Read Revised Akuapem Twi DC-KYERƐW KRONKRON Yeremia 16 Bible Online

Yeremia 16 - Revised Akuapem Twi DC-KYERƐW KRONKRON bible

Yeremia 16

¹Na AWURADE asɛm baa me nkyɛn sɛ:

²Nware yere, na nnya mmabanin ne mmabea ɛha yi.

³Na sɛ AWURADE ka mmabanin ne mmabea a wɔwo ha yi, ne wɔn nanom a wɔwo wɔn ne wɔn agyanom a wɔwo wɔn asase yi so no ho ni:

⁴Owuyare bɛbobɔ wɔn ma wɔawuwu, wɔrenyɛ wɔn ayi na wɔrensie wɔn, wɔbɛdannan sumina asase ani, na afoa ne ɔkɔm bɛdwerɛw wɔn, na wɔn afunu ayeyɛ wim nnomaa ne asase so mmoa aduan.

⁵Na sɛ AWURADE se ni: Nhyɛn ofi a wosu mu mu, na nkɔ ayi ase na nnyam wɔn, efisɛ mayi m’asomdwoe afi ɔman yi so, AWURADE asɛm ni, mayi adɔe ne mmɔborohunu.

⁶Na nnipa akɛse ne nkumaa bewuwu asase yi so; wɔrensie wɔn na wɔrenyɛ wɔn ayi, na obi remmɔ ne ho akam, obi remmɔ tikwaw mma wɔn,

⁷na wɔremmubu abodoo mma wɔn, ayi ase, sɛ wɔde rema wɔn due, owufo no ho, na wɔremma wɔn awerɛkyekye kuruwa, obi n’agya ne ne na ho.

⁸Nanso nkɔ asanom fi ne wɔn nkɔtena ase nnidi nnom.

⁹ Na sɛ asafo AWURADE, Israel Nyankopɔn no, se ni: Hwɛ, merema ahosɛpɛw nne ne anigye nne, ayeforokunu nne ne ayeforo nne to atwa ɛha yi, mo aniwa mu ne mo bere yi so.

¹⁰Na sɛ woka nsɛm yi nyinaa kyerɛ ɔman yi na wɔka kyerɛ wo sɛ: Ɛdɛn nti na AWURADE ka adebɔne kɛse yi gu yɛn so yi, na dɛn ne yɛn amumɔyɛ anaasɛ dɛn ne yɛn bɔne a yɛayɛ AWURADE yɛn Nyankopɔn no?

¹¹Ɛnne ka kyerɛ wɔn sɛ: Esiane sɛ mo agyanom agyaw me, AWURADE asɛm ni, na wɔakodi anyame foforo akyi asom wɔn asɔre wɔn, na me de, wɔagyaw me, na me mmara nso, wɔanni so,

¹² na mo de, mudi asɛmmɔne sen mo agyanom, na hwɛ, mo nyinaa monam di mo koma bɔne denyɛ akyi a muntie me,

¹³enti mɛtow mo afi asase yi so agu asase bi a mo ne mo agyanom nnim so, na moakɔsom anyame foforo hɔ, awia ne anadwo, efisɛ merenhu mo mmɔbɔ.

¹⁴ Ne saa nti, hwɛ, AWURADE asɛm ni, nna bi reba a wɔrenka bio sɛ: Sɛ AWURADE a oyii Israelfo fii Misraim asase so bae no te ase yi,

¹⁵na mmom wɔbɛka sɛ: Sɛ AWURADE a oyii Israelfo fii atifi fam asase so ne nsaase a ɔpam wɔn kɔɔ hɔ nyinaa so no te ase yi. Na mede wɔn mɛsan maba wɔn asase a mede memaa wɔn agyanom no so.

¹⁶Hwɛ, mɛma wɔakɔfa apofofo pii aba, AWURADE asɛm ni, na wɔakoyi wɔn, na eyi akyi no mɛma wɔakɔfa abɔmmɔfo pii aba, na wɔakɔtwee wɔn afi mmepɔw nyinaa so ne nkoko nyinaa so ne abotan ntokuru mu.

¹⁷Na m’aniwa hwɛ wɔn akwan nyinaa, enhintaw me ɛ, na wɔn amumɔyɛ nso, ɛso nkatae m’anim ɛ.

¹⁸Na metua wɔn amumɔyɛ ne wɔn bɔne ka mmɔho, sɛ wɔagu m’asase ho fi, wɔde wɔn atantanne ne wɔn akyide afunu ahyɛ m’agyapade no ma.

¹⁹O AWURADE, m’ahoɔden ne m’aban dennen ne me guankɔbea ahohia da mu, wo nkyɛn na amanaman befi asase anoano aba abɛka sɛ: Atoro nko ne yɛn agyanom awunnyade no, ahuhude a mfaso nni mu.

²⁰So onipa bɛyɛ anyame a wɔnyɛ anyame afa?

²¹Ɛno nti, hwɛ, mɛma wɔahu pɛnkoro yi, mɛma wɔahu m’ahoɔden ne me tumi, na wɔahu sɛ me din ne AWURADE.