfa ne nsa nto ɔpapo no atifi, na onkum no nea wokum ɔhyew afɔre no wɔ AWURADE anim: bɔne ho afɔre nen.

²⁵Na ɔsɔfo no mfa ne nsatea mfa bɔne ho afɔre no mogya no bi nkeka ɔhyew afɔremuka no mmɛn ho, na onhwie ne mogya no ngu ɔhyew afɔremuka no ase.

²⁶Na ɔnhyew ne srade nyinaa wɔ ɔhyew afɔremuka no so sɛ asomdwoe afɔre srade no; na ɔsɔfo no mpata mma no, ne bɔne no ho, na wɔde bɛkyɛ no.

²⁷Na sɛ asase no so nkurɔfo no mu biara anhyɛ da na ɔyɛ nneɛma a AWURADE ahyɛ sɛ wɔnnyɛ no mu ade biako, na odi so, na sɛ wɔma ohu ne bɔne a wayɛ a,

²⁸ɛnne, ne bɔne a wayɛ no nti, ɔmfa n'ayɛyɛde, abirekyibere a odi mu mmra mmɛma;

²⁹na ɔmfa ne nsa nto bɔne ho afɔre no atifi, na onkum bɔne ho afɔre no, nea wokum ɔhyew afɔre hɔ.

³⁰Na ɔsɔfo no mfa ne nsatea nka mogya no bi nkeka ɔhyew afɔremuka no mmɛn ho, na onhwie ne mogya nyinaa ngu ɔhyew afɔremuka no ase.

³¹ Na onyi ɛho srade sɛnea woyi asomdwoe afɔre de no, na ɔsɔfo no nhyew wɔ ɔhyew afɔremuka no so, na enyi hua huamhuam mma AWURADE; na ɔsɔfo no mpata mma no, na wɔde bɛkyɛ no.

³²Na sɛ ɔde oguammaa bɛyɛ n'ayɛyɛde aba abɛbɔ bɔne ho afɔre a, ɔmfa ɔbere a odi mu mmra;

³³na ɔmfa ne nsa nto bɔne ho afɔre no atifi, na onkum no nyɛ bɔne ho afɔre, nea wokum ɔhyew afɔre hɔ.

³⁴Na ɔsɔfo no mfa ne nsatea nka bɔne ho afɔre no mogya no bi nkeka ɔhyew afɔremuka no mmɛn ho, na onhwie mogya no nyinaa ngu afɔremuka no ase.

³⁵Na onyi ne srade nyinaa, sɛnea woyi asomdwoe afɔre guammaa ho srade no, na ɔsɔfo no nhyew wɔ afɔremuka no so, sɛnea AWURADE gya afɔrebɔ te no; na ɔsɔfo no mpata mma no, ne bɔne a wayɛ no ho, na wɔde bɛkyɛ no.