Read Revised Akuapem Twi DC-KYERƐW KRONKRON Yeremia 6 Bible Online

Yeremia 6 - Revised Akuapem Twi DC-KYERƐW KRONKRON bible

Yeremia 6

¹ O Benyamin mma, mommɔ mo ho aguaa mfi Yerusalem, na monhyɛn torobɛnto Tekoa, na munsi frankaa Bet-hakerem! Na adebɔne bi ne ɔsɛe kɛse repue afi atifi fam.

²Ɔhoɔfɛfo a ɔkokɔ ne ho no, Sion babea no, metwa no akyene.

³ Mmoahwɛfo ne wɔn mmoakuw bɛba no so; wobesisi wɔn ntamadan atwa ne ho ahyia, na wɔn mu biara adidi n’afa.

⁴Monnoa no so ɔsa; monsɔre mma yɛnkɔtoa no awia ketee. Yennue! Na ade resa, na anwummere sunsuma mu atwe.

⁵Monsɔre mma yɛnkɔtoa no anadwo, na yɛnkɔsɛe n’ahemfi no.

⁶Na sɛ AWURADE, asafo Nyankopɔn se ni: Montotow Yerusalem nnua ngu, na monhɔre ho mpempe, ɛyɛ kurow a ɛsɛ asotwe, amimdi nko ara na ɛwɔ mu.

⁷Sɛ asubura mu nsu tue no, sɛ ne bɔne nso tue ne no; wɔte atirimmɔden ne nhyɛso nka wɔ mu, ɔyare ne akuru wɔ m’anim daa yi.

⁸Yerusalem, ma wɔnteɛ wo so, na me kra antwe amfi wo ho, na mamma woannan amamfo, asase a obiara nte so.

⁹Sɛ asafo AWURADE se ni: Wobedi Israel nkae ho mpɛpɛwa sɛ obobe ho. Himahima wo nsa kɔ nkyerɛnkyɛ mu sɛ obobe abatewfo.

¹⁰Hena na menkasa menkyerɛ no, na minni adanse, na watie? Hwɛ, wɔn aso asisiw, na wontumi ntie asɛm; hwɛ, AWURADE asɛm adan wɔn ahohorade, ɛnyɛ wɔn dɛ.

¹¹Enti AWURADE abufuhyew ahyɛ me ma, mabrɛ ne me ho so hyɛ: Hwie gu mmorɔn so mmotafowa ne mmerante asafo no nyinaa so; na wɔbɛkyere okunu ne ɔyere nyinaa, akwakoraa ne nea wadi nna amee.

¹²Na wɔn afi bɛyɛ afoforo de, nsaase ne ɔyerenom nyinaa, na mɛteɛ me nsa maka asase no sofo no, AWURADE asɛm ni.

¹³ Na efi wɔn mu akumaa so kosi wɔn mu ɔkɛse so, wɔn nyinaa yɛ adifudepɛfo, na efi odiyifo so kosi ɔsɔfo so, wɔn nyinaa yɛ nkontompofo.

¹⁴ Na wɔsa me man kuru adwenhare so ka sɛ: Asomdwoe, asomdwoe! Nso asomdwoe nni hɔ.

¹⁵So wɔn ani wuu akyide a wɔyɛe no ho? Daabi, wɔn ani anwu koraa, na wɔn anim nso ansiam; ne saa nti wɔbɛtotɔ atɔfo mu. Ɛbere a mɛba mabɛtwe wɔn aso no, wɔbɛhwehwe ase, AWURADE na ose.

¹⁶ Sɛ AWURADE se ni: Munkogyina akwan so na monhwɛ, na mummisa tete atempɔn no, nea ɔkwan pa no wɔ, na momfa so, na munnya ɔhome mma mo kra. Nanso wose: Yɛremfa so.

¹⁷ Na masisi mo so awɛmfo sɛ: Monyɛ aso mma torobɛntohyɛn no. Nanso wose: Yɛrenyɛ aso.

¹⁸Ɛno nti, amanaman, muntie, na mo asafo, munhu nea ɛrebɛyɛ wɔn.

¹⁹ Asase, tie, hwɛ, me na mede bɔne mereba ɔman yi so, wɔn nneyɛe so aba no, efisɛ wɔanyɛ aso amma me nsɛm, na me mmara nso wɔapa.

²⁰ Dɛn na aduhuam a wɔde fi Saba ba ne ahwerew pa a efi akyirikyiri asase so no yɛ ma me? Mo hyew afɔre nsɔ m’ani, na mo kum afɔre nyɛ me dɛ.

²¹Enti sɛ AWURADE se ni: Hwɛ, mede hintidua mereto ɔman yi anim, na wɔahintihintiw so, agyanom ne mma nyinaa, na ofipamfo ne ɔyɔnko ayera.

²² Sɛ AWURADE se ni: Hwɛ, ɔman bi fi atifi fam asase so reba, na ɔman kɛse bi ahwanyan ne ho fi asase anoano tɔnn,

²³ wokurakura ta ne pɛmɛ, wɔn tirim yɛ den na wonni timmɔbɔ; wɔn nne te sɛ po huuyɛ, na wɔtete apɔnkɔ so; wɔamia sɛ akofofo, sɛ wɔne wo, Sion babea, rebɛko.

²⁴Yɛate wɔn nka, yɛn nsam agow, yɛn ho yeraw yɛn, awoko a ɛte sɛ ɔbaa wofo de.

²⁵Mfi adi nkɔ wuram, na nnantew ɔkwan so; na ɔtamfo kura afoa, ehu atwa wo ho ahyia.

²⁶ Me man babea, fura atweaatam na yantam nso mu; twa agyaadwo a ɛte sɛ ɔbakoro ho de, bɔ abubuw a ɛyɛ yaw, efisɛ mpofirim na ɔsɛefo bɛba yɛn so.

²⁷Mede wo masi me man a ɛyɛ sikatwa bo so twahwɛfo, sɛ hu na sɔ wɔn akwan hwɛ.

²⁸ Wɔn nyinaa yɛ asoɔdenfo atuatewfo, wɔnenam di nseku, wɔyɛ kɔbere ne dade ara nko; wɔn nyinaa yɛ nkontompofo.

²⁹Afa rehuw, ogya rehyew sumpii; wɔnannan no kwa, efisɛ wonyii abɔnefo mfii wɔn mu.

³⁰ Wɔfrɛ wɔn dwetɛ a wɔapo, efisɛ AWURADE apo wɔn.