Read Revised Akuapem Twi DC-KYERƐW KRONKRON Yeremia 11 Bible Online

Yeremia 11 - Revised Akuapem Twi DC-KYERƐW KRONKRON bible

Yeremia 11

¹Asɛm a efi AWURADE nkyɛn baa Yeremia nkyɛn ni:

²Muntie apam yi mu nsɛm, na monka nkyerɛ Yuda mmarima ne Yerusalemfo.

³ Na ka kyerɛ wɔn sɛ: Sɛ AWURADE, Israel Nyankopɔn, se ni: Wɔadome nea ɔnte apam yi mu nsɛm

⁴a mehyɛɛ mo agyanom, da a miyii wɔn fii Misraim asase so fii dade fononoo no mu sɛ: Muntie me, na monyɛ nneɛma a mahyɛ mo no nyinaa, na moayɛ me ɔman, na me nso mayɛ mo Onyankopɔn,

⁵ na mama ntam a mekaa mo agyanom no agyina, sɛ mede asase a ɛsen nufusu ne ɛwo mɛma wɔn, sɛ ɛte nnɛ yi. Na migyee so sɛ: Amen, AWURADE!

⁶Na AWURADE ka kyerɛɛ me sɛ: Pae nsɛm yi nyinaa mu ka no Yuda nkurow ne Yerusalem mmorɔn so sɛ: Muntie apam yi mu nsɛm, na munni so.

⁷Efisɛ mehyɛɛ mo agyanom da a miyii wɔn fii Misraim asase so bae, na ɛde besi nnɛ, mitua ahema mehyɛ wɔn daa sɛ: Muntie me!

⁸ Nanso wɔantie, na wɔammrɛ wɔn aso ase, na wɔn nyinaa dii wɔn koma bɔne denyɛ so; enti mede apam yi a mehyɛɛ wɔn sɛ wonni so na wɔanni so no nsɛm nyinaa maba wɔn so.

⁹Na AWURADE ka kyerɛɛ me bio sɛ: Atuatew aba Yuda mmarima ne Yerusalemfo mu,

¹⁰wɔasan kɔ wɔn tete agyanom a wɔampɛ sɛ wotie me nsɛm no amumɔyɛ mu, na wodi anyame foforo akyi som wɔn. Israel fi ne Yuda fi ato m’apam a me ne wɔn agyanom pamee no.

¹¹ Enti sɛ AWURADE se ni: Hwɛ, mede bɔne a wɔrentumi mfi mu mereba wɔn so, na sɛ wosu frɛ me a, merentie wɔn.

¹² Ɛnna Yuda nkurow ne Yerusalemfo bɛkɔ akosu afrɛ anyame a wɔrehyew aduhuam ama wɔn no, nanso wɔrennye wɔn, wɔn amanehunu bere no mu.

¹³Na sɛ wo nkurow dodow te no, sɛ w’anyame nso dodow te nen, O Yuda; na sɛ Yerusalem mmorɔn dodow te no, saa ara na moasisi afɔremuka ama aniwude, afɔremuka a wɔhyew so aduhuam ma Baal.

¹⁴ Enti wo de, mpa kyɛw mma ɔman yi, na mma wɔn ho su ne mpaebɔ so, efisɛ wɔn amanehunu bere no mu, wosu frɛ me a, merentie.

¹⁵Me dɔfo adi asɛmmɔne yi, dɛn na ɔwɔ yɛ wɔ me fi? So mpaeyi ne afɔrebɔ nam beyi wo mmusu no? Sɛ w’amane no ba a, wubedi ahurusi?

¹⁶Anka AWURADE frɛ wo ngodua frɔmfrɔm fɛfɛ a ɛsow aba pa; nanso afei ɔde ahum kɛse huuyɛ asɔ ne ho gya, na wɔabubu n’abaa.

¹⁷Na asafo AWURADE a ɔtɛw wo no akyerɛ mmusu a ɛreba wo so, bɔne a Israel fi ne Yuda fi ayeyɛ, sɛ wɔhyew aduhuam ma Baal de huru me bo no nti a.

¹⁸Na AWURADE ma mihui, na mihu nso; ɛno mu na wokyerɛɛ me wɔn nsɛnnii.

¹⁹ Nanso me de, na mete sɛ oguammaa a odwo a wɔde no rekɔ akumii; na minnim sɛ wɔapam me tiri so sɛ: Momma yɛnsɛe dua no ne n’aba, na yentwa mfi ateasefo asase so, na wɔankae ne din bio.

²⁰ Asafo AWURADE a woyɛ ɔtemmufo trenee a wosɔ asaabo ne koma hwɛ, ma minhu w’aweredi wɔn so, na wo na mayi m’asɛm adi makyerɛ wo.

²¹ Enti sɛ AWURADE ka Anatot mmarima a wɔhwehwɛ wo akum wo na wɔka sɛ: Nhyɛ AWURADE din ho nkɔm na woanwu yɛn nsa ano, no ho ni,

²²ɛno nti sɛ asafo AWURADE se ni: Hwɛ, merebɛtwe wɔn aso: Mmerante bɛtotɔ afoa ano, na ɔkɔm akunkum wɔn mmammarima ne wɔn mmabea,

²³na nkae bi renka mma wɔn, na mede bɔne bɛba Anatot mmarima so, wɔn asotwe afe no mu.