Read Revised Akuapem Twi DC-KYERƐW KRONKRON Yeremia 21 Bible Online

Yeremia 21 - Revised Akuapem Twi DC-KYERƐW KRONKRON bible

Yeremia 21

¹ Asɛm a efi AWURADE hɔ baa Yeremia nkyɛn, bere a ɔhene Sedekia somaa Malkiya ba Pashur ne Maaseia ba ɔsɔfo Sefania baa ne nkyɛn sɛ:

²Bisa AWURADE hɔ ade ma yɛn, efisɛ Babel hene Nebukadnesar ne yɛn rebedi ako, ebia AWURADE ne yɛn bedi sɛ n’anwonwade no nyinaa te no, na wafi yɛn so akɔ.

³Ɛnna Yeremia ka kyerɛɛ wɔn sɛ: Monka nkyerɛ Sedekia sɛ:

⁴Sɛ AWURADE, Israel Nyankopɔn se ni: Hwɛ, meredan mo nsam akode a mode ne Babel hene ne Kaldeafo a wɔabetua mo ɔfasu akyi reko no, na maboa ano maba kurow yi mfinimfini.

⁵Na me ara mede nsa a ateɛ ne basa a ɛyɛ den ne abufuw ne abohuru ne anibere kɛse ne mo bɛko,

⁶na mabɔ kurow yi mufo, nnipa ne mmoa. Owuyare kɛse ano na wobewuwu.

⁷Na ɛno akyi no, AWURADE asɛm ni, meyi Yuda hene Sedekia ne ne nkoa ne ɔman no ne nnipa a wɔaka kurow yi mu a wɔafi owuyare ne afoa ne ɔkɔm mu no mahyɛ Babel hene Nebukadnesar nsa, ne wɔn atamfo nsa, ne wɔn a wɔhwehwɛ wɔn kra no nsa, na wakunkum wɔn afoa ano, ɔrenkora wɔn so na ɔrenhu mma wɔn na ɔrenhu wɔn mmɔbɔ.

⁸ Na ɔman yi nso, ka kyerɛ wɔn sɛ: Sɛ AWURADE se ni: Hwɛ, mede nkwa kwan ne owu kwan meregu mo anim,

⁹ nea ɔtena kurow yi mu no bewu afoa ne ɔkɔm ne owuyare ano, na nea ofi adi na ɔkɔbɔ Kaldeafo a wobetua mo no so no, obenya nkwa, na ne kra adan no asade.

¹⁰Na mede m’ani makari kurow yi, sɛ bɔne na ɛmmra no so, na ɛnyɛ papa, AWURADE asɛm ni, wɔde bɛhyɛ Babel hene nsa na ɔde ogya ahyew no.

¹¹Na ka kyerɛ Yuda hene fi sɛ: Muntie AWURADE asɛm.

¹² Dawid fi, sɛ AWURADE se ni: Munni asɛntrenee anɔpa, na munyi nea wɔafow no mfi omimfo nsam, na m’abufuhyew amfi sɛ ogya ammɛhyew a obi rennum, mo nsɛnnii bɔne no nti.

¹³Hwɛ, me ne mo a mote obon mu, asasetaw so botan so no anya, AWURADE asɛm ni, mo a moka sɛ: Hena na obesian aba yɛn so anaa hena na ɔbɛba yɛn tenabea no?

¹⁴Na mɛba mabetua mo ka sɛ mo nsɛnnii aba te no, AWURADE asɛm ni, na mɛsɔ ogya, ne kwae mu, na ahyew nneɛma nyinaa ahyia ho.