Read Revised Akuapem Twi DC-KYERƐW KRONKRON Lewitikɔs 6 Bible Online

Lewitikɔs 6 - Revised Akuapem Twi DC-KYERƐW KRONKRON bible

Lewitikɔs 6

¹Na AWURADE kasa kyerɛɛ Mose sɛ:

²Sɛ obi yɛ bɔne di AWURADE kusum sɛ ɔsan ne yɔnko ade bi a ɔde ama no asie anaasɛ ɔde ahyɛ ne nsa, anaasɛ ɔbɔ korɔn, anaasɛ odi ne yɔnko amim,

³anaasɛ wahu biribi a ayera, na ɔsan, na ɔka ntanhunu, sɛ onipa yɛ eyinom biara mu bɔne,

⁴ na sɛ ɛba sɛ wayɛ bɔne na odi so saa a, ɔmfa ade a owiae, anaa ade a odii mu amim, anaa ade a wɔde maa no asie, anaa ade a ɛyerae a ohui,

⁵ anaa ade biara a ɔkaa ho ntanhunu no nsan mmra, ɔmfa ne nyinaa mmra, na ɔmfa abupɛn anum mu biako mpae so mma ɔdede, n'asodi ho afɔrebɔ da no ara;

⁶ na ɔmfa n'asodi ho afɔre a ɔde rebrɛ AWURADE no mmrɛ ɔsɔfo no, nguan mu dwennini a odi mu, sɛnea wɔbɛbɔ ne bo, na ɛnyɛ asodi ho afɔre.

⁷Na ɔsɔfo no mpata mma no wɔ AWURADE anim, na wɔde ade biara a wayɛ a odi ho so no bɛkyɛ no.

⁸Na AWURADE kasa kyerɛɛ Mose sɛ:

⁹ Hyɛ Aaron ne ne mma no sɛ: Eyi ne ɔhyew afɔre ho mmara, ɔhyew afɔre no ntena asammorofi, afɔremuka no so anadwo mu nyinaa nkosi anɔpa, na wɔmma afɔremuka no so gya no nnɛw wɔ so.

¹⁰ Na ɔsɔfo no nhyɛ ne nwera atade, na ɔnhyɛ ne nwera twakoto nkata ne ho, na ɔnsesaw nso a ɔhyew afɔre gya no hyew gyawee afɔremuka no so no ngu afɔremuka no nkyɛn.

¹¹ Na onyi ne ntade no, na ɔnhyɛ ntade foforo, na ɔmfa nso no mfi nkɔ nsra no akyi nkogu nea ɛhɔ tew.

¹²Na wɔmma afɔremuka so gya no nnɛw, ennnum ara da, na ɔsɔfo no nsɔ mmabaa wɔ so daa anɔpa, na onsiesie ɔhyew afɔre no wɔ so, na ɔnhyew so asomdwoe afɔre ho srade no.

¹³Ogya nnɛw afɔremuka no so daa, ennnum da.

¹⁴ Na eyi ne aduan afɔre ho mmara: Aaron mma no mfa mmra AWURADE anim wɔ afɔremuka no anim.

¹⁵Na ɔmfa aduan afɔre no asikresam no nsa ma, ne ngo no bi ne aduan afɔre no so huamfufu nyinaa, na ɔnhyew wɔ afɔremuka no so, na enyi hua huamhuam nyɛ nkae ade mma AWURADE.

¹⁶Na nkae no, Aaron ne ne mma no nni no apiti, wonni no nea ɛhɔ yɛ kronkron, ahyiae ntamadan no adiwo na wonni.

¹⁷Wɔmmfa mmɔkaw mmfra nnto; wɔn kyɛfa a mede mama wɔn wɔ me gya afɔre mu ne no; ɛyɛ akronkronne mu ade kronkron, sɛ bɔne ho afɔre ne asodi ho afɔre.

¹⁸Aaron mma mu mmarima nyinaa nni; ɛnyɛ AWURADE gya afɔre horow ho daa ahyɛde, mo awo ntoatoaso nyinaa mu; obiara a ɔka no nyɛ kronkron.

¹⁹Na AWURADE kasa kyerɛɛ Mose sɛ:

²⁰ Eyi ne Aaron ne ne mma ayɛyɛde a wɔmfa mmrɛ AWURADE, ɛda a wɔsra no ngo no, asikresam olonka abupɛn du mu biako nyɛ daa ayɛyɛde, anɔpa de fa na anwummere de fa.

²¹Wɔmfa ngo nkyew wɔ dadesanka mu; yɛ no nkyewa bra; yɛ no sɛ aduan afɔre a wɔatoto abubu mu asinasin bra, na enyi hua huamhuam mma AWURADE.

²²Na ɔsɔfo a wɔbɛsra no ngo asi n'ananmu wɔ ne mma mu no na ɔnyɛ; ɛyɛ AWURADE daa ahyɛde; wɔnhyew no mu.

²³Na ɔsɔfo no aduan afɔre nyinaa wɔnhyew no mu; wonnni bi.

²⁴Na AWURADE kasa kyerɛɛ Mose sɛ:

²⁵ Kasa kyerɛ Aaron ne ne mma no sɛ Eyi ne bɔne ho afɔre ho mmara: Nea wokum ɔhyew afɔre aboa no, ɛhɔ ara na wonkum bɔne ho afɔre de no, AWURADE anim; akronkronne mu adekronkron ne no.

²⁶Ɔsɔfo a ɔbɔ bɔne ho afɔre no na onni; nea ɛhɔ yɛ kronkron na wonni wɔ ahyiae ntamadan no adiwo.

²⁷Obiara a ɔka nam no nyɛ kronkron; na nea mogya no bi apete n'atade mu no nhoro nea ɛpetee mu no wɔ nea ɛhɔ yɛ kronkron.

²⁸Na ahina a wɔnoae wɔ mu no, wɔmmɔ, na sɛ kɔbere sɛn mu na wɔnoae a, wontwiw mu na wɔmfa nsu nhohoro mu.

²⁹Mmarima a wofi asɔfo abusua kuw mu nyinaa nni bi; ɛyɛ akronkronne mu adekronkron.

³⁰Na bɔne ho afɔre a wɔde ne mogya no bi ba ahyiae ntamadan mu bɛpata wɔ kronkronbea hɔ nyinaa, wonnni; wɔmfa ogya nhyew.