Read Revised Akuapem Twi DC-KYERƐW KRONKRON Yeremia 19 Bible Online

Yeremia 19 - Revised Akuapem Twi DC-KYERƐW KRONKRON bible

Yeremia 19

¹Sɛ AWURADE kae ni: Kɔ na kɔtɔ ɔnwemfo nkyɛn kuruwa bi, na fa ɔman no mu mpanyimfo ne asɔfo mu mpanyimfo no bi ka wo ho,

² na fi adi kɔ Hinom ba bon a ɛwɔ anwemfo pon ano no mu, na pae nsɛm a mɛka makyerɛ wo no wɔ hɔ.

³ Na ka sɛ: Muntie AWURADE asɛm, Yuda ahemfo ne Yerusalemfo. Sɛ asafo AWURADE, Israel Nyankopɔn se ni: Hwɛ, mede adebɔne reba ɛha yi a obiara a ɔbɛte no, n’asom bɛyɛ no yɔnn.

⁴Efisɛ ɔman no agyaw me, na wɔadi ananafo asɛm ɛha yi, na wɔahyew aduhuam wɔ ha, ama anyame foforo a wɔne wɔn agyanom ne Yuda ahene nhuu wɔn pɛn, na wɔde bemdifo mogya ahyɛ ɛha yi ma.

⁵ Na wɔasisi Baal sorɔnsorɔmmea, sɛ wɔde ogya bɛhyew wɔn mma abobɔ ɔhyew afɔre ama Baal, nso menhyɛɛ wɔn saa, na ɛmaa me komam da.

⁶Ne saa nti, hwɛ, AWURADE asɛm ni, nna bi reba a wɔremfrɛ ha yi sɛ Tofet anaasɛ Hinom ba bon bio, na mmom wɔbɛfrɛ no: Okum bon.

⁷ Na mɛma Yuda ne Yerusalem agyina ayɛ hunu ɛha yi, na mama wɔatotɔ afoa ano, wɔn atamfo anim ne wɔn a wɔhwehwɛ wɔn kra no nsam, na mede wɔn afunu mama wim nnomaa ne wuram mmoa adi.

⁸ Na mɛyɛ kurow yi amamfo ne fɛwdi, obiara a obetwam wɔ ho no, ne sɛe no nyinaa nti ne ho bedwiriw no na wabɔ hwirema hweehwee.

⁹ Na mɛma wɔadi wɔn mmammarima nam ne wɔn mmabea nam, na wobedi wɔn ho wɔn ho nam, ahohia ne ahoguan a wɔn atamfo ne wɔn a wɔhwehwɛ wɔn akum wɔn no de beguan wɔn ho no mu.

¹⁰Na bɔ kuruwa no mmarima a wɔne wo kɔe no anim,

¹¹ na ka kyerɛ wɔn sɛ: Sɛ asafo AWURADE se ni: Sɛnea wɔbɔ ɔnwemfo kuku a wontumi nyɛ no yiye bio no, saa ara na mɛbɔ ɔman yi ne kurow yi. Na Tofet ara na wobesie wɔn, efisɛ wɔrennya baabi nsie bio.

¹²Saa na mɛyɛ ɛha yi ne ɛhafo, AWURADE asɛm ni, na mede kurow yi mɛyɛ sɛ Tofet.

¹³ Na Yerusalem afi ne Yuda ahene afi no ho begu fi sɛ Tofet hɔ, adan a wɔahyehyew atifi aduhuam ama ɔsoro asafo nyinaa no nyinaa, na wɔahwie ahwiesa ama anyame foforo no.

¹⁴Ɛnna Yeremia fii Tofet, nea AWURADE somaa no adiyisɛm ka hɔ bae, na okogyinaa AWURADE fi abangua mu, na ɔka kyerɛɛ ɔman no nyinaa sɛ:

¹⁵Sɛ asafo AWURADE, Israel Nyankopɔn se ni: Hwɛ, mede bɔne a maka magu kurow yi so no nyinaa bɛba ɛno ne ɛho nkurow nyinaa so, efisɛ wɔasen wɔn kɔn, nea ɛbɛyɛ na wɔantie me nsɛm.