Read Revised Akuapem Twi DC-KYERƐW KRONKRON Hesekiel 42 Bible Online

Hesekiel 42 - Revised Akuapem Twi DC-KYERƐW KRONKRON bible

Hesekiel 42

¹Ɛnna ɔde me fii adi faa atifi fam kwan so kɔɔ ɛho fam abangua no so, na ɔde me kɔɔ adammaa a ɛda afikyikuaa ne ɛhɔ dan no ntentenso a ɛkyerɛ atifi fam no ho,

² ne ntwemu ho, esi basafa aduonum, ɔpon ano wɔ atifi fam, na ne trɛw si basafa aduonu anum;

³ ɛda emu fam abangua no basafa du no ntentenso ne ɛho fam abangua no abo nsɛwee no ntentenso; abrannaa kyerɛ abrannaa anim, nsɛmso a ɛto so abiɛsa mu,

⁴na adammaa no anim na ɔkwan a ne trɛw si basafa anum wɔ, ɛde rekɔ emu fam, basafa aduonum kwan; na apon no ano kyerɛ benkum fam.

⁵Na soro adammaa no yɛ ntiantia, efisɛ mmrannaa no di mu bi, na ɛntrɛw sɛ ɔdan no mfinimfini ne ase de no,

⁶efisɛ ɛyɛ asansa, na enni adum sɛ mmangua no adum no, na wɔadwom afi ase de ne mfinimfini de no so, afi fam.

⁷Na abo ban a ɛwɔ adiwo fam siane adammaa no, ɛho fam abangua no mu kyerɛ adammaa no anim, ne ntwemu basafa dumien ne fa,

⁸na adammaa a ani kyerɛ ɛho fam abangua no atwemu si basafa dumien ne fa, na hwɛ, asɔredan no anim de na ɛyɛ basafa aduonu anum;

⁹na adammaa yi pue abo ban no so; ɔkwan a obi fi ɛho fam abangua no so reba mu a ɔfa so no da apuei fam.

¹⁰Abangua no fasu trɛw a ɛkyerɛ apuei fam no, afikyikuaa ne ɛho dan ntentenso mu na adammaa wɔ,

¹¹na ɔkwan da anim; ɛte sɛ adammaa a ɛwɔ atifi fam no, ne ntwemu ne ne trɛw saa ara, ne n’adifi akwan nyinaa ne ne nsiesiei; na sɛ n’apon ano te no,

¹²sɛ nso adammaa a ɛwɔ anafo fam no apon ano tetee ne no, ɔpon ano wɔ ɔkwan no ti, ɛne ɔkwan a ɛda ɛho aban no anim, ɔkwan a wofi apuei fam nam so ba mu no.

¹³Na ɔka kyerɛɛ me sɛ: Atifi fam adammaa ne anafo fam adammaa a esisi afikyikuaa no anim no ne adammaa kronkron a asɔfo a wɔbɛn AWURADE no bedi akronkronne mu akronkronne hɔ no; ɛhɔ na wɔmfa akronkronne mu kronkronne ngugu, aduan afɔre ne bɔne ho afɔre ne asodi ho afɔre no, na ɛhɔ yɛ kronkron.

¹⁴Asɔfo no hyɛn mu a, wommfi kronkronbea hɔ mmfi adi nnkɔ ɛho fam abangua no so, na emu hɔ na wɔmfa wɔn ntade a wɔde som ngu, na ɛyɛ kronkron; wɔnhyehyɛ ntade foforo ansa na wɔabɛn nea ɛyɛ ɔman no de ho.

¹⁵Na owiee emu fam dan no susuw no, ɔde me fii adi faa ɔponkɛse a ani kyerɛ apuei fam no kwan so, na osusuw hyiae twem,

¹⁶ɔde susuw demmire no susuw apuei mframa nnemmire basafa ɔha aduonu anum, susuw demmire no so de twa hyiae;

¹⁷osusuw benkum fam nnemmire basafa ahanu aduonum, susuw demmire no so de twa hyiae.

¹⁸Osusuw anafo fam nnemmire basafa ahannu aduonum, susuw demmire no so;

¹⁹ɔdan kɔɔ atɔe fam kosusuw nnemmire basafa ahannu aduonum, susuw demmire no so;

²⁰mframa anan no so na osusuw no. Ɔfasu twa ho hyia twem; ne ntwemu basafa ahannu aduonum ne ne trɛw ahannu aduonum, sɛ entwa kronkronbea ne anihumafo de ntam.