Read Revised Akuapem Twi DC-KYERƐW KRONKRON Yeremia 7 Bible Online

Yeremia 7 - Revised Akuapem Twi DC-KYERƐW KRONKRON bible

Yeremia 7

¹Asɛm a efi AWURADE nkyɛn baa Yeremia nkyɛn se:

²Kogyina AWURADE fi ponkɛse mu, na kɔpae asɛm yi mu ka wɔ hɔ sɛ: Muntie AWURADE asɛm, mo Yudafo a mofa aponkɛse yi mu bɛsɔre AWURADE nyinaa.

³ Sɛ asafo AWURADE, Israel Nyankopɔn se ni: Momma mo akwan ne mo nsɛnnii nyɛ yiye, na mama moatena ha yi.

⁴Mommfa mo ho nnto atosɛm so se: AWURADE asɔrefi, AWURADE asɔrefi, AWURADE asɔrefi ni!

⁵Na sɛ moma mo akwan ne mo nsɛnnii yɛ yiye ampa, sɛ mubu onipa ne ne yɔnko ntam atɛntrenee,

⁶ sɛ monhyɛ ɔhɔho, ayisaa ne okunafo so, na munhwie mogya a edi bem ngu ha yi, na munni anyame foforo akyi mfa nyɛ mo ho bɔne a,

⁷ɛno na mɛma moatena ha yi, asase a mede memaa mo agyanom sɛ emfi daa nkosi daa no so.

⁸Hwɛ, mode mo ho to atosɛm a enye mma hwee no so.

⁹So mobɛbɔ korɔn, adi awu, asɛe aware, akeka ntanhunu, akɔhyew aduhuam ama Baal, akodi anyame foforo a munnim wɔn akyi,

¹⁰ ansa na moaba abegyina m’anim ofi yi a wɔde me din ato no yi mu na moaka sɛ: Wɔayi yɛn afi mu! Nea ɛbɛyɛ na moakɔ so ayɛ akyide yi nyinaa anaa?

¹¹ So adwowtwafo tu na ofi a wɔde me din ato no yi ayɛ mo ani so anaa? Me nso, hwɛ, mahu, AWURADE asɛm ni.

¹² Na monkɔ me tenabea a ɛwɔ Silo a miyii kan sɛ me din ntena hɔ no, na monkɔhwɛ nea me man Israel bɔne no nti mayɛ no.

¹³ Na afei, esiane sɛ moayɛ eyinom nyinaa, AWURADE asɛm ni, na matua ahema makasa makyerɛ mo, makasa na moantie, na mafrɛ mo nso na moannye so nti,

¹⁴ mɛyɛ ofi a wɔde me din ato no a mode mo ho to so no, ne tenabea a mede memaa mo ne mo agyanom no, sɛnea meyɛɛ Silo no ara,

¹⁵ na matotow mo mafi m’anim magu, sɛnea metow mo nuanom nyinaa, Efraim asefo nyinaa, migui no.

¹⁶ Enti wo de, mpa kyɛw bi mma ɔman yi, nso mma wɔn ho nkɔmmɔdi ne mpaebɔ so, na nsrɛ mma wɔn, efisɛ merentie wo.

¹⁷So wunhu nea wɔreyɛ Yuda nkurow mu ne Yerusalem mmorɔn so no anaa?

¹⁸ Mma tase nnyina, na agyanom sɔ ogya, na mmea fɔtɔw mmɔre sɛ wɔreyɛ tetare ama ɔsoro hemmaa no[1] na wɔagu anyame foforo ahwiesa, de yi me abufuw.

¹⁹So me na woyi me abufuw? AWURADE asɛm ni, so ɛnyɛ wɔn ho aniwu na wɔhyɛ?

²⁰Enti sɛ AWURADE Nyankopɔn se ni: Hwɛ, wobehwie m’abufuw ne m’aboɔhyew agu ɛha yi, nnipa ne mmoa, wura mu nnua ne asase so aba so, na adɛw a ɛrennum.

²¹ Sɛ asafo AWURADE, Israel Nyankopɔn, se ni: Momfa mo hyew afɔre nka mo kum afɔre ho, na munni nam.

²² Efisɛ da a miyii mo agyanom fii Misraim asase so no, manka wɔn ɔhyew afɔre ne okum afɔre ho asɛm, na manhyɛ wɔn ɛho mmara bi;

²³ na mmom asɛm yi ho mmara na mehyɛɛ wɔn sɛ: Muntie me, na mɛyɛ mo Onyankopɔn, na mo nso moayɛ me ɔman; na monnantew me kwan a mahyɛ mo ho mmara nyinaa so, na awie mo yiye.

²⁴ Nanso wɔantie, na wɔammrɛ wɔn aso ase, na wɔfaa wɔn ankasa kwan so, dii wɔn koma bɔne denyɛ akyi, na wɔsan wɔn akyi, na wɔankɔ anim.

²⁵Efi da a mo agyanom fii Misraim asase so de besi nnɛ da yi, masoma me nkoa nyinaa, adiyifo no, aba mo nkyɛn; daa na mitua ahema mesoma wɔn,

²⁶ nanso wɔantie me, na wɔammrɛ wɔn aso ase, na wosen wɔn kɔn yɛɛ bɔne sen wɔn agyanom.

²⁷Na woka nsɛm yi nyinaa kyerɛ wɔn a, wɔrentie wo, na wofrɛ wɔn a, wɔrennye wo so.

²⁸ Na ka kyerɛ wɔn sɛ: Eyi ne ɔman a wontie AWURADE wɔn Nyankopɔn na wontie nteɛso no; nokware asa, na atu afi wɔn anom.

²⁹Yi wo ti nwi gu, na twa mpampa pataa so agyaadwo, na AWURADE apa nnɛ mma a ne bo afuw wɔn no asum wɔn agu.

³⁰ Na Yuda mma ayɛ m’ani so bɔne, sɛ AWURADE se ni, wɔde wɔn akyide asisi ofi a wɔde me din ato no mu, de agu ho fi;

³¹ na wɔasisi sorɔnsorɔmmea a ɛwɔ Hinom ba bon mu no, de hyew wɔn mmabanin ne wɔn mmabea ogya mu; nso menhyɛɛ wɔn sa, na ɛmaa me komam da.

³² Enti sɛ AWURADE se ni, hwɛ, nna bi reba, a wɔremfrɛ no Tofet anaa Hinom ba bon bio, na mmom okum bon, na wobesie nnipa Tofet hɔ, siebea a wonnya nti.

³³ Na ɔman yi afunu bɛyɛ aduan ama wim nnomaa ne asase so mmoa, na wɔrennya obi mpam wɔn.

³⁴ Na megu Yuda nkurow mu ne Yerusalem mmorɔn so ahosɛpɛw nne ne anigye nne, ayeforokunu nne ne ayeforo nne, efisɛ asase no bɛdan amamfo.