Read Revised Akuapem Twi DC-KYERƐW KRONKRON Kwadwom 2 Bible Online

Kwadwom 2 - Revised Akuapem Twi DC-KYERƐW KRONKRON bible

Kwadwom 2

¹ Ao, Awurade de omununkum akata Sion babea ho, n’abufuw mu dɛn ara! Wafi ɔsoro atow Israel ahoɔfɛ ahwe fam, na wankae ne nan ntiaso n’abufuw da no.

²Awurade amene Yakob tenabea nyinaa, wankyɛe so; wadwiriw Yuda babea aban a ɛyɛ den, n’anibere mu, wama aka fam; wahura n’ahenni ne ne mmapɔmma ho.

³Watwitwa Israel mmɛn nyinaa n’abufuhyew mu, wapono ne nifa ato n’akyi afi ɔtamfo anim, na ɔdɛwee Yakob mu sɛ ogyaframa a ɛhyew hyia.

⁴ Wakuntun ne ta mu sɛ ɔtamfo, wagyina ateɛ ne nifa sɛ ɔhohiafo, na wakunkum nea ɛyɛ aniwa fɛ nyinaa; wahwie n’abufuhyew sɛ ogya agu Sion babea ntamadan so.

⁵Awurade adan sɛ ɔtamfo; wamene Israel, wamene n’aban afɛfɛ nyinaa; wasɛe n’aban a ɛyɛ den no, na wama Yuda babea nkɔmmɔdi ne abubuwbɔ adɔɔso.

⁶Wabu ne sese no agu sɛ turo mu de, wasɛe ne ntamadan; AWURADE ama werɛ afi Sion mu afahyɛ ne homeda, na n’abufuw mu awerɛhow mu wabu ɔhene ne ɔsɔfo animtiaa.

⁷ AWURADE atow n’afɔremuka akyene, wapa ne kronkronbea; ɔde n’aban afɛfɛ afasu ahyɛ ɔtamfo nsa; wɔyɛɛ gyegyeegye, AWURADE fi, sɛ afahyɛ da no.

⁸AWURADE bɔɔ ne tirim sɛ ɔbɛsɛe Sion babea fasu; ɔde susuhama too ho. Wampono ne nsa amfi ne sɛe ho, wama pempe ne afasu di nkɔmmɔ, ne nyinaa agurogurow.

⁹N’aponkɛse amem kɔ fam, akyiri adaban asɛe, na abubu. Ne hene ne ne mmapɔmma wɔ amanaman no mu, akwankyerɛ nni hɔ bio, n’adiyifo nhu AWURADE hɔ ani so ade.

¹⁰Sion babea mpanyimfo tete fam ayeyɛ komm; wɔde dɔte agugu wɔn atifi, wɔafurafura ayitam; Yerusalem mmabaa asisi wɔn ti ase.

¹¹ Nusu ama m’ani ayɛ siamoo, m’ayamde kyinkyim, me mmerɛbo ahwie agu fam, me man babea sɛe nti, abotafowa ne akokoaa totɔ piti, kurow no mmorɔn so.

¹²Wɔka kyerɛ wɔn nanom sɛ: Ɛhe na aburow ne nsa wɔ? Na wɔtotɔ beraw sɛ atɔfo, kurow no mmorɔn so, na wogyaagyaa mu wɔn nanom kokom.

¹³Dɛn adanse na minni wo, dɛn na memfa mento wo ho, O Yerusalem babea? Dɛn na memma ɛne wo nsɛ, na mede makyekye wo werɛ, O ɔbaabun, Sion babea? Wo yaw so sɛ ɛpo; hena na obetumi asa wo yare?

¹⁴ Atoro ne nnaadaa anisoade na w’adiyifo hu kyerɛɛ wo, na wɔanyi w’amumɔyɛ no so sɛ wɔde wo nnommum bɛsan aba; na atoro ne nsɛm a ɛma wofom na wohu kyerɛɛ wo.

¹⁵ Wɔn a wotwam ɔkwan so nyinaa bobɔ wɔn nsam gu wo so; wɔbɔ hwirema wosow wɔn ti gu Yerusalem babea so ka sɛ: So kurow a wɔfrɛ no Ahoɔfɛ a ewie fɛyɛ, asase nyinaa ahosan no ni?

¹⁶ W’atamfo nyinaa tɛɛtɛɛ wɔn anom hyɛ wo; wohinam, twɛre wɔn se ka sɛ: Yɛamene no! Ɛda a yɛhwɛɛ no kwan no ara ni! Yɛanya, yɛn ani ahu!

¹⁷AWURADE ayɛ nea osusuwii; wama n’asɛm abam pɛ, n’asɛm a ofi tete mmere no mu hyɛe no; wadwiriw, na wankyɛe so, na wama ɔtamfo ani agye wo ho, wama w’ahohiafo abɛn so.

¹⁸ Ma wo nne so, ma wo koma nsu frɛ Awurade; Sion babea fasu, ma nusu nsen sɛ asuten awia ne anadwo; mpɛ ɔhome bi nhome, mma wo kurutiayisi nnyɛ komm.

¹⁹Sɔre bɔ abubuw anadwo, adasu mfiase; hwie wo koma gu sɛ nsu, Awurade anim; wo mmotafowa kra nti ma wo nsa so kyerɛ no, na ɔkɔm ama wɔatotɔ piti, mmorɔn nyinaa ti!

²⁰ AWURADE, hwɛ, na hu ɛ! Hena na woayɛ no sɛɛ yi? So mmea nwe wɔn yafumma, mmotafowa a wotuturu wɔn no? So wonkum ɔsɔfo ne odiyifo, Awurade kronkronbea hɔ anaa?

²¹Mmofra ne nkwakoraa deda fam mmorɔn so; me mmabaa ne me mmerante atotɔ afoa ano. Woasɛe wɔn w’abufuw da no, woakum na woankyɛe so.

²² Woafrɛ m’ahude afi afa nyinaa sɛ afahyɛ da, na AWURADE abufuw da no, obi amfi mu amfi na obi anka; wɔn a mituruu wɔn na meyɛn wɔn no, me tamfo adwerɛw wɔn.