Read Revised Akuapem Twi DC-KYERƐW KRONKRON Hesekiel 37 Bible Online

Hesekiel 37 - Revised Akuapem Twi DC-KYERƐW KRONKRON bible

Hesekiel 37

¹AWURADE nsa baa me so, na AWURADE de me fii adi honhom mu, na ɔde me kosii obon kɛse a nnompe ara nko ayɛ mu ma mu;

²na ɔma mefaa so mikyini mihyiae, na hwɛ, ɛdɔɔso pa ara obon no ani, na hwɛ, ɛho awo akokwaw sɛ.

³Na ɔka kyerɛɛ me sɛ: Onipa ba, so nnompe yi benya nkwa anaa? Na mise: AWURADE Nyankopɔn, wo na wunim.

⁴Na ɔka kyerɛɛ me sɛ: Hyɛ nnompe yi so nkɔm, na ka kyerɛ wɔn sɛ: Mo nnompe a mo ho akokwaw, muntie AWURADE asɛm.

⁵ Sɛ AWURADE Nyankopɔn ka kyerɛ nnompe yi ni: Hwɛ, merema honhom abɛhyɛn mo mu na moanya nkwa.

⁶ Na mede ntini mesuso mo mu, na mede nam agu mo so, na mede were makata mo ho, na mede honhom mahyɛ mo mu, na moanya nkwa, na moahu sɛ mene AWURADE.

⁷ Ɛnna mehyɛɛ nkɔm sɛnea wɔhyɛɛ me no; na mehyɛɛ nkɔm no, ɛnne bi bae, na hwɛ, ɔwosow bi ni, na nnompe no hyiahyiae, dompe bɛkaa ne dompe ho.

⁸Na mehwɛe, na hwɛ, ntini baa so, na nam baa ho, na were bɛkataa so, nanso na honhom bi nni mu.

⁹Ɛnna ɔka kyerɛɛ me sɛ: Hyɛ nkɔm kyerɛ honhom no, hyɛ nkɔm, onipa ba, na ka kyerɛ honhom no sɛ: Sɛ AWURADE Nyankopɔn se ni: Honhom, fi mframa anan no so bra, na bɛhome gu nnipa a wɔakunkum wɔn yi so, na wonnya nkwa.

¹⁰Ɛnna mehyɛɛ nkɔm sɛnea wɔhyɛɛ me no; na honhom no baa wɔn mu, na wonyinyaa nkwa, na wogyinagyinaa wɔn anan so, dɔm kɛse pa ara.

¹¹Ɛnna ɔka kyerɛɛ me sɛ: Onipa ba, nnompe yi yɛ Israel fi no nyinaa; hwɛ, wɔka sɛ: Yɛn nnompe ho akokwaw, na yɛn anidaso ayera; wɔatwa yɛn korakora!

¹²Enti hyɛ nkɔm na ka kyerɛ wɔn sɛ: Sɛ AWURADE Nyankopɔn se ni: Hwɛ, merebuebue mo adamoa ano mafa mo, me man, afi mo adamoa mu, na mede mo akɔ Israel asase so,

¹³na moahu sɛ mene AWURADE, sɛ mebuebue mo adamoa ano, me man, na mama moafi mo adamoa mu aba.

¹⁴Na mede me honhom mɛhyɛ mo mu, na moanya nkwa, na mede mo adua mo asase so, na moahu sɛ me, AWURADE, na maka na mayɛ, AWURADE asɛm ni.

¹⁵Na AWURADE asɛm baa me nkyɛn sɛ:

¹⁶ Na wo, onipa ba, fa dua biako fa, na kyerɛw so sɛ: Yuda ne Israelfo a wɔka ne ho no de; na fa dua biako nso, na kyerɛw so sɛ: Yosef a ɔne Efraim, ne Israel fi a wɔka ne ho no nyinaa dua.

¹⁷Na pata n’abien no bom yɛ no dua koro, na ɛnyɛ biako wo nsam.

¹⁸Na sɛ wo man mma ka kyerɛ wo sɛ: So worenkyerɛ yɛn nea wode eyinom yɛ a,

¹⁹ka kyerɛ wɔn sɛ: Sɛ AWURADE Nyankopɔn se ni: Hwɛ, merefa Yosef dua a ɛwɔ Efraim nsam no ne Israel mmusuakuw a wɔka ne ho no, mede wɔn maka Yuda dua no ho, na mayɛ wɔn dua koro, na wɔayɛ biako, me nsam.

²⁰Na nnua a woakyerɛkyerɛw so no ntena wo nsam, wɔn anim;

²¹ na ka kyerɛ wɔn sɛ: Sɛ AWURADE Nyankopɔn se ni: Hwɛ, merekɔfa Israel mma afi amanaman a wɔakokɔ hɔ no mu, na maboa wɔn ano afi mmaa nyinaa ahyia, na mede wɔn makɔ wɔn asase so,

²² na mede wɔn mayɛ ɔman koro, asase no so, Israel mmepɔw no so, na ɔhene biako adi wɔn nyinaa so hene, na wɔrenyɛ aman abien bio, na wɔrempae wɔn mu bio nyɛ ahenni abien bio,

²³ na wɔremfa wɔn abosonhuhuw ne wɔn atantanne ne wɔn mmaratode nyinaa ngu wɔn ho fi bio, na megye wɔn nkwa, wɔn tenabea nyinaa a wɔayɛ hɔ bɔne no, na matew wɔn ho, na wɔayɛ me ɔman, na me nso mayɛ wɔn Onyankopɔn.

²⁴ Na m’akoa Dawid bedi wɔn so hene, na oguanhwɛfo koro adi wɔn nyinaa so, na wɔanantew m’atemmude mu, na wɔahwɛ m’ahyɛde ayɛ,

²⁵na wɔatena asase a mede memaa m’akoa Yakob a mo agyanom tenaa so no so, wɔne wɔn mma ne wɔn mma mma akosi daa, na m’akoa Dawid bɛyɛ wɔn ɔberɛmpɔn akosi daa.

²⁶ Na me ne wɔn bɛpam asomdwoe apam, ɛbɛyɛ wɔn daa apam, na mɛma wɔatim na mama wɔafɛe, na mede me kronkronbea mesi wɔn mu akosi daa.

²⁷Na me tenabea besi wɔn so, na mayɛ wɔn Onyankopɔn, na wɔn nso wɔayɛ me ɔman,

²⁸ na amanaman no ahu sɛ mene AWURADE a metew Israel ho, bere a me kronkronbea si wɔn mu kosi daa no.