Read Revised Akuapem Twi DC-KYERƐW KRONKRON Yeremia 26 Bible Online

Yeremia 26 - Revised Akuapem Twi DC-KYERƐW KRONKRON bible

Yeremia 26

¹Yuda hene Yehoiakim a ɔyɛ Yosia ba ahenni mfiase na asɛm yi fii AWURADE nkyɛn bae sɛ:

²Sɛ AWURADE se ni: Kogyina AWURADE fi abangua mu, na Yuda nkurow a wɔba AWURADE fi asɔre no nyinaa, ka nsɛm a mehyɛ wo sɛ ka kyerɛ wɔn no nyinaa gu wɔn so; nyi asɛm biara mfi mu;

³ ebia wobetie, na wɔasan afi wɔn akwammɔne so, na manu me ho, bɔne a ɛwɔ me tirim sɛ wɔn nneyɛe bɔne nti mɛyɛ wɔn no ho.

⁴Na ka kyerɛ wɔn sɛ: Sɛ AWURADE se ni: Sɛ muntie me, nni me mmara a, mede metoo mo anim no so

⁵ na muntie me nkoa adiyifo a meresoma wɔn mo nkyɛn a mitua ahema mesoma wɔn na moantie no nsɛm no a,

⁶ ɛno de mɛyɛ ofi yi sɛ Silo, na mede kurow yi mɛyɛ nnome mama asase so amanaman nyinaa.

⁷Na asɔfo ne adiyifo ne ɔman no nyinaa tee sɛ Yeremia reka nsɛm yi AWURADE fi.

⁸Na Yeremia wiee nsɛm a AWURADE hyɛɛ no sɛ ɔnka nkyerɛ ɔman no nyinaa ka no nyinaa no, asɔfo ne adiyifo ne ɔman no nyinaa bumaa no kae sɛ: Owu na wubewu.

⁹Ɛdɛn nti na wode AWURADE din hyɛ nkɔm sɛ: Ofi yi bɛyɛ sɛ Silo, na kurow yi bɛsɛe a obi rentena mu? Na ɔman no nyinaa behyiaa AWURADE fi hyɛɛ Yeremia.

¹⁰Na Yuda mmapɔmma tee nsɛm yi no, wofii ahemfi foro baa AWURADE fi, na wɔbɛtenaa ase, AWURADE ponkɛse foforo no ano.

¹¹ Na asɔfo ne adiyifo no ka kyerɛɛ mmapɔmma ne ɔman no nyinaa sɛ: Wommu ɔbarima yi kumfɔ, efisɛ wahyɛ kurow yi ho nkɔm sɛnea motee no.

¹²Ɛnna Yeremia ka kyerɛɛ mmapɔmma no nyinaa ne ɔman no nyinaa sɛ: AWURADE na asoma me sɛ memmɛhyɛ ofi yi ne kurow yi ho nkɔm menka nsɛm a motee no nyinaa.

¹³ Na afei momma mo akwan ne mo nneyɛe nyɛ yiye, na muntie AWURADE mo Nyankopɔn, na AWURADE nnu ne ho bɔne a ɔkae mo ho no ho.

¹⁴Na me de, hwɛ, mewɔ mo nsam, monyɛ me sɛ eye na ɛteɛ mo ani so.

¹⁵Ohu nko na munhu sɛ, sɛ mukum me a, mogya a edi bem na mobɛsesaw agu mo ne kurow yi ne emutefo so, na nokwarem, AWURADE na asoma me mo nkyɛn, sɛ memmɛka nsɛm yi nyinaa mingu mo asom.

¹⁶Ɛnna mmapɔmma ne ɔman no nyinaa ka kyerɛɛ asɔfo ne adiyifo no sɛ: Ɔbarima yi nsɛ owu, efisɛ AWURADE yɛn Nyankopɔn din mu na ɔkasa kyerɛɛ yɛn.

¹⁷Na mmarima bi fi asase no so mpanyimfo mu sɔree, na wɔka kyerɛɛ ɔman baguafo no nyinaa sɛ:

¹⁸ Mika a ofi Moreset hyɛɛ nkɔm Yuda hene Hesekia bere so, na ɔka kyerɛɛ Yuda man nyinaa sɛ: Sɛ asafo AWURADE se ni: Wobefuntum Sion sɛ afuw, na Yerusalem adan afabo akuwakuw, na ofi no bepɔw no adan kwae mu sorɔnsorɔmmea.

¹⁹ So okum na Yuda hene Hesekia ne Yuda nyinaa kum no anaa? So ɛnyɛ AWURADE na osuroo no, na ɔkotɔ srɛɛ AWURADE, na AWURADE nso nuu ne ho bɔne a ɔka guu wɔn so no ho? Na yɛn de, yɛreyɛ bɔne kɛse atia yɛn kra yi?

²⁰Na ɔbarima bi nso wɔ hɔ a ɔbɛkaa adiyisɛm AWURADE din mu, Semaia ba Uria a ofi Kiriat-yearim, na ɔhyɛɛ kurow yi ne asase yi ho nkɔm sɛ Yeremia de no ara.

²¹Na ɔhene Yehoiakim ne ne nnɔmmarima nyinaa ne mmapɔmma no nyinaa tee ne nsɛm no, anka ɔhene hwehwɛ no akum no. Na Uria tee, na osuroe, na oguan kɔɔ Misraim.

²²Na ɔhene Yehoiakim somaa mmarima bi kɔɔ Misraim, Akbor ba Elnatan ne mmarima bi a wɔka ne ho, na wɔkɔɔ Misraim,

²³na wɔfaa Uria fii Misraim de no brɛɛ ɔhene Yehoiakim, na ɔde afoa kum no, na ɔtow ne funu kyenee nkurɔfo mma ada so.

²⁴ Nso Safat ba Ahikam nsa na ɛda Yeremia ho, nea ɛbɛyɛ na wɔamfa no anhyɛ ɔman no nsa na wɔankum no.