Read Revised Akuapem Twi DC-KYERƐW KRONKRON Hesekiel 28 Bible Online

Hesekiel 28 - Revised Akuapem Twi DC-KYERƐW KRONKRON bible

Hesekiel 28

¹Na AWURADE asɛm baa me nkyɛn sɛ:

² Onipa ba, ka kyerɛ ɔheneba a ɔwɔ Tiro no sɛ: Sɛ AWURADE Nyankopɔn se ni: Esiane sɛ wo koma ma ne ho so, na wuse: Meyɛ onyame, anyamegua so na mete, ɛpo mfinimfini, nanso woyɛ onipa na wonyɛ onyame, na woyɛ wo koma sɛ onyame koma nti,

³ hwɛ, woyɛ onyansafo sen Daniel, ahintasɛm biara ankyɛn wo,

⁴wo nyansa ne wo nhumu so na woanya ade afa, na woanya sika ne dwetɛ agu w’akorade mu,

⁵wo nyansa dodow ne w’aguadi na wode ama w’ade adɔɔso, na w’ade no nti wo koma ahoman,

⁶enti, sɛ AWURADE Nyankopɔn se ni: Esiane sɛ woayɛ wo koma sɛ onyame koma nti,

⁷hwɛ, mede ananafo mereba wo so, amanaman mu anuɔdenfo, na wɔabɛtwetwe wɔn nkrante ahyɛ wo nyansa ahoɔfɛ no, na wɔahura wo hyerɛn ho.

⁸ Amoa mu na wɔde wo besian akɔ, na woawu atɔfo wu, ɛpo mfinimfini.

⁹ So wobɛkɔ so aka sɛ: Meyɛ onyame, wɔ nea okum wo no anim? Nso wo de, woyɛ onipa na wonyɛ onyame, nea ohwirew wo mu no nsam.

¹⁰Momonotofo wu na wubewu ananafo nsam, na me na maka, AWURADE Nyankopɔn asɛm ni.

¹¹Na afei AWURADE asɛm baa me nkyɛn sɛ:

¹² Onipa ba, twa Tiro hene ho kwadwom, na ka kyerɛ no sɛ: Sɛ AWURADE Nyankopɔn se ni: Wo de, wone abɔde afɛfɛ mu nea oye, nyansa ahyɛ wo ma, w’ahoɔfɛ wie pɛyɛ.

¹³Onyankopɔn turo Eden mu na wote, aboɔden abo nyinaa yɛ wo nkataho, bogyanambo, akaratebo ne bɔwerɛbo, sikaberebo, apopobibiribo ne ahwehwɛbo, hoabo, nsramabo ne ahabammono bo ne sika; wo mpintin ne wo bɔmmaa ɔsom wɔ w’anim, ɛda a wɔbɔɔ wo no na wosiesiei.

¹⁴ Woyɛ kerub a wɔasra no a ɔkata so, na mede wo misii hɔ; Onyankopɔn bepɔw kronkron so na wowɔ, ogya abo ntam na wonennamee.

¹⁵Wudii mu w’akwan mu, fi da a wɔbɔɔ wo ara de kosii da a wohuu wo mu abusude no.

¹⁶W’aguadi dodow nti na wɔde amimdi hyɛɛ wo ma, na woyɛɛ bɔne, na mahura wo ho atu wo afi Onyankopɔn bepɔw no so, na masɛe wo, kerub a wokata so, afi ogya abo no ntam.

¹⁷W’ahoɔfɛ nti wo koma ahoman, woasɛe wo nyansa ne wo hyerɛn, matow wo makyene fam, mede wo mato ahene anim sɛ wɔnhwɛ wo.

¹⁸W’amumɔyɛ dodow so, w’aguadi abusude mu woahura w’akronkronne ho, enti mama ogya afi wo mu, na ahyew wo, na madan wo nso, asase so, wɔ wɔn a wɔhwɛ wo nyinaa anim.

¹⁹ Wɔn a wonim wo, aman mu nyinaa, wo ho bɛyɛ wɔn ahodwiriw; na woapatuw asɛe, na wunni hɔ bio de kosi daa.

²⁰Na AWURADE asɛm baa me nkyɛn sɛ:

²¹ Onipa ba, dan w’ani kyerɛ Sidon, na hyɛ ne ho nkɔm,

²² na ka sɛ: Sɛ AWURADE Nyankopɔn se ni: Hwɛ, me ne wo anya, Sidon, na menya wo mu anuonyam, na sɛ meyɛ no mu atemmude na miyi me kronkronyɛ adi no mu a, wɔahu sɛ mene AWURADE.

²³Na merema owuyare aba mu na mogya agu ne mmorɔn so, na apirafo atotɔ no mu, nkrante a efi mmaa nyinaa bɛba no so no ano, na wɔahu sɛ mene AWURADE.

²⁴Na nsɔe a ɛwɔ onipa ne ohwirom a ɛyɛ yaw renka hɔ mma Israel fi bio, mfi wɔn a wɔatwa wɔn ho ahyia a wobu wɔn animtiaa no nyinaa mu, na wɔahu sɛ mene AWURADE Nyankopɔn.

²⁵Sɛ AWURADE Nyankopɔn se ni: Sɛ minya meboa Israel fi ano fi aman a wɔapete wɔn mu no mu a, meyi me kronkronyɛ adi wɔn mu amanaman no ani so, na wɔbɛtena wɔn asase a mede memaa m’akoa Yakob no so.

²⁶Na wɔbɛtena so dwoodwoo asi adan ayeyɛ bobe nturo, na wɔatena ase dwoodwoo, efisɛ mɛyɛ atemmude, wɔn a wɔatwa wɔn ho ahyia bu wɔn animtiaa no nyinaa mu, na wɔahu sɛ mene AWURADE, wɔn Nyankopɔn.