Read Revised Akuapem Twi DC-KYERƐW KRONKRON Hesekiel 21 Bible Online

Hesekiel 21 - Revised Akuapem Twi DC-KYERƐW KRONKRON bible

Hesekiel 21

¹Na AWURADE asɛm baa me nkyɛn sɛ:

²Onipa ba, fa w’ani kyerɛ Yerusalem, na ma w’asɛm nsosɔ ngu kronkronbea hɔ na hyɛ nkɔm tia Israel asase no,

³na ka kyerɛ Israel asase no sɛ: Sɛ AWURADE se ni: Hwɛ, me ne wo anya, na mɛtwe me nkrante afi ne boha mu, na matwitwa wo so treneeni ne ɔbɔnefo.

⁴Esiane sɛ metwa wo so treneeni ne ɔbɔnefo nti, me nkrante befi ne boha mu ahyɛ honam nyinaa afi nifa fam akosi benkum fam,

⁵na ɔhonam nyinaa ahu sɛ me, AWURADE, matwe me nkrante afi ne boha mu, ɛrensan nkɔ mu bio.

⁶Na wo, onipa ba, fa awerɛhow si apini, na gu wɔn ani so ahome yawyaw.

⁷Na sɛ wɔka kyerɛ wo sɛ: Ɛdɛn so na woresi apini a? Ka sɛ: Akwansosɛm nti, efisɛ ɛreba, na koma nyinaa bɛnan, na nsa nyinaa mu agugow, na honhom nyinaa ano akum, na anankoroma nyinaa adannan nsu; hwɛ, ɛreba na abɛyɛ, AWURADE Nyankopɔn asɛm ni.

⁸Na AWURADE asɛm baa me nkyɛn sɛ:

⁹ Onipa ba, hyɛ nkɔm, na ka sɛ: Sɛ AWURADE se ni: Ka sɛ: Nkrante, nkrante a wɔasew ano na wɔapɔw ho nso,

¹⁰wɔasew ano sɛ enkum, wɔapɔw ho sɛ entwa nyinamnyinam. Anaasɛ yɛmma yɛn ho nsɛpɛw yɛn nka se: Me ba woabu abaa ne nteɛso nyinaa animtiaa?

¹¹Na ɔde nkrante no mae sɛ wɔmpɔw ho sɛ wɔde nsa rekura, wɔasew nkrante no na wɔapɔw ho nso, sɛ wɔde rehyɛ okumfo nsa.

¹²Onipa ba, su na twa adwo, sɛ ɛno bɛba me nkurɔfo so, ɛno bɛba Israel abirempɔn nyinaa so; wɔde wɔn ne me man ato hɔ ama nkrante, enti bɔ w’asrɛ ho ame.

¹³ Na wɔasɔ ahwɛ; na sɛ abaa a ebu animtiaa no po nyɛ hwee a, dɛn na ɛbɛyɛ? AWURADE Nyankopɔn asɛm ni.

¹⁴Na wo, onipa ba, hyɛ nkɔm na bɔ nsam, na nkrante no bɛba abɔ ho abiɛsa, atɔfo nkrante no; ɛyɛ ɔtɔfo kɛse nkrante na atwa wɔn ho ahyia no.

¹⁵Nea ɛbɛyɛ na koma atutu na hintidua adɔɔso nti, mede nkrante hyerɛn masisi wɔn kurow apon nyinaa ho a! Wɔayɛ no sɛ ɛnyɛ sɛ anyinam, wɔayeram ano de rebekum.

¹⁶Dan wo ho koraa kɔ anafo, dan w’ano kɔ atifi, baabiara a wɔahyɛ sɛ w’ani nkyerɛ.

¹⁷Na me nso mɛbɔ me nsam, na mama m’anibere ano adwo, me, AWURADE, na maka.

¹⁸Na AWURADE asɛm baa me nkyɛn sɛ:

¹⁹ Na wo, onipa ba, sensan akwan abien fa, na Babel hene nkrante mfa so mmra. Ma n’abien nyinaa mfi asase koro so, na kurukyerɛw akyerɛkyerɛkwan bi, nkurow nkwanta na kurukyerɛw no.

²⁰Siesie ɔkwan a nkrante mfa so mmra Amonfo kurow Raba, ne Yuda, Yerusalem kurow a ɛyɛ den no mu.

²¹Na Babel hene gyina ɔtempɔn nkwanta so, akwan abien no ti, sɛ wɔnhyɛ nkɔm mma no; ɔwosow agyan bisa abusua honi adehwɛ mmerɛbo mu.

²²Nkɔmhyɛ a ɛba ne anafo mu ne Yerusalem, sɛ wonsisi adwennini a eburuw ɔfasu, mmue ano okum mu, mma ɛnne so osebɔ mu, sɛ wonsisi adwennini a wɔde beburuw aponkɛse, ngu mpempe, nsisi ntua aban.

²³Na ɛbɛyɛ wɔn sɛ nkɔntoro wɔn ani so; wɔaka ntankɛse; nanso ɔno de, ɔkae wɔn amumɔyɛ, sɛ wɔnkyere wɔn.

²⁴Ɛno nti sɛ AWURADE se ni: Esiane sɛ moma wɔkae mo amumɔyɛ ma mo mmarato da adi na wohu mo bɔne, mo nneyɛe nyinaa mu nti, na esiane sɛ wɔkae mo nti, wɔde nsa bɛkyere mo.

²⁵Na wo, ɔbɔnefo a woatɔ, Israel birɛmpɔn a ne da adu, awiei amumɔyɛ bere mu no,

²⁶ sɛ AWURADE Nyankopɔn se ni: Yi abotiten no na hɔn ahemmotiri no; nneɛma rentena sɛnea ɛte no ara nea abrɛ ase no, wɔbɛma so, na nea ama so no bɛbrɛ ase;

²⁷ Ɔsɛe, ɔsɛe ɔsɛe na mɛdan no; sɛ ebi mmae da na eyi nso rentena hɔ daa, de bɛkɔ akosi sɛ nea atemmu wɔ no no bɛba, na mede mama no.

²⁸ Na wo, onipa ba, hyɛ nkɔm na ka sɛ: Sɛ AWURADE Nyankopɔn se, Amonfo ne wɔn ahohorabɔ no ho ni, na ka sɛ: Nkrante, nkrante a wɔatwe de rebekum, wɔapɔw ho sɛ enni nam, sɛ ɛnyɛ nyinamnyinam.

²⁹Ɛbere a wohu ade huhuw ma wo na wɔrehyɛ wo nkɔntoro no, wɔde wo bɛto abɔnefo atɔfo a wɔn da adu, awiei amumɔyɛ bere mu no kɔn ho.

³⁰Fa wo nkrante san hyɛ ne boha mu, faako a wɔbɔɔ wo no, w’awo asase so na mebu wo atɛn,

³¹na mehwie m’abufuhyew magu wo so, mefita m’anibere gya no mu mahyɛ wo, na meyi wo mahyɛ mmarima atirimmɔdenfo a wonim ɔsɛe ho nyansa no nsa.

³²Wobɛdan ogya aduan; wo mogya begu asase no mfinimfini; wɔrenkae wo bio, na me, AWURADE na maka.