Read Revised Akuapem Twi DC-KYERƐW KRONKRON Hosea 7 Bible Online

Hosea 7 - Revised Akuapem Twi DC-KYERƐW KRONKRON bible

Hosea 7

¹Meresa Israel yare yi, na Efraim amumɔyɛ ne Samaria nnebɔne reda adi; wodi atoro, na owifo bubu ba mu, akwamukafo asafo nso fow mmorɔn so.

²Na wɔnka wɔn komam sɛ mekaa wɔn bɔneyɛ nyinaa; afei wɔn nsɛnnii atwa wɔn ho ahyia, egu m’anim.

³Wɔde wɔn bɔneyɛ ma ɔhene ani gye, na wɔde wɔn atosɛm yɛ mmapɔmma saa ara.

⁴Wɔn nyinaa yɛ awaresɛefo, te sɛ ɔfononoo a abodootofo ahyɛ mu gya, na ogyae mu pia fi mmɔre fɔtɔw so kosi ne kaw so.

⁵ Yɛn hene afahyɛ da no, asabow bɔɔ mmapɔmma yare; ɔne afɛwdifo dii nsawɔso.

⁶Na wɔasiesie wɔn koma sɛ ɔfononoo, wɔn atirisopam no mu; wɔn abodootofo da anadwo nyinaa, anɔpa ɛdɛw sɛ ogya framfram.

⁷Wɔn nyinaa mu adodɔ sɛ ɔfononoo, na wokum wɔn akannifo; wɔn ahene nyinaa atotɔ; obi nni wɔn mu a ɔfrɛ me.

⁸Efraim de ne ho fra aman mu; Efraim yɛ ɔfam a wɔankisa.

⁹Ahɔho adi n’ahoɔden, nso onnim; dwen nso ahura ne tirim, nso onnim.

¹⁰Na Israel ahantan di n’anim adanse, na wɔnsan mmaa AWURADE wɔn Nyankopɔn nkyɛn, na wɔnhwehwɛ no eyi nyinaa mu.

¹¹ Na Efraim adan sɛ aborɔnoma ayemfo, onni ti; wɔrepɛ mmoa afi Misraim no na wɔdan Asaria nso.

¹²Wɔrekɔ no, mɛtrɛw m’atena mu makata wɔn so; meduru wɔn sɛ wim nnomaa; mɛtwe wɔn aso, na wɔn asafo bɛte nka.

¹³ Wonnue, efisɛ wɔaguan me; ɔsɛe mmra wɔn so, efisɛ wɔato me mmara; na me de, anka megye wɔn, nanso wodi me ho atoro.

¹⁴Na wonsu mfrɛɛ me wɔn komam, na wɔbobom wɔn nnae so; awi ne nsa nti na wodi nkyereso, wɔtew m’anim atua.

¹⁵Me de, makyerɛkyerɛ, na mahyɛ wɔn basa mu den, nanso pɔw bɔne na wɔbɔ me ho.

¹⁶ Wɔsan wɔn akyi, kɔ nea ɛho nni mfaso ho, wɔayɛ sɛ ɔta a agow. Afoa ano na wɔn mmapɔmma bɛtotɔ, keka a wɔn tɛkrɛma yɛ nti; eyi bɛma wɔadi wɔn ho fɛw Misraim asase so.