Read Revised Akuapem Twi DC-KYERƐW KRONKRON Yeremia 10 Bible Online

Yeremia 10 - Revised Akuapem Twi DC-KYERƐW KRONKRON bible

Yeremia 10

¹Israel fi, muntie asɛm a AWURADE reka akyerɛ mo:

²Sɛ AWURADE se ni: Munnsua amanaman kwan no, na munnsuro ɔsoro nsɛnkyerɛnne, na amanaman na wosuro ɛnonom.

³ Na aman no anyame yɛ ahuhude: Na ɛyɛ dua a wɔatwa kwae mu, odwumfo nsa ano adwuma a ɔde dade yɛe.

⁴Nnipa de dwetɛ ne sika hyehyɛ no; ɔde nnadewa ne asae bobɔ mu, na ampɔn.

⁵Wɔte sɛ ntɔrewa afuw mu krakrabotobi, na wontumi nkasa, ɔsoa na wɔsoa wɔn, efisɛ wontu anammɔn; munnsuro wɔn, na wontumi nyɛ bɔne bi, na papayɛ nso nni wɔn hɔ.

⁶Obiara nni hɔ a ɔte sɛ wo, AWURADE; wo na woyɛ kɛse, na wo din nso so, mmaninyɛ mu.

⁷Hena na ɔrensuro wo, amanaman hene, efisɛ wo na ɛfata wo. Na amanaman anyansafo nyinaa mu ne wɔn ahenni nyinaa mu, obiara nni hɔ a ɔte sɛ wo.

⁸Na wɔn nyinaa yɛ agyimifo ne nkwaseafo; ahoni kasakyerɛ! Enye mma hwee, ɛyɛ dua!

⁹Wɔde dwetɛ a wɔaboro fi Tarsis ba, ne sika nso fi Ufas, ɛyɛ odwumfo nsa ano adwuma; bibitama ne ntama a ɛberedum na efura wɔn, wɔn nyinaa yɛ adwumfo nsa ano adwuma.

¹⁰Na AWURADE ne nokware Nyankopɔn no, ɔne Onyankopɔn teasefo ne daa hene; n’abufuw nti asase wosow, na amanaman ntumi n’abufuhyew.

¹¹Saa na monse wɔn ni: Abosom a ɛnyɛ wɔn na wɔbɔɔ ɔsoro ne asase no, bɛyera efi asase so, ne ɔsoro ase.

¹² Onyankopɔn na ɔde ne tumi yɛɛ asase, de ne nyansa maa wiase tim hɔ, na ɔde ne nhumu trɛw ɔsoro mu.

¹³ Ɔma ne nne so a, nsu pii ba ɔsoro, na ɔma suwusiw tu fi asase ano noho. Ɔyɛ anyinam ka osu ho, otu mframa fi n’adekorabea.

¹⁴Nnipa nyinaa yɛ agyimifo a wonni nimdeɛ, sikadwumfo nyinaa ani wuwu wɔn ahoni ho, efisɛ wɔn agude no yɛ atoro, na ahome nni wɔn mu.

¹⁵Wɔyɛ adehunu nko, adwumahunu nko; wɔn asotwe bere no mu, wɔbɛyera.

¹⁶ Yakob kyɛfa nte sɛ eyinom, na ade nyinaa yɛfo ne no, na Israel ne n’apɛgyade a ne poma di so; asafo AWURADE ne ne din.

¹⁷Boaboa w’ahode ano fi asase so, wo a wote kurow a wɔatua ho no mu.

¹⁸Na sɛ AWURADE se ni: Hwɛ, meretow asase no sofo ataabo afei, na mahiahia wɔn ho, na wɔahu.

¹⁹ M’amane nti minnue, me pira yɛ me yaw; nanso mise: Me yaw ara ne no, na meso mu.

²⁰Me ntamadan asɛe, na me ntampehama nyinaa mu atetew; me mma afi me ho kɔ, na wonni hɔ; obiara nni hɔ a ɔbɛyere me ntamadan mu bio, na wasi me mmɔhɔɔ!

²¹Na ahwɛfo no adan mmoa, na wommisa AWURADE akyi kwan; ɛno nti wɔanni yiye, na wɔn a wɔhwɛ wɔn so no nyinaa abɔ apete.

²²Muntie dede bi, tie, ɛreba, na gyegyeegye kɛse fi atifi fam asase so reba, sɛ wɔrebɛyɛ Yuda nkurow no amamfo, ne sakraman tenabea.

²³ AWURADE, mahu sɛ onipa kwan nni ne nsam, enni onipa nsam, sɛnea ɔnam a obetutu n’anammɔn.

²⁴ AWURADE, teɛ me so, nso yɛ no sɛnea ɛfata nko; ɛnyɛ w’abufuw so, na woannwerɛw me.

²⁵ Ma w’abufuhyew ngu amanaman a wonnim wo no so, ne nkurɔfo a wɔmmɔ wo din no so, efisɛ wɔatetew Yakob, wɔatetew no amene no, na wɔayɛ ne tenabea no amamfo.