Read Revised Akuapem Twi DC-KYERƐW KRONKRON Hesekiel 41 Bible Online

Hesekiel 41 - Revised Akuapem Twi DC-KYERƐW KRONKRON bible

Hesekiel 41

¹ Ɛnna ɔde me kɔɔ asɔredan no mu, na osusuw adum no: Basafa abiɛsa trɛw wɔ ha na basafa abiɛsa trɛw wɔ ha, ɛne ntamadan no trɛw.

²Na ano kwan trɛw si basafa anum, na ano kwan no nkyɛn nkyɛn yɛ basafa abien ne fa wɔ ha ne basafa abien ne fa wɔ ha; na osusuw ne ntwemu basafa aduonu ne ne trɛw basafa du.

³Ɛnna ɔkɔɔ emu fam kosusuw ɔpon ano adum no basafa baako, ne ɔpon no basafa abiɛsa, ne ɔpon no trɛw basafa abiɛsa ne fa;

⁴ na osusuw ne ntwemu basafa du ne ne trɛw basafa du, asɔredan no anim; na ɔka kyerɛɛ me sɛ: Ɛha ne kronkron mu kronkron.

⁵Ɛnna osusuw ɔdan no fasu basafa abiɛsa, ne ɛho mpia no trɛw basafa abien de twaa ɔdan no nyinaa ho hyiae;

⁶na nkyɛn mu mpia no, pia si pia so ahorow abiɛsa, ne saa ahorow aduasa, na ɛkɔ ɔfasu a ɛwɔ ɔdan no ho ma mpia no so, twa ho hyia, ɛma esuso mu, nanso ensuso ɔdan no fasu mu;

⁷na mpia no rekɔ soro hyia no na emu retrɛw, na ɔdan no ho mpia no kɔ soro ara twa ɔdan no ho hyia, enti emu trɛwee ɔdan no ho wɔ soro, na ne saa fi ase de no mu fa mfinimfini de no mu kɔ soro de no mu.

⁸Na mihuu ɔdan no ho bamma a etwa ho hyia a ɛne nkyɛn mu mpia no nnyinaso, ne nhyɛase korɔn du basafa abiɛsa demmire no pɛ.

⁹Nkyɛn mu mpia no akyiri fasu no trɛw si abien ne fa, na nea wogyawee ɔdan no ho nkyɛn mu mpia no ho no nso saa ara.

¹⁰ Na adammaa no ntam trɛw yɛ basafa du de twa ɔdan no ho hyia twem.

¹¹Na nkyɛn mu mpia no apon ano kwan kɔ nea wogyawee no so, ɔpon ano biako kyerɛ benkum fam, na ɔpon ano biako wɔ nifa fam, na ɔkwan a wogyawee no trɛw si basafa abien ne fa twa ho hyia.

¹²Na ɔdan a esi ofi no akyi adiwo atɔe fam no trɛw si basafa aduasa anum, na ɔdan no fasu trɛw si basafa abien ne fa de twa ho hyia, na ne ntwemu si basafa aduanan anum.

¹³Na osusuw ɔdan no atwemu basafa ɔha, ne afikyiri adiwo ne ɛhɔ dan no ne n’afasu atwemu basafa aduonum;

¹⁴na ɔdan no anim trɛw ne afikyikuaa no de, apuei fam, si basafa aduonum.

¹⁵Saa na osusuw ɔdan a esi afikyikuaa no anim a ekoduu n’akyi ne ɛho mmrannaa a ɛwɔ ha ne ha ntwemu basafa aduonum, ne emu fam asɔredan no ne abangua no ntwironoa.

¹⁶Apon ase ne mfɛnsere ahunaniankansa ne mmrannaa a etwa n’abiɛsa no ho hyia no, apongua a wɔde dua adura ho ahyia no ne fam de kɔka mfɛnsere no ho no, ne mfɛnsere a wɔakatakata ho no,

¹⁷apon ano atifi hɔnom, ɔdan no mu fam ne akyi fam ne afasu no nyinaa twem, emu fam ne ɛho fam, ne nyinaa wɔ ne nsusuwii.

¹⁸Na wɔayeyɛ kerubim ne mmɛ, na abɛ wɔ kerub ne kerub ntam, na kerub biara wɔ anim abien,

¹⁹na onipa anim kyerɛ abɛ ɔfa ha, na gyata anim kyerɛ abɛ ɔfa ha; wɔyɛe ɔdan no mu nyinaa hyiae;

²⁰efi fam kosi pon no atifi na wɔayeyɛ kerubim ne mmɛ no, asɔredan no fasu ho.

²¹Asɔredan no wɔ apongua ahinanan, na kronkronbea no anim wɔ ne de saa ara.

²² Afɔremuka no yɛ dua, ne korɔn basafa biako ne fa, na ne ntwemu basafa baako, na ne twea ne ne nnyinaso ne n’afasu yɛ dua; na ɔka kyerɛɛ me sɛ: Eyi ne ɔpon a esi AWURADE anim.

²³Na asɔredan no asa ne pia kronkron no wɔ apon abien.

²⁴Na apon no yɛ ntanta, apon mmukawmu abien abien; abien yɛ ɔpon biako de, na apon abien yɛ biako de;

²⁵na wɔayɛ asɔredan ano apon no so kerubim ne mmɛ, sɛnea wɔyɛe afasu no ho no; na dua ntiaso wɔ ntwironoa no anim adiwo fam.

²⁶Na mfɛnsere ahunaniankansa ne mmɛ wɔ ɔfa ha ne fa ha, ntwironoa no nkyɛn mu ne ɔdan no nkyɛn mu mpia ne nkataso mpuran no ho.