Read Revised Akuapem Twi DC-KYERƐW KRONKRON Yeremia 14 Bible Online

Yeremia 14 - Revised Akuapem Twi DC-KYERƐW KRONKRON bible

Yeremia 14

¹AWURADE asɛm a ɛbaa Yeremia nkyɛn osu a antɔ ho ni.

²Yuda di nkɔmmɔ, na ne nkurow apon agurogurow, wɔde awerɛhow si wɔn ti ase twann, na Yerusalem nteɛm foro kɔ soro.

³Na wɔn mu atitiriw soma nkumaa no nsusaw; wɔba nsubon ano, wonnya nsu; wɔde wɔn nhina hunu san ba, wɔn ani awuwu, wɔn anim agu ase, wɔkatakata wɔn ti.

⁴ Osu a ɛntɔ asase no so nti na fam awo kesee no, akuafo ani awuwu, wɔakatakata wɔn ti.

⁵Na mfuwa so forotebere nso, ɔwo a, ogyaw ne mma, efisɛ wura bi nni hɔ.

⁶Na sare so mfurum gyinagyina mpampa so, wɔsom mframa sɛ sakraman, wɔn aniwa ayɛ siamoo, efisɛ ahaban bi nni hɔ.

⁷ Sɛ yɛn amumɔyɛ kasa tia yɛn mpo a, AWURADE, wo din nti yɛ ɛho biara; na yɛn nsanakyiri adɔɔso, wo na yɛayɛ wo bɔne.

⁸Wo a Israel hwɛ wo kwan, wo a wugye wɔn ohia bere mu, ɛdɛn nti na woyɛ sɛ asase yi so hɔho, sɛ ɔkwantenni a ɔsoɛ anadwo?

⁹ Ɛdɛn nti na woyɛ sɛ ɔbarima a wayɛ basaa, sɛ dɔmmarima a ontumi nnye nkwa? Nso wo ara na wowɔ yɛn mfinimfini, AWURADE, na wɔde wo din ato yɛn; nnyaw yɛn hɔ.

¹⁰Sɛ AWURADE ka kyerɛ ɔman yi ni: Saa ara na wɔpɛ sɛ wɔwɔ ntwɛtwɛdɛ, wɔansiw wɔn anan kwan; enti AWURADE nso ani nsɔ wɔn; afei na ɔbɛkae wɔn amumɔyɛ na watua wɔn bɔne so ka.

¹¹ Na AWURADE ka kyerɛɛ me sɛ: Mmɔ mpae nsrɛ papa mma ɔman yi.

¹² Ɛwom sɛ wodi mmuada de, nso merentie wɔn nkotɔsrɛ; na sɛ wɔbɔ ɔhyew afɔre ne aduan afɔre a, m’ani rensɔ wɔn, na afoa ne ɔkɔm ne owuyare na mede mɛdwerɛw wɔn koraa.

¹³Na mise: Aa AWURADE, hwɛ, adiyifo no ka kyerɛ wɔn sɛ: Morenhu afoa, na ɔkɔm remma mo so, na nokware asomdwoe na mede mɛma mo ɛha yi.

¹⁴ Na AWURADE ka kyerɛɛ me sɛ: Atoro na adiyifo no de hyɛ me din ho nkɔm; mensomaa wɔn, na menhyɛɛ wɔn na menkasa menkyerɛɛ wɔn ɛ; atoro anisoadehu ne nkɔmhyɛ ne asɛnhunu ne wɔn koma mu nnaadaa na wɔka kyerɛ mo yi.

¹⁵ Ɛno nti sɛ AWURADE ka adiyifo a wɔde me din hyɛ nkɔm nanso ɛnyɛ me na mesomaa wɔn, na wɔn de, wɔka sɛ: Afoa ne ɔkɔm remma asase yi so, no ho ni: Afoa ne ɔkɔm ara na ɛbɛdwerɛw adiyifo no.

¹⁶ Na ɔman a wɔhyɛ nkɔm kyerɛ wɔn no, ɔkɔm ne afoa no nti wobegugu Yerusalem mmorɔn so, na obi bi nni hɔ a obesie wɔn, wɔn ne wɔn yerenom ne wɔn mmabanin ne wɔn mmabea nyinaa; na mɛma wɔn bɔne abua wɔn atifi.

¹⁷ Enti ka nsɛm yi kyerɛ wɔn sɛ: M’aniwa poroporow nusu anadwo ne awia, na ennyae, efisɛ wɔde ɔbobɔ kɛse abobɔ me man babea ababaa, wɔapira no ma ayɛ yaw sɛ.

¹⁸Sɛ mifi mekɔ wuram a, hwɛ mihu, afoa ano atɔfo; na sɛ meba kurow mu a, hwɛ, ɔkɔm ano atɔfo ni; na odiyifo ne ɔsɔfo nyinaa kyinkyini asase no so, nso wonnim nea wɔrekɔ.

¹⁹ So ɔtow na woatow Yuda akyene, anaasɛ Sion ho ayɛ wo kra nwini? Ɛdɛn nti na woabɔ yɛn na yenni ɔyaresafo yi? Yɛhwɛ asomdwoe kwan, nso papa bi nni hɔ; yɛhwɛ ayaresa bere kwan nso, na hwɛ, abotutu na ɛwɔ hɔ.

²⁰ O AWURADE, yɛahu yɛn abususɛm, ne yɛn agyanom amumɔyɛ, na yɛayɛ wo bɔne.

²¹Wo din nti mpa yɛn; nhura w’anuonyam agua no ho; kae, mmubu w’apam a ɛda yɛne wo ntam no.

²²So amanaman ahuhude no mu bi wɔ hɔ a wɔma osu tɔ? Anaasɛ ɔsoro betumi ama obosu apete? So ɛnyɛ wo, AWURADE, yɛn Nyankopɔn? Wo na yɛhwɛ wo kwan ara, efisɛ wo ara na woayɛ eyinom nyinaa.