Read Revised Akuapem Twi DC-KYERƐW KRONKRON Hosea 3 Bible Online

Hosea 3 - Revised Akuapem Twi DC-KYERƐW KRONKRON bible

Hosea 3

¹ Na AWURADE ka kyerɛɛ me sɛ: Kɔ bio na kɔdɔ ɔbea guamammɔni a ɔyɛ ɔwaresɛefo, sɛ AWURADE dɔ Israel mma na wɔn de, wɔdan kɔ anyame foforo nkyɛn na wɔdɔ bobe aba tetare no.

²Na mede nnwetɛbona dunum ne atoko homer biako ne atoko letek biako [a ɛyɛ homer fa] metɔɔ no.

³Na meka mekyerɛɛ no sɛ: Tena ha ma me nna pii, mmɔ aguaman na nyɛ ɔbarima bi de, na me nso me ne wo atena sa.

⁴ Na Israel mma bɛtena hɔ nna pii a wonni hene na wonni bapɔmma, na wonni afɔre na wonni ɔbosom dum, na wonni asɔfotade ne abusua ahoni.

⁵ Akyiri no Israel mma bɛsan abɛhwehwɛ AWURADE wɔn Nyankopɔn ne wɔn hene Dawid, na wɔn ho bɛpopo de aba AWURADE ne n'adɔe ho, nna a edi akyiri no mu.