Read Revised Akuapem Twi DC-KYERƐW KRONKRON Amos 1 Bible Online

Amos 1 - Revised Akuapem Twi DC-KYERƐW KRONKRON bible

Amos 1

¹ Amos a ɔwɔ Tekoa nguanhwɛfo mu nsɛm a ohui n’ani so, Israel ho, Yuda hene Usia bere so ne Israel hene Yeroboam a ɔyɛ Yoas ba bere so, mfe abien ansa na asasewosow no bae ni.

² Na ose: AWURADE fi Sion bobom, na ofi Yerusalem ma ne nne so; na nguanhwɛfo adidibea no atwintwam, na Karmel atifi akisa.

³ Sɛ AWURADE se ni: Damasko amumɔyɛ ntoatoaso nti merennan n’asotwe no, sɛ wɔde dade awiporowade dwerɛw Gilead nti:

⁴Na mɛto Hasael fi mu gya, na ahyew Ben-hadad aban dennen no;

⁵ na mebubu Damasko pon akyi adaban, na matwa wɔn a wɔte Awen bon mu afi mu, ne ɔhempomakurafo no afi Bet-eden; na wobetu Siria man akɔ Kir, AWURADE na ose.

⁶ Sɛ AWURADE se ni: Gasa amumɔyɛ ntoatoaso nti merennan n’asotwe no, sɛ wotuu atukɔfo dodow, ɔman mu, kɔe sɛ wɔde wɔn rekɔhyɛ Edom nsa nti.

⁷Na mɛto Gasa fasu mu gya, na ahyew n’aban dennen no;

⁸na metwa emufo afi Asdod ne ɔhempomakurafo afi Askelon, na mɛdan me nsa mahyɛ Ekron, na Filistifo nkae ayera, AWURADE Nyankopɔn na ose.

⁹ Sɛ AWURADE se ni: Tiro amumɔyɛ ntoatoaso nti merennan n’asotwe no, sɛ wɔde atukɔfo dodow, ɔman mu hyɛɛ Edom nsa, na wɔankae anuanom apam no nti.

¹⁰Na mɛto Tiro fasu mu gya, na ahyew n’aban dennen no.

¹¹ Sɛ AWURADE se ni: Edom amumɔyɛ abiɛsa ne anan nti merennan n’asotwe no, sɛ ɔde afoa tiw ne nua, na ne yam anhyehye no, na n’abufuw sɛe ade ara, na ɔyɛ n’abohuru no so ade daa nti.

¹²Na mɛto Teman mu gya, na ahyew Bosra aban dennen no.

¹³ Sɛ AWURADE se ni: Amonfo amumɔyɛ ntoatoaso nti merennan wɔn asotwe no, sɛ bere a wogu so retrɛw wɔn ahye mu no mpo, wɔpaepae Gilead apemfo mu nti

¹⁴na mɛsɔ Raba fasu mu gya, na ahyew n’aban dennen no, ɔko da no bɛyɛ gyegyeegye, na ɛbɛyɛ den sɛ, ahumtu da ne kirididibɔ.

¹⁵Na wɔn hene bɛkɔ otukɔ mu, ɔno ne ne mmapɔmma bɛbom akɔ, AWURADE na ose.