Read Revised Akuapem Twi DC-KYERƐW KRONKRON Yeremia 42 Bible Online

Yeremia 42 - Revised Akuapem Twi DC-KYERƐW KRONKRON bible

Yeremia 42

¹Na dɔm asafohene no nyinaa ne Karea ba Yohanan ne Hosaia ba Yesania ne ɔmanfo no nyinaa, efi akumaa so kosi ɔkɛse so twiw bɛnee

² bɛka kyerɛɛ odiyifo Yeremia sɛ: Ma yɛn nkotɔsrɛ mmra w’anim ɛ, na bɔ AWURADE wo Nyankopɔn mpae ma yɛn ne nkae yi nyinaa, efisɛ yɛne kakraa bi a yɛaka nnipa bebree mu, sɛnea wuhu yɛn yi,

³na AWURADE wo Nyankopɔn nkyerɛ yɛn ɔkwan a yɛnnantew so, ne nea yɛnyɛ nso.

⁴Na odiyifo Yeremia ka kyerɛɛ wɔn sɛ: Mate. Hwɛ, merebɛbɔ AWURADE mo Nyankopɔn mpae sɛ mokae no, na asɛm biara a AWURADE bebua mo no, mɛka makyerɛ mo; meremfa asɛm biara minsiw mo.

⁵Na wɔn nso ka kyerɛɛ Yeremia sɛ: AWURADE nyɛ yɛn nokware dansefo pintinn sɛ AWURADE wo Nyankopɔn asɛm biara a ɔde bɛsoma wo yɛn nkyɛn no, sɛ ɛnyɛ saa na yɛbɛyɛ a, yɛka!

⁶Sɛ papa oo, bɔne oo, AWURADE yɛn Nyankopɔn a yɛresoma wo ne nkyɛn no nne na yebetie, na asi yɛn yiye, sɛ yetie AWURADE yɛn Nyankopɔn nti.

⁷Na dadu akyi no, AWURADE asɛm baa Yeremia nkyɛn.

⁸Na ɔfrɛɛ Karea ba Yohanan ne dɔm asafohene a wɔka ne ho no nyinaa ne ɔman no nyinaa, efi akumaa so kosi ɔkɛse so, bae,

⁹na ɔka kyerɛɛ wɔn sɛ: Sɛ AWURADE Israel Nyankopɔn a mosomaa me ne nkyɛn sɛ memma mo nkotɔsrɛ nnu n’anim no se ni:

¹⁰Sɛ mobɛtena asase yi so a, ɛnne mesi mo, na merennwiriw, na medua mo, na merentutu mo, efisɛ manu me ho, bɔne a meyɛɛ mo no ho.

¹¹Munnsuro Babel hene a musuro n’anim yi anim; munnsuro no, AWURADE asɛm ni, na me na midi mo akyi sɛ megye mo nkwa na mayi mo afi ne nsam;

¹²na mɛdom mo, na mama wahu mo mmɔbɔ, na wama moasan aba mo asase so.

¹³Na sɛ moka sɛ: Yɛrentena asase yi so, na muntie AWURADE mo Nyankopɔn nne

¹⁴ka sɛ: Daabi, na yɛbɛkɔ Misraim asase so a yɛrenhu dɔm na yɛrente torobɛntohyɛn na aduankɔm renne yɛn, na yɛakɔtena hɔ, a,

¹⁵ɛnne afei muntie AWURADE asɛm, mo Yuda nkae a aka yi: Sɛ asafo AWURADE, Israel Nyankopɔn, se ni: Sɛ mode mo ani to so sɛ mobɛkɔ Misraim akɔsoɛ hɔ ahɔho a,

¹⁶ɛnne afoa a musuro no ara bɛto mo wɔ hɔ, Misraim asase no so, na ɔkɔm a mo koma tutu ho no bedi mo akyi Misraim hɔ, na ɛhɔ ara na mubewuwu.

¹⁷ Na mmarima a wɔde wɔn ani to so sɛ wɔbɛkɔ Misraim akɔyɛ hɔ ahɔho no nyinaa bewuwu afoa ne ɔkɔm ne owuyare ano, na wɔn mu biara renka, anaasɛ ɔremfi bɔne a mede mɛba wɔn so no mu.

¹⁸Na sɛ asafo AWURADE, Israel Nyankopɔn, se ni: Sɛnea m’abufuw ne m’abufuhyew hwie guu Yerusalemfo so no, saa ara na mokɔ Misraim a, m’abufuhyew behwie agu mo so, na moadan ntankade ne ahodwiriwde ne nnome ne nsopa, na morenhu ha yi bio.

¹⁹AWURADE aka akyerɛ mo, Yuda nkae, sɛ monnkɔ Misraim! Na munhu pefee sɛ madi mo adanse nnɛ.

²⁰ Na moatwa mo ankasa mo kra nkontompo, efisɛ mo ara na mosomaa me AWURADE mo Nyankopɔn nkyɛn sɛ: Bɔ AWURADE yɛn Nyankopɔn mpae ma yɛn, na sɛnea AWURADE yɛn Nyankopɔn bɛka nyinaa no, saa na ka kyerɛ yɛn na yɛnyɛ.

²¹Na maka makyerɛ mo nnɛ, nso moantie AWURADE mo Nyankopɔn, ne nea ɔde somaa me mo nkyɛn no nyinaa.

²²Na afei, munhu pefee sɛ afoa ne ɔkɔm ne owuyare ano na mubewuwu, nea mo ani gyina sɛ morekɔ akɔyɛ hɔ ahɔho no.