Read Revised Akuapem Twi DC-KYERƐW KRONKRON Hesekiel 4 Bible Online

Hesekiel 4 - Revised Akuapem Twi DC-KYERƐW KRONKRON bible

Hesekiel 4

¹Na wo, onipa ba, fa ntayaa to w’anim, na kurukyerɛw so kurow a ɛne Yerusalem,

²na ka no hyɛ mu, na to aban hyɛ ho, na gu ho mpempe, na bɔ ho nsra hyia, na fa ɔfasu bu adwennini sisi ho hyia.

³Na wo nso, fa dade asanka, na fa yɛ dade fasu, wo ne kurow no ntam, na dan w’ani kyerɛ no, na enni kamu, na tua no; ɛno nyɛ sɛnkyerɛnne mma Israel fi.

⁴Na wo de, da wo benkum so, na fa Israel fi amumɔyɛ to so; nna dodow a woda so no na wobɛsoa wɔn amumɔyɛ.

⁵Na me de, mede wɔn amumɔyɛ mfe no mayɛ nna dodow mama wo, nna ahasa aduakron na wobɛsoa Israel fi amumɔyɛ no.

⁶Na wuwie eyinom a, san da wo nifa so soa Yuda fi amumɔyɛ adaduanan; mede afe afe mayɛ wo da koro da koro.

⁷Na dan w’ani kyerɛ Yerusalem nkahyem no a wo nsa ho da hɔ, na hyɛ nkɔm gu no so.

⁸Na hwɛ, mede nhama megu wo so, na woantwa dafa amfi wo mfe so, ankɔ wo mfe so, de bɛkɔ akosi sɛ wubewie wo nkahyem nna no ansa.

⁹ Na wo de, fa awi ne atoko ne asɛ ne asedua ne kɔkɔte ne aburow hyɛ ade biako mu fa, na fa yɛ w’aduan di nna dodow a wode bɛda wo mfe so no, ɛne nna ahasa aduakron;

¹⁰na w’aduan a wubedi no, kari, nnwetɛbona aduonu da koro na di no nna nna.

¹¹Na nsu nso susuw na nom, susutoa nkyemu asia mu biako, na nom no nna nna.

¹²Na di no atoko fam a wode kyerebo a efi onipa mu atoto, wɔn anim.

¹³Na AWURADE kae sɛ: Saa ara na Israelfo bedi wɔn aduan a ɛho akum, amanaman a mesum wɔn makɔ hɔ no mu.

¹⁴ Ɛnna mise: Ao, AWURADE Nyankopɔn, hwɛ, me kra ho nkumii ɛ, na ade a atɔ anaasɛ wɔatetew mu nso, minnii bi da, fi me mmofraase bedu sesɛɛ, nanso nam a wokyi bi nkɔɔ m’anom pɛn ɛ.

¹⁵Na ɔka kyerɛɛ me sɛ: Hwɛ, mede nantwi bin masi onipa kyerebo ananmu ama wo, na woato w’abodoo wɔ so.

¹⁶ Na ɔka kyerɛɛ me sɛ: Onipa ba, hwɛ, brodoto begyae wɔ Yerusalem, na wɔadi brodo nkarii so, ne nkɔmmɔdi mu, na nsu nso wɔanom no nsusuwii ne ahodwiriw so,

¹⁷na brodo ne nsu ho ahia wɔn, na wɔn ho adwiriw wɔn, onipa ne ne nua, na wɔatetew, wɔn amumɔyɛ mu.