Read Revised Akuapem Twi DC-KYERƐW KRONKRON Hesekiel 23 Bible Online

Hesekiel 23 - Revised Akuapem Twi DC-KYERƐW KRONKRON bible

Hesekiel 23

²Onipa ba, mmea baanu, ɛna biako mma, wɔ hɔ,

³na wɔbobɔɔ aguaman Misraim, wɔn mmabaabere mu na wɔbobɔɔ aguaman no; ɛhɔ na womiaa wɔn nufu, na ɛhɔ na wɔkekaa wɔn mmabaabere mu mpokua.

⁴Na wɔn din ne: Ɔpanyin no, Ohola, ase ne: Ne ntamadan, ne ne nua Oholiba, ase ne: Me ntamadan wɔ ne mu; na wɔyeyɛɛ me de, na wɔwoo mmabanin ne mmabea. Na wɔn din no: Samaria ne Ohola, na Yerusalem ne Oholiba.

⁵Na m’akyi Ohola bɔɔ aguaman na n’ani beree n’adɔfo, Asiriafo a wɔbae bɛbɛn no no ho.

⁶Wɔhyehyɛ bibitama ntade, amradofo ne mmakoma, mmerante a wɔn ho yɛ fɛ nko ara, wɔtete nteaseɛnam mu ne apɔnkɔ so.

⁷Na ɔde n’aguamammɔ kɔɔ wɔn so, Asiriafo a wɔapaw wɔn no nyinaa, na ɔde wɔn a ne kɔn dɔ wɔn nyinaa, wɔn abosom nyinaa guu ne ho fi.

⁸Nanso n’aguamammɔ a ɔde fi Misraim no, wannyae, efisɛ wɔne no dae ne mmabaabere mu, na wɔkekaa ne mmabaabere mu mpokua, na wohwiee wɔn aguamammɔ guu no so.

⁹Ɛno nti mayi no mahyɛ n’adɔfo no nsa, Asiriafo a n’ani beree wɔn no nsa.

¹⁰ Wɔn na woyii n’adagyaw so, wɔfaa ne mmabanin ne ne mmabea, na ɔno ankasa nso, wɔde nkrante kum no, na ɔyɛɛ ɔnakwa maa mmea, na wɔyɛɛ no n’atemmude.

¹¹ Na ne nua Oholiba hui, nanso ɔmaa n’ani beree bere bɔne sen ɔno, na ɔmaa n’aguamammɔ sen ne nua no de.

¹²N’ani beree Asiriafo, amradofo ne mmakoma a wɔbae bɛbɛn no no, wɔhyehyɛ ntade a eye, wɔtete nteaseɛnam mu ne apɔnkɔ so, mmerante a wɔn ho yɛ fɛ ara nko.

¹³Na mihuu sɛ wagu ne ho fi; wɔn baanu nam ɔkwan koro so.

¹⁴Na ɔmaa n’aguamammɔ kɔɔ so; na ohuu mmarima a wɔakurukyerɛw wɔn ɔfasu ho, Kaldeafo mfonini a wɔde adukɔkɔɔ akurukyerɛw,

¹⁵wɔde abɔso abobɔ wɔn asen, de abotiri atenten abobɔ wɔn ti, sɛ Babelfo a wɔn awo asase ne Kaldea no te no.

¹⁶Ɛnna ɔde n’aniwa hwɛe no, n’ani beree wɔn, na ɔsomaa abɔfo kɔɔ wɔn nkyɛn Kaldea.

¹⁷Na Babelfo baa ne nkyɛn ne no bɛdae ɔdɔ so, na wɔde aguamammɔ guu ne ho fi; na ɔde wɔn guu ne ho fi no, ɔtetew ne kra fii wɔn ho.

¹⁸Na oyii n’aguamammɔ adi na oyii n’adagyaw so no, ɛnna me kra tew ne ho fii ne ho, sɛnea me kra tew ne ho fii ne nua no ho no.

¹⁹Na ɔmaa n’aguamammɔ no dɔɔso ara de kaee ne mmabaabere mu nna a ɔbɔɔ aguaman, Misraim asase so no.

²⁰Na n’ani beree wɔn mpenafo a wɔn barima te sɛ mfurum de, na wɔn ahoboa te sɛ apɔnkɔ de no.

²¹Na wo kɔn dɔɔ wo mmabaabere mu aniwude, bere a wo mpokua nti Misraimfo miamiaa wo nufu no.

²²Ɛno nti, Oholiba, sɛ AWURADE Nyankopɔn se ni: Hwɛ, merehwanyan w’adɔfo mahyɛ wo, wɔn a wo kra atew ne ho afi wɔn ho no, na mahyia wɔn afi mmaa nyinaa aba wo so.

²³Babelfo ne Kaldeafo nyinaa, Pekodfo, Soafo ne Koafo ne Asiriafo a wɔka wɔn ho nyinaa, mmerante a wɔn ho yɛ fɛ, amradofo ne mmakoma nyinaa, nnɔnkunini ne wɔn a wɔwɔ din, apɔnkɔsotefo ara nko,

²⁴ na wɔde akode ne nteaseɛnam ne nkyimii ne aman asafo bɛba wo so; ahokatade ne ɔkyɛm ne dade kyɛw na wɔde bɛka wo ahyɛ mu ahyia; na mede atemmu mesi wɔn anim, na wɔabu wo atɛn wɔn atemmu so.

²⁵Na mede me ninkuntwe mɛsa wo, na wɔne wo adi no anibere so, wobetwitwa wo hwene ne w’aso, na wo mu nkae bɛtotɔ nkrante ano; wɔn na wɔbɛfa wo mmabanin ne wo mmabea akɔ, na wɔde ogya ahyew w’ade a ɛbɛka akyiri,

²⁶na wɔbɛworɔw wo ho ntade, na wɔatase wo nnwinne afɛfɛ no.

²⁷Na mɛma w’aniwude to atwa afi wo ho, ne w’aguamammɔ a efi Misraim asase so no, na woamma w’ani so ankyerɛ wɔn, na woankae Misraim bio.

²⁸Na sɛɛ na AWURADE Nyankopɔn se: Hwɛ, mede wo mehyɛ wɔn a wotan wɔn no nsa ne wɔn a wo kra atew ne ho afi wɔn ho no nsa,

²⁹na wɔne wo adi no ɔtan so, na wɔafa nea wobrɛ nyae no, na wɔagyaw wo, adagyaw mu ne kwaterekwa, na wɔayi w’aguamammɔ adagyaw so, ne w’aniwude ne w’aguamammɔde nyinaa so.

³⁰Wɔbɛyɛ wo eyi, w’aguamammɔ a wode dii amanaman no akyi no nti, sɛ wode wɔn abosonhuhuw agu wo ho fi.

³¹ Wo nuabea no kwan so na wonam, enti mede ne kuruwa mɛhyɛ wo nsa.

³²Sɛ AWURADE Nyankopɔn se ni: Wo nuabea kuruwa a emu dɔ na emu trɛw no na wobɛnom, dodow a ebetumi adi no bɛdan asereserede ne fɛwdi;

³³ Asabow ne awerɛhow, ahodwiriw ne ahoyeraw kuruwa, wo nuabea Samaria kuruwa no bɛyɛ wo ma.

³⁴Na wobɛnom, na wubefifew mu, na wobɛwe ne fɛre, na wubesunsuane wo nufu mu, na me na maka, AWURADE Nyankopɔn asɛm ni.

³⁵Ɛno nti sɛ AWURADE Nyankopɔn se ni: Esiane sɛ wo werɛ afi me, na woatow me akyene w’akyi nti, wo nso soa w’aniwude ne w’aguamammɔde no.

³⁶Na AWURADE ka kyerɛɛ me sɛ: Onipa ba, so wubebu Ohola ne Oholiba atɛn? Ɛnne kyerɛ wɔn wɔn akyide,

³⁷ sɛ wɔasɛe aware, na mogya wɔ wɔn nsam; na wɔn abosonhuhuw na wɔde asɛe aware, na wɔn mma a wɔwo maa me no nso, wɔama wɔafa ogya mu ama wɔn ma wɔadi.

³⁸Bio eyi na wɔayɛ me, wɔagu me kronkronbea ho fi da no ara, na me home nna nso, wɔahura ho;

³⁹na wokunkum wɔn mma ma wɔn abosonhuhuw a, wɔba me kronkronbea da no ara behura ho, na hwɛ, saa na wɔayɛ me fi no mu.

⁴⁰Na mpo wɔsoma kohyiaa mmarima a wofi akyirikyiri bae, na wɔsomaa abɔfo kɔɔ wɔn nkyɛn, na hwɛ, wɔbae; wɔn na wuguaree wo ho maa wɔn de adubiri kekaa w’aniwa na wode ahyehyɛde hyehyɛɛ wo ho,

⁴¹na wotenaa nnae a anim yɛ duru so, na ɔpon a wɔatow si w’anim, na wode m’aduhuam ne me ngo sisii so.

⁴²Na asafo yuu a wɔn ho atɔ wɔn gyegyeegye wɔ mu, na wɔde asabofo fi sare so bɛkaa mmarima a wofi nnipa dodow no mu no ho, na wɔde nkapo hyehyɛɛ wɔn nsa, na wɔde abotiri afɛfɛ bobɔɔ wɔn.

⁴³Ɛnna mekae nea awaresɛe agurow no no ho sɛ: Afei wɔde n’aguamammɔ no ara bɛbɔ aguaman,

⁴⁴na wɔkɔɔ ne nkyɛn sɛnea wɔkɔ ɔbea aguaman nkyɛn, saa na wɔkɔɔ Ohola ne Oholiba, mmea ahohorafo no nkyɛn.

⁴⁵ Na mmarima atreneefo na wɔde awaresɛefo atemmu ne mogyakagufo atemmu bebu wɔn atɛn, efisɛ wɔyɛ awaresɛefo, na mogya wɔ wɔn nsam.

⁴⁶Na sɛ AWURADE Nyankopɔn se ni: Mɛma asafo bi atu aba wɔn so, na mayi wɔn mama ahoguan ne ɔfom,

⁴⁷na asafo no asiw wɔn abo, na wɔde wɔn nkrante awowɔ wɔn; wobekunkum wɔn mmabanin ne wɔn mmabea, na wɔde ogya ahyew wɔn afi.

⁴⁸Na metwa aniwudeyɛ mafi asase no so, na wɔde abɔ mmea nyinaa kɔkɔ, na wɔanyɛ sɛ mo ahohorade yi.

⁴⁹Na wɔde mo ahohorade begu mo so, na moasoa mo abosonhuhuw no bɔne, na moahu sɛ mene AWURADE Nyankopɔn.